Ia Faaalia Lou Manatu Mamafa e Ala i le Faia o Toe Asiga
1 O le sailia o tagata loto naunau mai lea fale i lea fale, ua faaalia ai lou faanaunauga ina ia tuuina atu i isi le avanoa latou te faalogologo ai i le feau o le Malo. O lea, ia mautinoa, ua toe tuliloaina ni lomiga na e tuua ai i le masina o Ianuari, auā o le auala lelei lenei e te faaalia atu ai lou manatunatu mamafa i isi.
2 E mafai ona e toe tuliloaina le tusi lea na tuu o “Le Manuia Moni ma le Saogalemu—Mai le a Le Puna?” ma fai atu ai se taulimaga puupuu faapenei:
◼ “Ua lē mafaia e taʻitaʻi o le lalolagi i aso nei ona aumaia le filemu ma le saogalemu. Ua na o Ieova le Atua lē e toatasi e mafai ona ia faia o lena mea. Ua faailoa mai e le Tusi Paia i a i tatou le mea e manaomia ona tatou faia. [Talanoa i manatu tāua o loo i le palakalafa 1 ma le 2 i le itulau e 178, ona faitau lea o le Isaia 26:4.] Ou te manao e faasino atu i a te oe le auala e mafai ai e lenei tusi ona fesoasoani i a te oe.”
3 Afai sa e tuu le tusi “Ia oo mai lou Malo,” e mafai ona faaauau la lua talanoaga i lou faapea atu:
◼ “I le taimi ua tuanai, sa ta talanoa ai e uiga i le Malo o le Atua, ma mea o le a faia e lea Malo mo i tatou. Ua lē o toe mamao ona faia lea e lena Malo le lalolagi lenei ina ia avea ma parataiso. Talu ai tatou te leʻi vāai muamua lava i se parataiso, atonu ai la e faafaigata ona e talitonu i ai. O foliga nei atonu o le a foliga mai ai. [Faasino atu i le ata o loo i le itulau e 4 ma le 5.] O se parataiso faapena lea o loo folafolaina mai i le Tusi Paia.” Ia faitau le Salamo 72:7. Afai e faaalia mai se naunau, ona susuʻe lea i le itulau e 175, palakalafa 3 ma le 4, ma faasino atu i ai le mea e tatau ona tatou faia pe afai tatou te mananao e soifua ai i le Parataiso lea o loo sau.
4 Atonu o e tuliloa se polosiua na tuu “Po o Silasila Alofa mai ea le Atua ia i Tatou?” i se fautuaga e faapenei:
◼ “Talu ai, na ou tuua ai i a te oe se kopi o lenei polosiua, lea o loo lāgā ai se fesili tāua e faapea: ‘Po o silasila alofa mai ea le Atua i a i tatou?’ Ina ua uma ona e autaluina lenei polosiua, o le ā se manatu na oo i a te oe? [Faatali mo se tali.] E le taumatea sa faalaeiauina ai oe i le faitauina o mau o loo folafola mai ai se lalolagi ua faaparataisoina, o i inā e mafai ona tatou nonofo ai i le filemu. [Faaali atu ata i le itulau e 2 ma le 3, ma faasino i ai ni vala faaoso naunau o le lalolagi fou.] Ou te mautinoa e te manao faatasi ma ē pele i a te oe e ola i se lalolagi fou faapena. Ia matau le mea lea e fai mai ai le palakalafa e 16 i le itulau e 31 e uiga i lenei mea.” Faitau le palakalafa, ma faasino i ai e faapea o le saili i a Ieova o lona uiga, o le aʻoaʻo atili lea e uiga i a te ia ma ana fuafuaga e ala i le suesueina o lana Afioga le Tusi Paia.
5 Ua uma ona faataatia e Ieova se faaaoaoga lelei atoatoa i le avea o se Leoleo Mamoe alofa o lē e manatu mamafa i ana mamoe. (Eseki. 34:11-14) O ā tatou taumafaiga faamaoni e faaaʻoaʻo i lana tausiga alofa, e faafiafiaina ai o ia, e faaalia ai lo tatou alofa, ma avatu ai faamanuiaga i isi.