Sauniuniga—Le Ki i le Taulau Manuia
1 O le muai sauniuni mo le faiva, o le a fesoasoani e manumalo ai i so o se faatalatū e ono lagona e se tasi e uiga i le faia o se sao i le auaunaga i le fanua. A o e faalatalata atu i fale, o le a e iloa ai po o le ā e manaomia ona e fai atu ai i ē ona fale. O le a leai se mea e te popole ai fua e uiga i ni tulaga faigata e te lua fetaiai. Pe a foi i le aiga mai le auaunaga, o le a e lagona le faalaeiauina, i le iloa na e faia se taumafaiga lelei i le faiva. Ioe, o sauniuniga maeʻaeʻa, o le ki lea i le faaleleia atili o o tatou tomai e talaʻi ma aʻoaʻo atu.
2 Sa faamamafa e Paulo le faia o sauniuniga e ala i le uunaia o i tatou ina ia ‘faaseevaeina o tatou vae i le sauniga o le tala lelei o le filemu.’ (Efe. 6:15) E aofia ai i lenei mea le saunia o o tatou mafaufau ma loto faapea ma le mauaina o se vaaiga mautinoa ma se uiga e fiafia e nofo sauni i taimi uma. Afai e saunia i tatou e tufa atu le upu moni i isi, o le a tauia la tatou galuega i fua o le Malo, e faafiafiaina ai i tatou.—Galu. 20:35.
3 Le Auala e Sauniuni ai mo le Galuega Talaʻi: E tatau ona tatou filifilia se taulimaga tatou te lagona ai le toafilemu, atonu e mai le tele o fautuaga o loo i le tamai tusi Le Auala e Amata ma Faaauau ai Talanoaga Faale-Tusi Paia po o na e i le itulau mulimuli o La Tatou Faiva o le Malo. Mafaufau lelei i le mau ua e fuafua e faaaogā, i le filifili po o ā upu po o fuaiupu e faamatilatila mai ai au manatu autū. E lē manaomia ona taumafai e tauloto le taulimaga; ae e sili ona lelei pe a maua le manatu i lou mafaufau, faaupu i au lava upu, ma faamatala atu i se uiga e te manatu ua talafeagai ma lē o faalogologo mai ia te oe.
4 Ia tilofaia le lomiga ua e manatu e ofo ma filifili ni manatu faaoso naunau e talanoa i ai. Filifili se manatu e te lagona o le a faaosofia ai le naunau o tagata i lau oganuu. Manatunatu i le auala e mafai ona fetuutuunai ai au taulimaga mo tagata eseese e ona fale—se tamaloa, se fafine, se tagata matua, po o se talavou.
5 Pe ua e taumafai ea e fai ni au faataʻitaʻiga? Faapotopoto faatasi ma tagata o le aiga po o isi tagata talaʻi e talatalanoa po o ā taulimaga e ono aogā, ona fai lea o se faataʻitaʻiga leotele ina ia mafai ai e tagata uma ona manatua lelei. Taumafai e faaaogā ni tulaga moni o le olaga, ma ni teteega e mafai ona faafetaiaia i le oganuu. O faaaoaoga faapena o le a faaleleia ai le sologa lelei o lau tautala, faateleina lou tomai i le talaʻiga ma atiina aʻe ai lou mautinoa.
6 E lē gata i le faia o sauniuniga ma faataʻitaʻi au taulimaga, ae tatau foi ona e fesili ifo ia te oe lava, ‘Pe e talafeagai ma le faiva, ofu ia ua ou fuafua e ofuina? Po o iai mea ou te manaomia i laʻu ato tusi, e aofia ai ma lomiga ia ua ou fuafua e faaaogā? Po o i se tulaga lelei? Po o iai laʻu tusi Reasoning, sāvali, pepa faamaumau o le talaʻiga mai lea fale i lea fale, ma se penitala?’ O le sauniuni mamao ma le magafagafa o le a saosaolaumea i se aso e sili ona fuatele mai i le auaunaga.
7 Pe a uma ona tatou faia o le mea aupito sili tatou te mafaia mo le sauniunia o i tatou lava, e tatau ona tatou tatalo mo le agaga o Ieova e fesoasoani ia i tatou ina ia taulau manuia. (1 Ioa. 5:14, 15) O le uaʻi atu ma le faaeteete i le sauniuniga, o le a iu i lo tatou maua ai o le olioli tele i la tatou galuega, a o tatou ‘faataunuuina atoatoa la tatou faiva.’—2 Timo. 4:5.