E Iai le Mana i le Afioga a le Atua
1 E matuā telē se taaʻiga ua faia e le Tusi Paia i olaga o le faitau miliona o tagata. O mea o fai mai ai, ua sili atu ona uunaia ai na i lo so o se isi lava mea ua mafai ona saunia e se tagata. (Epe. 4:12) Tagaʻi i mea ua na faia mo i tatou. E moni, e lē mafaatusalia lona aogā.
2 O Molimau a Ieova, o ni tagata aʻoga e taulamua i le Tusi Paia ma o ni ē foi e lagolagoina. E tatau ona tatou manatu i le faitauina o le Tusi Paia o se vaega e matuā tāua o la tatou faasologa masani faatiokarate, e tatau ona faamuamua na i lo o le matamata i televise ma isi faafiafiaga uma o loo naunau i ai.
3 Ia Fai ma Masani e Lē Aunoa: Ua talisapaia e tagata o Ieova le taaʻiga malosi ua mafai ona faatinoina ona o le faitauina e lē aunoa o le Tusi Paia. Mo le tele o tausaga, na uunaia ai e se faaaliga telē lava o loo i luma o se tasi o ā tatou falegaosimea i Brooklyn ia tagata e ui ane ina ia “Faitau le Afioga a le Atua, le Tusi Paia, i Aso Uma.” E manaomia e sui fou o le aiga Peteli ona faitauina le Tusi Paia atoa i ō latou uluai tausaga o le auaunaga i Peteli.
4 E ui i le feomaʻi o lau faasologa, po o e tausisi ea i le faitau Tusi Paia faalevaiaso ua fautuaina, lena e faaauivi mai i le Faasologa o le Aʻoga o le Faiva Faatiokarate? Afai e faafaigata ona e faia lenei mea, aisea e lē galue ai ina ia faaleleia i a Novema? O le faitau Tusi Paia mo le masina atoa, o le Salamo 95-109, lea e manaomia ai le faitauina o le tolu po o le fa o ni itulau i le vaiaso. Ua filifili nisi e fai sina faitauga Tusi Paia laitiiti i aso taitasi, atonu po o le taeaopo, ia po o se taimi foi o le po a o leʻi moe. Po o le ā lava le auala e te faia ai, o le mea tāua, e te selesele mai ai aogā e sili ona aogā e ala i le faitauina pea o le Afioga a le Atua.
5 Ofo le “New World Translation”: O le toatele o ā tatou tagata aʻoga o le Tusi Paia ma isi tagata fiafia e lelei la latou tautala i le gagana Peretania. Afai o lea le tulaga, aisea e lē ofo atu ai i a i latou se kopi o le New World Translation e faaaogā faatasi ma ā latou Tusi Paia faa-Samoa pe a faia ā latou suesuega?
6 Ia sauniuni faamatalaga aogā i ni vala autū o le New World Translation e oso ai le naunau o tagata e fia maua se kopi. Ia faamatilatila lona aogā. E mafai ona e faatomua se tasi o mataupu i le vaega “Mataupu Faale-Tusi Paia mo Talanoaga” (Bible Topics for Discussion). Pe e te faataitaia foi le tāua o le faasino upu o le Tusi Paia e 92 itulau, i le faaalia lea o le auala e mafai ai e lē o loo faitau ona suʻe mau e masani ai. Atonu o le a fia faamatilatila atu e nisi tagata talaʻi le “Faasino Upu” (Appendix) po o le “Faasologa o Tusi o le Tusi Paia” (Table of the Books of the Bible) i le faaalia lea o lona tāua i suesuega faale-Tusi Paia.
7 Ia mautinoa ua faailoa atu e faapea, o le New World Translation ua lomia i le gagana Peretania faaonaponei, ina ia faigofie ai ona malamalama. O ni mau e lelei ona faatusatusa ma le King James Version, o loo i le 1 Korinito 10:25 ma le 16:22. O loo faaaogā e le New World Translation le suafa o le Atua o Ieova, e tusa ma le 7,210 taimi.
8 Ioe, o le Tusi Paia o le Afioga a le Atua. Afai tatou te faitau i ai, talitonu i ai, ma faatatauina ana fautuaga i ō tatou olaga, o le a tele aogā tatou te selesele mai ai. Na tusia e faatonu ai i tatou ma maua ai le faamoemoe. (Roma 15:4) E matuā tāua lo tatou faitau i ai i aso uma, ma ia mafai ai ona tatou nofo sauni e aʻoaʻo atu ai i isi.