Sauniuni mo Sauniga a le Faapotopotoga ma Olioli Ai
1 Ona o se aufaatasiga o uso, e masani ai ona tatou faapotopoto ma le atamai mo a tatou sauniga faalevaiaso. (1 Timo. 4:15, 16) E mafai faapefea ona tatou olioli ma maua ai aogā sili mai na sauniga?
2 E tatau ona faataatia ese pea se taimi e sauniuni ai mo sauniga. Atonu e sili atu le taimi e faaalu e nisi e sauniuni ai nai lo o isi. Ae peitai, e tusa lava po o le ā lo tatou pisi, ae o se faiga atamai le maua o se taimi e sauniuni ai mo sauniga. E mafai ona maua ai aogā ae maise lava pe a sauniuni faatasi o se aiga.—Efe. 5:15, 16.
3 Mo le Aʻoga o le Faiva Faatiokarate: Ia taumafai e pipii i le faasologa o le faitau Tusi Paia faalevaiaso. (Iosua 1:8) Ia autalu le mataupu lea o le a faaaofia ai, ma aumai lomiga talafeagai ina ia mafai ai ona e mulimuli i failauga. Mafaufau i ni auala e mafai ona e faaaogā ai nei faamatalaga i lau faiva.
4 Mo le Sauniga o le Auaunaga: Tagaʻi i le polokalame o loo faaauivi mai i La Tatou Faiva o le Malo. Faitau mataupu na o le a talanoaina. Afai o le a talanoaina se mataupu mai Le Olomatamata po o se isi lomiga, suʻe i le mataupu lena ma faitau i ai. Afai o le a faia ni faataʻitaʻiga o taulimaga i le faiva i le fanua, ia muai autalu nei manatu ina ia e nofo sauni ai e faaaogā i lau faiva.
5 Mo le Suesuega o Le Olomatamata: Ia faitau muamua le mataupu mo le suesuega, i le mātauina o tali i fesili. O le faitau foi i mau o loo taʻua ai o le a fesoasoani ia te oe e faatele ai lou malamalama i le mataupu. O le mafaufau loloto i le auala e fesootai lelei ai le mataupu o le suesuega ma mea ua uma ona e aʻoaʻoina, o le a faalauteleina ai lou iloa. Ia fuafua e faia sou sao i le suesuega e ala i le sauniunia o ni tali pupuu i se palakalafa se tasi pe lua. O se auala tāua lenei e ‘faalauiloa atu ai i le lautele lo tatou faamoemoe.’—Epe. 10:23.
6 Mo le Suesuega Tautusi a le Faapotopotoga: Ia tilofaia muamua le mataupu; manatunatu i le ulutala o le mataupu ma tamai ulutala. Ma a o faagasolo lau faitau, ia mātau manatu autū. Ia autalu mau o le Tusi Paia o loo lagolagoina ai le mataupu. Taumafai e tali fesili i au lava upu. Pe a uma ona sauniuni i le mataupu, ia toe autalu i lou mafaufau. Taumafai e manatua manatu tāua ma manatu e fesootai i ai.—2 Timo. 2:15.
7 Olioli i Sauniga: Ina ia olioli atoatoa i sauniga, e tāua la ona taunuu i le taimi tonu ina ia auai i le tatalo amata, e talosaga atu ai mo le agaga o Ieova. E mafai foi ona e maua aogā mai pese o le Malo e faafouina ai. Afai e leai sau fanau laiti po o se isi mafuaaga e tatau ai ona e nofo i le pito i tua o le maota, o le a faapena ona e iloaina, afai e te nofo i le pito i luma, o le a itiiti se faalavelave ma o le a e maua ai le tele o mea aogā mai le polokalame. O mātua e iai fanau laiti e ono ave i fafo i le taimi o le sauniga, e mafai ona faaitiitia le faalavelave pe a nonofo e latalata i le auala ia po o le pito i tua.
8 Taumafai e suʻe mau o loo faitauina. O le a fesoasoani lenei mea ia te oe e manatua ai mea o e faalogo i ai. O le talanoa i lou aiga ma uo e uiga i mea ua e aʻoaʻoina o le a tamau ai faamatalaga i lou mafaufau. O le faatatauina o nei fautuaga o le a sili atu ai ona uigā ma olioli i sauniga, ma o le a “taufaatupu moni ai ia [i tatou] le alofa ma galuega lelei.”—Epe. 10:24, 25.