Faaavanoa se Taimi mo le Galuega Mekasini

¹ Ua fuafuaina e Ieova, o le a maua se ‘filemu, se lumanai, ma se faamoemoe’ mo i latou o ē e usiusitai i ona ala. (Iere. 29:11) O faamatalaga e faatatau i lenei folafolaga, o loo matuā fetaui lelei lona aumaia faasolosolo mai i Le Olomatamata ma le Awake! Ua mafai ona aogā nei mekasini i ituaiga uma o tagata, ma i so o se matata o le olaga. (1 Timo. 2:4) Po o faaavanoaina ea e lē aunoa e oe, ma lou aiga se taimi mo le tufatufaina atu o mekasini?

² Afai ua faasolo lava ina faaitiitia le aofaiga o au mekasini o loo ofoina atu, e ono foia la faapefea lenei masani? O se tasi o auala e sili ona manaomia, o lou naunau atili pea lea e talisapaia mataupu o loo i a tatou mekasini. Na tusi mai se tasi tamaloa e faapea: “O le faitauina o a outou mekasini, o se mea moni e olioli ai. Ua lē na o ni ‘faamafanafana’ e faatauvaa ni o latou aogā o iai, ae o loo iai taitaiga ma taiala i le auala e mafai ona faia ina ia uigā ai le olaga.” O Le Olomatamata ma le Awake! o ni fua ia o sailiiliga maeaea, ma o ni sauniuniga a le “auauna faamaoni ma le mafaufau.” (Mata. 24:45) O ni meafaigaluega aogā mo le pāʻiaina o loto o tagata.

³ Ia e faamasani lelei i mataupu o mekasini o loo e ofoina atu. Vaai ni manatu o loo talanoaina ai ni faafitauli, e te iloa o loo tutupu i lou vaipanoa i lenei vaitaimi. E lelei pe a sauniuni lau talanoa atu i tamaloloa, i fafine, ma talavou, o ē o le a outou fetaiai i o latou fale, po o le feiloai atu i ai i le auala. Ia sauniuni e faaali atu le auala e fesootai ai manatu o mekasini ma tagata taitoatasi, faapea foi ma aiga.

⁴ Ia Mataalia e Ofo atu Mekasini: E tatau ona avea le molimau atu i mekasini o se vala tāua i lau faasologa o le auaunaga i le fanua. O ā taimi e sili ona lelei mo oe e ofo atu ai mekasini? Pe ua e taumafai ea e galue mai lea fale i lea fale mo se itula pe sili atu foi i le afiafi, po o le afiafi po foi a o leʻi faia la outou Suesuega Tau Tusi a le Faapotopotoga? Ua sili ona fuatele mai le molimau atu i afiafi i nisi vaipanoa. O le Aso Toonai o se aso lelei lea mo le tufatufaina atu o mekasini i le tele o auala, ae e mafai foi ona faaaogā isi aso mo lenei lava galuega. O le galuega mai lea fale i lea fale, ma i faleoloa, e tatau ona avea o se vaega faifai pea o le Aso o Mekasini.

⁵ E tatau i tagata uma o loo tufatufaina atu mekasini, ona iai ni a latou lava ota masani mo lomiga taitasi o mekasini. Pe a tulai mai se tulaga ae o loo ia te oe ni lomiga tuai, e mafai ona faaaogā nei lomiga e faaali atu ai i tagata o aiga le eseese o mataupu ua talanoaina i mekasini. Mai lea taimi i lea taimi, e mafai ona tuuina atu se seti o mekasini tuai i fale o loo tausia ai tagata matutua, ma falemai foi pe a faatagaina. O na mekasini uma e mafai lava ona faitaulia i mekasini ua ofoina atu, ma e tatau foi ona lipotia i masina taitasi i lau pepa o le Lipoti mo le Auaunaga i le Fanua.

⁶ O le faatatauina o manatu ua taʻua i luga, e mautinoa o le a e iloa ai le faateleina o mekasini ua mafai ona e tufatufaina atu. O tagata loto faamaoni o ē ua faavaivaia i avega mamafa o le olaga i lenei faiga amioleaga o mea, ua latou talisapaia faamatalaga e faafouina ai e pei o ia e maua i Le Olomatamata ma le Awake! Ua saunia moni lava i nei mekasini meaai faaleagaga ua manaomia e i latou o ē o loo sailia le finagalo malie o Ieova. O lea la, ia mataalia e ofo atu mekasini, ma sailiili ni auala e faateleina ai le tufatufaina o nei lomiga tāua i lau oganuu.