Faaalia le Manatu Mamafa i Isi—Vaega 2
1 I se tulaga tatau ma talafeagai, tatou te mananao ai e faia se faiā lelei ma tagata o ē o loo nonofo i la tatou oganuu. E manaomia ai i lenei mea lo tatou faaalia o le magafagafa ma le faaaloalo i a latou aiā tatau ma faalogona.
2 E lauiloa Molimau a Ieova i amioga lelei. O o tatou tulaga i teuga ma amioga lelei i tuaoi, i aʻoga, ma i nofoaga o galuega, faapea ma a tatou fonotaga, ua avea o se mataupu e taʻuleleia e le toatele.—Tagaʻi i Le Olomatamata o Tesema 1, 1989, itulau e 28.
3 O le mea moni, o amioga lelei, e aofia ai le tele o mea, e pei o le faamaoni, filigā, ma amioga lelei. E aofia ai foi ma le faaaloalo i tagata ia e nonofo latalata ane i lo tatou Maota o le Malo. O a tatou amioatua i isi tulaga e ono faaleamanaia pe afai e lē taulau ona tatou manatunatu i o tatou tuaoi. Ua faamalosiau mai Paulo i a i tatou “ina ia tusa la outou amio ma le tala lelei.”—Fili. 1:27.
4 I nisi taimi, e faitio mai ai nisi tagata o ē o loo nonofo latalata ane i nisi o Maota o le Malo, ona ua latou lagona e faapea ua lē faaalia le manatu mamafa e i latou o loo auai i sauniga. E tatau i uso ma tuafāfine ona alofia le faapotopoto i le auala e savavali ai i luma o le Maota o le Malo ma talanoa leo tetele ai, e lagona mai lava e aiga o loo latalata ane. E lē tatau ona faatagaina tamaiti e fetaufetuliai solo i totonu ma fafo o le Maota o le Malo. O le soona paʻō o le tapuniina o faitotoa o taavale ma faaēē pu, e mafai ona faalavelave atu ai i tuaoi. O nei ituaiga amioga e mafai ona tupu ai le lē fiafia i le faapotopotoga. E tāua foi lo tatou matauina o tulafono tau taavale pe a ave le taavale i lea vaipanoa.—Roma 13:1, 2, 5.
5 E lē tatau ona pakaina ni taavale i fanua totino o tagata po o avanoa e faalavelave ai i taavale pe poloka ai auala i fale o aiga. O paka foi o taavale ua taofia e pisinisi o latalata ane mo a latou tagata faatau faapitoa, e lē tatau foi ona faaaogaina seʻi vaganā ua aumai se faatagaga. I nofoaga e faaaogā ai e ni faapotopotoga e tolu pe fa le Maota o le Malo e tasi, ua faia ai ma le talafeagai se faasologa o sauniga i aso uma o le vaiaso, ma o lenei mea e manaomia ai se felagolagomai vavalalata i le ʻau toeaina.—Tagaʻi i Le Olomatamata o Oketopa 1, 1989, itulau e 30, palakalafa 13.
6 Ua uunaia i tatou e le Tusi Paia ina ia “faia mea uma lava ina ia viia ai le Atua,” ma e aofia ai le faaalia o le manatu mamafa mo tagata i fafo atu. (1 Kori. 10:31-33) Afai tatou te ‘vaavaai i mea totino a isi,’ o le a tatou lē soona solia ai a latou mea totino. (Fili. 2:4) O le a tatou alofia ai foi le aiā fua i gaoioiga faapisinisi a le ʻau faioloa o lata ane.
7 O le faaalia o le magafagafa mo isi—i totonu ma fafo atu o le faapotopotoga—o se faaaliga vaaia lea o mea o i totonu o o tatou loto. O mea tatou te faia ma tautala ai, e ao ona faaalia ai lo tatou ‘alofa mo tuaoi e pei o i tatou lava.’—Mata. 7:12; 22:39.