Sauniuni mo le Galuega Mekasini ia Aperila

E pei ona mātauina i la tatou 1996 Calendar, o le Talisuaga Afiafi a le Alii i lenei tausaga o le a faamanatuina ia Aperila 2. Ona o le faalaeiauina i lea sauniga faapitoa, seʻi auai tagata uma i le tufatufaina atu ma le maelega o mekasini a o faagasolo Aperila. Maeu le talafeagai o nei mekasini o le a tatou faaaogaina! O Le Olomatamata o Aperila 1 o le a taulai atu i le lauga lautele o le tauaofiaga itumalo o le tausaga talu ai o lona matua “Vivii atu i le Tupu o le Vavau!” O Le Olomatamata o Aperila 15 o le a muliauloaina ai le matua o le lauga lautele faapitoa ia Aperila na teʻa nei, “Ua Lata le Iuga o Lotu Sese.” O le lauga faapitoa o lenei tausaga ia Aperila 21, “Tumau ona Lē Mataʻuleagaina Mai se Tupulaga Faapiopio,” e ao ona tuuina atu ai se malosi faaopoopo. O le a tatou faatomuaina le Ala Mai! o Aperila-Iuni i lona ulutala “Lo Tatou Paneta ua Faamataʻuina, pe e Mafai ona Faasaoina?”

Ina ia tuliloaina le faasalalauina faapitoa o le Tala o le Malo lea na faia ia Aperila talu ai, e ao foi la ona avea Aperila o lenei tausaga ma masina iloga i le tufatufaina atu o mekasini. O le taimi lenei e fai ai fuafuaga. E toatele o le a mananao e paeonia lagolago. Afai o manaomia, e tatau la ona oka ni lomiga faaopoopo o mekasini o Aperila. E mafai ona fai fuafuaga mo Aso Mekasini, faatasi ma i latou uma e mafai ona auai—i le taeao, aoauli, ma po o le afiafi. Seʻi avea i tatou uma ma “e anaana i le upu.” E pei ona valoia e faatatau i le Mesia i le Salamo 69:9, tau ina ia mafai foi ona tatou faapea atu: “Ua ʻaina lava aʻu i le manao tele i lou fale.”—Iako. 1:22; Ioa. 2:17.