Aʻoaʻo Lau Fanau ia Avea ma Auauna a Ieova
1. O le ā ua faamalosia mātua i le Salamo 148:12, 13 e fai?
Ua valaaulia e Ieova talavou e vivii atu iā te ia. (Sala. 148:12, 13) O lea la, e lē gata e aʻoaʻo e mātua Kerisiano a latou fanau i upu moni o le Tusi Paia ma tulafono a le Atua i amioga lelei, ae aʻoaʻo foʻi ia avea ma tagata talaʻi. O le ā le auala e faasolosolo ona faia ai faapea?
2. E faapefea ona aogā le faaaʻoaʻoga lelei a se matua i lana fanau?
2 Faaaʻoaʻoga Lelei: Na fai atu le faamasino o Kitiona i lana ʻautau e toʻa 300: “Ia outou vaavaai ma faaaʻoaʻo mai iā te aʻu.” (Faama. 7:17) O le masani a fanau e vaavaai ma faaaʻoaʻo i o latou mātua. O se tasi tamā e faigaluega i le pō, ae nai lo o le moe pe a foʻi mai i le fale i le taeao o le Aso Toonaʻi, e na te ave lana fanau i le talaʻiga e ui lava e lē lavā. E aunoa ma se upu, ua ia aʻoaʻo lana fanau e tāua tele le talaʻiga. (Mata. 6:33) Po o iloa e lau fanau o loo e faia ma le olioli vala eseese o le tapuaʻiga, e pei o le tatalo, faitauina o le Tusi Paia, faia o tali ma le talaʻiga? Ioe, e lē mafai ona avea oe ma faaaʻoaʻoga e lelei atoatoa. Ae o le a fiafia lau fanau e talia au taumafaiga e aʻoaʻo i latou e tapuaʻi iā Ieova, pe afai e iloa o loo e maelega e auauna iā te ia.—Teu. 6:6, 7; Roma 2:21, 22.
3. O ā sini faaleagaga e ao i mātua ona fesoasoani i a latou fanau e faatutū ma ausia?
3 Faatutū ni Sini: E aʻoaʻo e lē aunoa e mātua a latou fanau ia iloa savavali, tautatala, fai o latou ofu ma isi mea. A o tuputupu aʻe le fanau, e iai nisi sini e faatutū e mātua mo i latou. Pe afai o mātua o ni Kerisiano, e latou te fesoasoani foʻi i le fanau ia faatutū ma ausia sini faaleagaga, e fua i o latou tausaga ma tomai. (1 Kori. 9:26) Po o e aʻoaʻo lau fanau e fai ni tali i a latou lava upu, ma sauni a latou lauga i le Aʻoga o le Faiva Faatiokarate? (Sala. 35:18) Po o e aʻoaʻo i latou e auai i vaega eseese o le talaʻiga? Po o e faatutū iā i latou le sini o le papatiso ma le auaunaga faataimi atoa? Po o e fesoasoani iā i latou ia faifaimea faatasi ma tagata talaʻi fiafia ma maelega, o ē e faalaeiauina i latou?—Faata. 13:20.
4. E faapefea ona aogā i fanau pe a aʻoaʻoina e mātua i latou i le auaunaga a o laiti?
4 Na taʻua e le faisalamo: “Le Atua e, na e aʻoaʻo mai iā te aʻu talu mai loʻu talavou, ma e oo mai nei lava, ou te taʻutaʻu atu pea au galuega ofoofogia.” (Sala. 71:17) Ia aʻoaʻo lau fanau a o laiti, ina ia avea ma auauna a Ieova. E mautinoa o le a aogā iā i latou le faavae faaleagaga lea ua e fesoasoani e atiaʻe, pe a matutua!—Faata. 22:6.