Le Mea e Aupito Sili ona Tāua na Tupu i le Talafaasolopito o le Tagata

¹ Na afio mai Iesu i le lalolagi i le faatonuga a lona Tamā ia molimau i le upu moni lea e taʻitaʻia ai i le ola e faavavau. (Ioa. 18:37) O lona faamaoni e oo i le oti, na faamamaluina ai Ieova, faapaia ai le suafa o le Atua, ma saunia ai le togiola. (Ioa. 17:4, 6) O lenei mea ua avea ai le maliu o Iesu o se mea e sili ona tāua ua tupu i le talafaasolopito o le tagata.

² Talu mai le foafoaina o Atamu, e na o le toalua tagata lelei atoatoa na ola ai i le fogaeleele. Sa iai Atamu i se tulaga e aumaia ai ni faamanuiaga ofoofogia i ana fanau e leʻi fananau mai. Na i lo o lea, na ia fouvale ma le manatu faapito, o lea ua faasalaina ai i latou i se olaga matautia e iu atu i le oti. Ina ua afio mai Iesu, sa ia faaalia le faamaoni atoatoa ma le usiusitai, lea ua tatala ai le avanoa mo le ola e faavavau, ia i latou uma o ē o loo faaalia le faatuatua.—Ioa. 3:16; Roma 5:12.

³ E leai lava se mea ua tupu e ono faatusatusaina i ai le maliu faataulagaina o Iesu. Na suia ai le talafaasolopito o le tagata. Ua saunia ai le faavae mo le toe faatutuina mai o le faitau piliona o tagata ua maliliu. Na faataatia ai le faavae mo se Malo e faavavau, o le a faaiua e lena malo le amioleaga ma faaparataisoina ai le lalolagi. Ma e iu ina faasaoloto mai ai tagata mai mea uma lava o loo lutia ma faapologaina ai i latou.—Sala. 37:11; Galu. 24:15; Roma 8:21, 22.

⁴ O nei mea uma lava ua fesoasoani mai lea ia i tatou e talisapaia ai le mafuaaga na faatonuina ai e Iesu ona soo ina ia latou faamanatuina lona maliu, i le faia lea o le Faamanatuga i tausaga taitasi. (Luka 22:19) I le talisapaiaina o lona tāua, tatou te vaavaai atu ai i luma e tauaofia faatasi ma faapotopotoga a Molimau a Ieova i le lalolagi aoao pe a mavae le goto o le la i le Aso Faraile, Aperila 14. A o leʻi oo i lena taimi, o se mea lelei ona faitauina faatasi o se aiga atoa faamatalaga a le Tusi Paia e faatatau i aso mulimuli sa iai Iesu i le lalolagi, ma lona tulai atu ma le lototele mo le upu moni. (O fuaitau ua fautuaina o loo faailogaina i la tatou 1995 Calendar, o Aperila 9-14.) Na ia faataatiaina mo i tatou se faaaʻoaʻoga o le tuutoina i Lē na Foafoaina i tatou. (1 Pete. 2:21) Seʻi o tatou faia la le mea sili e valaaulia ai a tatou uo ma tauaiga, faapea ma tagata aʻoga o le Tusi Paia ma isi tagata naunau fiafia, ina ia auai i lenei aufaatasiga sili ona tāua. Ia muai faamatala atu le mea o le a faia ma le tāua o le areto ma le uaina.—1 Kori. 11:23-26.

⁵ E tatau i toeaina ona fuafua lelei i se taimi a o mamao lava ina ia mautinoa ai ua mamā ma matagofie le Maota o le Malo. E tatau ona faia ni fuafuaga mo se tasi na te aumaia le areto ma le uaina. E tatau ona maopoopo lelei le tautuaina o le areto ma le uaina. O fautuaga aogā i le auala e faaalia ai le faaaloalo mo le Talisuaga Afiafi a le Alii ua aumaia lea i Le Olomatamata o Aokuso 1, 1985, itulau e 19. O le a fetaui lelei mo le faapotopotoga ona fuafua ina ia latou faateleina le auaunaga i le fanua mo ni nai aso a o leʻi faia le faamanatuga, faapea foi ma ni nai aso pe a uma ona faamanatuina.

⁶ I le tausaga ua teʻa, o se aofaiga e 12,288,917 na auai i le faamanatuga i le lalolagi aoao o lenei mea e aupito sili ona tāua na tupu. Ona o se aso e sili ona tāua i la tatou kalena, e tatau ai ia i tatou uma ona auai.