Aisea e Tausia ai se Faamaumauga o Ē e Lē o i Aiga?

¹ O se ulugalii Molimau, sa vave lava ona o atu i laua i le auaunaga i le fanua i se tasi aso. Mulimuli ane i lena lava aso, na la toe foi atu ai e asia i latou sa lē maua atu i o latou fale i lena oganuu. Sa valaaulia i laʻua e se tasi tamaloa i totonu o le fale ma faalogo ma le naunau ia i laʻua. Na ia avea se tusi Ola e Faavavau ma talosaga atu i Molimau pe mafai ona la toe foi atu. E lei talanoa muamua lava o ia i ni Molimau a Ieova ma sa tele ni ana fesili na ia manaomia ni tali; ma na amataina ai se suesuega faale-Tusi Paia. Sa matuā faatumulia lea ulugalii i le olioli ina ua maua sea tagata e pei o se mamoe. E te manao e tupu se mea faapena ia te oe? O le tausia lelei o faamaumauga o tagata e lē maua atu i aiga ma toe foi vave atu e asi, e mafai ona oo ai se mea faapena ia te oe.

² Ua uunaia pea i tatou ina ia tausia lelei ni faamaumauga saʻo o i latou e lē maua atu i aiga ma ia vave ona toe foi atu e asia i latou. E pei ona faaalia i le mea lea na tupu, o se isi asiasiga i lena lava aso e ono maua ai ni iuga lelei. E foliga mai a o tatou maumauai e galueaiina le oganuu tofia, a e atonu tatou te lē o filigā i le tausia o ni faamaumauga o i latou e lē maua atu i aiga. Ua faapea mai nisi: O vaiaso tailua uma lava pe taitolu matou te galulue ai i la matou oganuu, e lē manaomia la ona tausia na faamaumauga auā e le o toe umi se taimi a e matou toe o atu foi i ai.’ A e o le mafuaaga sili lena e manaomia ai ona tatou tausia se faamaumauga. Afai e galueaiina soo le oganuu, o le tuliloaina o i latou e le maua atu i aiga, o le a mafai ai ona tatou faia maeʻaeʻa le sailiga mo e ua tatau ai. E faapefea?

³ I le tele o oganuu, e tusa ma le 50 pasene pe sili atu foi o tagata, e lē maua atu i aiga i le taimi o le ao. O lea, o le mea moni, e mafai ona maua ai nisi oganuu pe afai tatou te uai totoʻa i ē o i a tatou faamaumauga o e e lē o maua atu i aiga. E tusa lava pe e seāseā galueaiina le oganuu, a e e mafai ona maua ai ni iuga lelei pe afai e faia se taumafaiga e asia tagata uma a o lei faailogaina le oganuu e faapea ua uma ona galueaiina.

⁴ E mafai foi ona fuafuaina e toe asiasi atu i ē e lei maua i aiga i se isi aso, e lelei pe a fuafua e faia i lena lava vaiaso. E toatele latou te iloa e sili ona lelei le toe foi atu i le aso e sosoo ai ma i se isi taimi e ese mai i le uluai asiasiga. E mafai ona e filifilia se taimi o le Aso Toonai po o le Aso Sa e asia ai ē e lei maua atu lava i fale na matauina a o faagasolo le vaiaso. E i ai foi taimi e iloa ai e le toatele o le faapotopotoga e faapea, e mafai ona fuatele pe afai e faia na asiasiga i itula afiafi a o lei po. Atonu o le a latou maua atu ai le toatele o tagata o le nuu i fale.

⁵ E tatau ona e faia se lisi o toe asiga ia oe lava faamaumauga totino. Afai e le mafai ona e toe foi atu i le mea e te lei maua atu i ai se tagata, e tatau ona avatu lau faamaumauga o igoa o tagata o ē e lei i ai i aiga i le uso lea o loo ia vaavaaia lea vaega, ina ia mafai ona faaaogaina e le isi vaega lea o le a o atu e galulue ai i lena oganuu.

⁶ O le uai totoʻa i lenei vala o la tatou faiva e mafai ai ona fuatele mai ma maua ai foi lo tatou olioli. E aumaia ai ia i tatou le loto malie i lo tatou iloa ua faia ma le maeaea la tatou galuega i le sailia ma le tausia o ē pei ni mamoe.—Eseki. 34:11-14.