Ia E Iloa Lelei Ou Uso

¹ O la tatou faiā ma o tatou uso tapuai e aofia ai le sili atu na i lo o le tau ina auai faatasi ma i latou i sauniga i le Maota o le Malo. O i tatou o ē faia le finagalo o le Atua, ma ua tatou maua ai se faiā faaleagaga ma Iesu. (Mare. 3:34, 35) Ma i lena, ua aumaia ai i tatou i se faiā tau aiga faaleagaga ma isi o le faapotopotoga Kerisiano, po o o tatou uso ma tuafāfine faaleagaga, o ē ua faatonuina i tatou e alolofa atu i ai. (Ioa. 13:35) O lea la, o i latou o auaufaatasi ma “le aiga o le Atua” e ao ona taumafai ia iloa lelei e le tasi le isi.—Efe. 2:19.

² Ia Iloa Ou Uso i o Latou Igoa: Pe e te iloaina igoa o uso ma tuafāfine uma o lau vaega o Suesuega Tau Tusi a le Faapotopotoga? E masani lava ona toalaiti le vaega, ua faafaigofie ai ona iloa igoa o le toatele, pe a lē o tagata uma foi, o auai. Pe e mafai ona e faapea atu e te iloaina lelei i latou pe afai e te lē iloa o latou igoa?

³ Ae faapefea le faamasani atu i isi, e aofia ai ma tamaiti, na e auai atu i sauniga i le Maota o le Malo? Atonu po o tatou tau ina auaufaatasi ma na o se vaega toalaiti o uo. E ui ina e lē sese le fiafia i se mafutaga masani ma ni tagata patino, o le a tatou lē mananao e faatapulaa o tatou alofaaga mafana ma talanoaga e atiina aʻe ai mo na o ni nai tagata. E ao ona tatou “faateleina” atu, ia faia se taumafaiga atili ina ia faamasani lelei i o tatou uso ma tuafāfine uma lava. (2 Kori. 6:11-13) O le a aofia ai i lena le iloa o i latou i o latou igoa.

⁴ O uso o loo taitaia sauniga a le faapotopotoga, e ao ona taumafai ia iloa igoa o ē uma o loo auai. O le valaauina taitasi mai i le pulelaa o i latou i o latou igoa, latou te lagona ai e talisapaia a latou tali, ma i le taimi e tasi, e fesoasoani ai i isi ia iloa o latou igoa. E moni o le a iai pea ni tagata fou po o ni tagata asiasi mai i le aofia, e faigata ai i se tasi ona iloa igoa taitasi uma. Peitai, o se taumafaiga faamaoni faifai pea, o le a faalaeiauina ai isi ma faaatagia atu ai se naunau moni totino.—Roma 1:11, 12.

⁵ Ia Tausolomua i le Faamasani Lelei Atu: O ovasia femalagaai e tele lava ina masani lelei ma le toatele o uso ma tuafāfine. E faapefea ona latou faia faapea? I auala autū e tolu: (1) Latou te galulue pea ma i latou i le auaunaga i le fanua; (2) a talafeagai ma o latou tulaga, latou te taliaina valaaulia ina ia asiasi atu i a i latou i o latou aiga; ma (3) latou te tausolomua i le faafeiloaia o tagata matutua ma ē iti i sauniga.

⁶ Pe mafai ona e iloa ni auala e faalautele atu ai au aufaatasiga ma ia atili ai ona e iloa lelei ou uso? E mautinoa le mafai ona tatou valaaulia isi ina ia tatou galulue faatasi i le auaunaga i le fanua. O le ō atu mai lea fale i lea fale, faia o toe asiga, faia o suesuega faale-Tusi Paia, po o le galuega mekasini i magaala, o auala uma ia e sili ona lelei e faamasani atu ai i isi. E lelei foi ona valaaulia isi ina ia asiasi atu i lou aiga, atonu pe faiʻaiga faatasi po o ni meaai māmā i nisi taimi. O le tausolomua ona faafeiloai atu i tagata fou po o i latou o ē e matamuli, e lē gata ina atiina aʻe ai lo latou tulaga faaleagaga ae o le a aumaia ai foi ni taui faaoaina.—Galu. 20:35; 1 Tesa. 5:11.

⁷ Sa iloa lelei e Paulo ona uso. O lona taʻua totino o le toatele o i latou i o latou igoa i ana tusi ua avea lea ma faamaoniga o lona naunau lē manatu faapito ma lona alofa moni mo i latou. (1 Tesa. 2:17; 2 Timo. 4:19, 20) O a tatou taumafaiga ia iloa lelei o tatou uso o le a iu ai i faamanuiaga mo i tatou uma lava.