Faaaogā Lelei ā Tatou Tusi Tuai
1 Ua sauniunia e Ieova mo i tatou le anoanoai o meaʻai susua faaleagaga. O le tele o nei mataupu, na saunia lea e faaauala mai i tusi e taʻi 192 itulau, ia sa lolomiina i tausaga na seʻi mavae atu. A o faagasolo le masina o Ianuari, o le a tatou ofoina atu ai so o se tusi e taʻi 192 itulau, na lolomia muamua atu, a o leʻi oo i le 1985 (Le Manuia Moni, Upu Moni, ma le Agaga Paia). Po o iai ea i a te oe i le fale, nisi o nei tusi o loo iai pea i se tulaga lelei? Po o iai ea i le faapotopotoga nei tusi? Pe afai o iai, o le a sili atu la ona lelei pe a toe autaluina ō latou faasino mataupu, ma filifili mai ai ni manatu e mafai ona e faaaogā mo ni talanoaga pe a faia lau taulimaga. Pe afai ua lē o toe iai se tusi o nei tusi tuai o totoe, ona faaaogā lea o le tusi “Ia Oo mai Lou Malo.”
2 Pe afai o loo e faaaogaina le tusi, “Le Manuia Moni ma Le Saogalemu—Mai le a Le Puna?,” atonu o le a e manao e faataitai le faamatalaga lenei:
◼ “O tagata uma lava, e mananao ina ia soifua aʻe i se lalolagi o loo iai le filemu ma le saogalemu. E faanoanoa lava e faapea atu, tatou te lē o mauaina lena tulaga i lenei vaitaimi o loo tatou ola ai. O le ā sou manatu i se mea e manaomia ona tatou faia, ina ia avea ai le filemu ma le saogalemu o se mea moni? [Faatali mo se tali.] Ua iai i le Atua le mana na te aumaia ai le filemu i lenei lalolagi, ma ua ia folafola mai o le a ia faia lava faapea.” Suʻe i le ata i le itulau e 4, ona faitau lea o le Mika 4:3, 4 i le palakalafa e 16, i le itulau e 104. Afai e talileleia, ona faamatala atili lea e uiga i le faamoemoe o le Malo, ofo le tusi, ma fuafua mo se toe asiga.
3 Pe afai o loo e faaaogaina le tusi “Ia Oo mai Lou Malo,” e mafai ona e amata i lou fai atu faapea:
◼ “Ua toetoe lava atoa le 2,000 tausaga o tatalo atu pea le ʻau Kerisiano mo le oo mai o le Malo o le Atua. O le ā e te manatu o le a faia e le Malo mo tagata? [Faatali mo se tali. Suʻe i le pusa o loo i le itulau e 25, ma faasino atu i ai nisi o faamanuiaga o le a mafai ona vaaia moni i le pulega a le Malo.] I le tusi lenei, o loo talanoaina ai mea o le a faataunuuina e le Malo, ma o loo faamatala mai ai foi le auala o le a maua ai e oe, faatasi ma ē pele i a te oe ni aogā. Afai e te fia faitau i le tusi, ou te fiafia e tuuina atu se kopi mo oe.”
4 Atonu o le a e filifili e faaaogā le polosiua, “Po o Silasila Alofa mai ea le Atua ia i Tatou?” Afai o lea, e mafai la ona e faapea atu:
◼ “E toatele tagata o loo tau mānatunatu pe aisea ua faatagaina ai e le Atua le tele o mafatiaga i le lalolagi. Talu ai o ia e ōna le malosi uma lava, ae aisea la ua ia lē faia ai se gaoioiga ina ia faaiuina ai ō tatou mafatiaga? O le ā sou lagona i ai? [Faatali mo se tali.] Ua faamautinoaina mai e le Tusi Paia i a i tatou e faapea, e lē o tuulafoaiina i tatou e le Atua.” Suʻe i le itulau e 27, palakalafa e 22, ona faitau lea o le Salamo 37:11, 29. Ia faasino atu i ai le ata faatupu naunau, lena o loo faaatagia mai ai mea e mafai ona tatou tulimatai atu i ai i le lumanai. Pe afai ua taliaina le polosiua, ia ofo atu i ai e mafai ona e toe foi atu e faataitai pe faapefea ona faaaogā ina ia faia ai se suesuega faale-Tusi Paia.
5 Ua faagaeeina e ā tatou lomiga le naunau o le faitau afe o tagata, ina ia latou matuā suesueina loloto ai le Tusi Paia. O mea ua latou aʻoaʻoina mai ai, ua avatu ai i a i latou le faamoemoe mo se lumanai fiafia. (Sala. 146:5) O se faaeaga la mo i tatou ina ia fesoasoani atu i a i latou.