O ā Sini o Outou Faataatitia mo a Outou Fanau?

¹ O le taulau manuia i le olaga, e faalagolago i le faataatitiaina ma le ausiaina o sini aogā. O i latou o tuliloa ni sini e faalētāua pe lē moni, e iu i le lē fiafia ma le lē mafai ona faataunuuina. E manaomia le atamai ina ia iloa ai po o fea sini e tuliloa ina ia mafai ai ona “fetagofi atu i le ola e faavavau.” (1 Timo. 6:19) Maeu lo tatou loto faafetai ona ua faaalia e Ieova e ala i lana Afioga ma le faalapotopotoga le auala tonu tatou te ui ai!—Isa. 30:21.

² I le saunia o lea taʻitaʻiga alofa, ua faataatia ai e Ieova se faaaoaoga lelei mo mātua. Nai lo o le tuu atu i a latou fanau e leai se poto masani e filifili po o lē fea auala e sili ona lelei, o mātua atamamai e latou te aʻoaʻoina i latou i le auala e ao ona latou ui ai, ma pe a oo ina matutua, “e le teʻa ese ai.” (Faata. 22:6) Ua iloa e mātua Kerisiano mai le poto masani e faapea, e lē mafai ona latou faatuatua i lo latou lava atamai; ae tatau ona latou faalagolago ia Ieova. (Faata. 3:5, 6) Ua sili ona tele lenei manaoga i tamaiti, o ē e lē lava lo latou iloa ma le poto masani.

³ E mafai e mātua ona faataatitia ni sini aogā mo a latou fanau, o le a fesoasoani ia i latou e tepa taulai atu ai i “mea e sili ona tāua.” (Fili. 1:10, NW) E mafai ona latou amata i le suesuega faaleaiga, i le faalaeiauina o fanau ia talisapaia le tāua ma ia maua mai ai ni aogā. E lelei mo fanau ona fai ma masani le muai suesue mo sauniga a le faapotopotoga ma sauniuni e fai ni tali i a latou lava upu. O le faia e lē aunoa o se sao i le galuega talaʻi, e tāua. E mafai ona saosaolaumea tamaiti laiti i le ofoina o sāvali, faitauina o mau, po o le ofoina atu o mekasini. Pe afai ua latou iloa faitau, o le tusia o o latou igoa i le Aʻoga o le Faiva Faatiokarate e mafai ona latou vave agaigai ai i luma faaleagaga. O le taʻuagavaaina e avea o se tagata talaʻi lē papatisoina po o le talia foi mo le papatisoga, o se laasaga sili lea mo le agaigai i luma.

⁴ A o agaʻi atu a latou fanau i le tulaga o le talavou po ua taʻi sefulu ma ona tupu tausaga, ia pe e lei oo foi i lena tulaga, e tatau i mātua ona talanoa saʻo atu ia i latou e uiga i ni tomai e manaomia ona ausia. E faigofie lava ona taaʻina i latou e faufautua i aʻoga ma aumea i vasega e tuliloa ni sini faalelalolagi po o mea faitino. E ao i mātua ona fesoasoani i a latou fanau e filifilia mataupu o le aʻoga e maua ai toleniga aogā, e faaaupegaina ai i latou mo le tausiga o o latou manaoga faaletino e aunoa ma le faataulagaina ai o manaoga tau i le Malo. (1 Timo. 6:6-10) E mafai ona faalaeiauina i latou ina ia tuliloa le “meaalofa” o le nofofua, ma mulimuli ane, afai latou te filifili e faaipoipo, ae ua oo ina mafai ona latou tauaveina tiute tauave mamafa tau faaipoipoga. (Mata. 19:10, 11; 1 Kori. 7:36-38) O le talanoa i se auala mautinoa e uiga i le auaunaga faapaeonia, le auaunaga i nofoaga o manaomia tele ai le fesoasoani, le auaunaga i Peteli, po o le galuega faamisionare, e mafai ai e mātua ona totō i loto o a latou fanau mai lava i tausaga amata, le faanaunauga e faaaogā o latou ola i se auala e faafiafia ai le finagalo o Ieova, ma maua ai e isi aogā, ma maua ai faamanuiaga mo i latou lava.

⁵ E lē o se mea na tupu faafuasei lo tatou maua o le toatele naʻuā o tagata talavou i le faalapotopotoga i aso nei, o ē o taofi mau i uiga anagata faa-Kerisiano ma tuliloa sini faatiokarate. Ua māfua ona tele lo latou taulau ona o mātua alolofa. Afai o oe o se matua, o fea e foliga mai o agaʻi atu i ai lau fanau? Po o latou agaigai atu i luma i se olaga e taulai atu i faanaunauga tau i le Malo? Ia manatua, o le tasi o mea e aupito sili ona tāua e mafai ona e faia, o le totō lea o le upu moni i lau fanau, ma tautala ai i aso uma. E mafai ona faamanuiaina oe i se aiga faamaoni i le auaunaga ia Ieova.—Teu. 6:6, 7; Iosua 24:15.