Pe a Lē Maua Tagata i le Fale
1. O le ā se faafitauli masani pe a talaʻi mai i lea fale i lea fale?
1 Ua faateleina le faigatā ona maua o tagata i le fale i le tele o vaipanoa. I nei “aso faigatā,” ua faamalosia le toʻatele e faigaluega mo ni itula uumi ina ia maua ai mea manaʻomia o le olaga. (2 Timo. 3:1) E ō ese nisi mai le fale ona o loo ō atu e faatau, po o loo ō foʻi i ni faiga mālōlōga. E faapefea ona tatou faaoo atu le tala lelei i na tagata?
2. E faapefea ona tatou faamautinoa o le a asia i latou e leʻi maua atu i le fale?
2 Fai ni Faamaumauga Lelei: O le uluaʻi laasaga, o le faamau lea o ē e leʻi maua i le fale. E tāua tele lenei vala pe afai e te galue soo i la outou oganuu. Pe e te faamauina le igoa o le auala, le numera o le oganuu, le igoa o le nuu, o lou suafa, ma le aso? Ia faaavanoa se isi pito o le pepa e fai ai nisi faamaumauga, pe a e toe galue, pe galue ai foʻi se isi tagata talaʻi i le oganuu lea e leʻi maua ai nisi i le fale. I le faaiʻuga o le vaitaimi lea e molimau atu ai, manatua e ave le pepa po o faamaumauga i le tagata o loo iai pepa o le oganuu, seʻi vaganā ua ia manaʻo e te galue i aiga e leʻi maua atu i ai nisi. Ia faaaogā se isi pepa e faamau ai so o se tagata fiafia na e maua lea o le a toe asi.
3. O ā ni fautuaga ina ia mafai ona oo atu ai iā i latou e leʻi maua i le fale?
3 Toe Asi i se Isi Taimi: O nisi sa lē maua atu i le fale i aso o le vaiaso, atonu o le a iai i le fale i afiafi po o faaiʻuga o le vaiaso. Pe mafai ona faatulaga lau faasologa e toe foʻi i se taimi e sili atu ona talafeagai? (1 Kori. 10:24) Afai e lē mafai, e te ono avatu le pepa o tagata e leʻi maua atu i le fale, i se tagata talaʻi e mafai ona ia toe foʻi e asi i se isi taimi. A lē o lenā, e te ono tusi atu iā i latou sa lē maua i le fale pe taumafai foʻi e telefoni i ai. E ono fiafia tagata talaʻi ua tapulaa le faia o so latou sao i le talaʻiga i lea fale i lea fale, e fesoasoani atu iā te oe i lenei vala.
4. O le ā se mea na tupu e faataʻitaʻia ai le tāua o le toe asi o ē e leʻi maua atu i le fale?
4 Ua faataʻitaʻia mai i se mea na tupu le tāua o le taumafai e faafesootaʻi i latou e leʻi maua atu i le fale. Ina ua mavae le tolu tausaga o asiasi atu pea tagata talaʻi i se fale, na oo ina feiloaʻi atu i le tagata o le aiga. Na iloa ane, sa faatalitali le fafine mo lenā taimi umi i se Molimau e na te faaauauina lana suʻesuʻega faale-Tusi Paia, lea sa faia muamua a o leʻi siitia atu i lenā vaipanoa.
5. O le ā le taimi e manatu ai ua māeʻa ona galueaʻiina se oganuu?
5 Faamāeʻa le Oganuu: O le ā le taimi e manatu ai ua māeʻa ona galueaʻiina se oganuu? E masani lava pe a uma ni taumafaiga lelei e fesootaʻi atu i se tagata i aiga taʻitasi. E ono talafeagai le tuu ma le faautauta o se sāvali po o se mekasini tuai i fale e lē o maua atu ai tagata, aemaise lava oganuu ia e lē masani ona galueaʻiina soo. E ao ona māeʻa galueaʻiina le oganuu i le fā masina. Ona vave faailoa atu lea i le auauna o le oganuu ina ia faia ai ana faamaumauga saʻo o le oganuu.
6. Aiseā e ao ai ona tatou taumafai e faaoo atu le tala lelei i tagata uma o la tatou oganuu?
6 E tatou te mananaʻo ia maua e le toʻatele o tagata e mafai ai se avanoa e aʻoaʻo e valaau i le suafa o Ieova ma faaolaina ai. (Roma 10:13, 14) E aofia ai ē e leʻi maua atu i o latou aiga ina ua tatou asiasi i ai mai lea fale i lea fale. I le pei o le aposetolo o Paulo, ia e naunau e “molitino atu le tala lelei o le alofa tunoa o le Atua.”—Galu. 20:24.