Ia Faia le Auaunaga Paia i le Ao ma le Po
1 E iai se faaeaga uigaese ua faasalafa mai ia i tatou. O le avea lea ma molimau a Ieova. O i tatou o sui o le faalapotopotoga o le au faievagelia i le lalolagi aoao ua faaaogaina e Ieova e faataunuuina le galuega aupito sili ua faia, o le folafolaina lea o le Malo! (Mare. 13:10) I le manatu atu i le faanatinati o o tatou taimi, po o faia atoatoa ai ea so tatou sao i lenei galuega i le tele e mafai ai?
2 Tatou te lē iloa pe toafia o le a tali mai i la tatou talaʻiga. Ua faamautinoa mai i tatou e Ieova e faapea, o le a avea o se “motu o tagata e toatele,” i latou uma ua faailoaina mai e ala i lo latou “auauna foi ia te ia . . . i le ao ma le po.” (Faaa. 7:9, 15) O le sili atu i le lima miliona Molimau o ē o loo pisi i le auaunaga a le Atua, e lē na o ni ē e fiafia e faalogologo, pe na o ni ē e auai i sauniga. O i latou o se aufaigaluega o loo folafola atu le tala lelei i le lalolagi aoao!
3 I aso uma lava, e iai pea avanoa e vivii atu ai ia Ieova, a lē i le auaunaga i le fanua, ia pe i ni tulaga lē fuafuaina. Seʻi manatu i le molimau sili e ono mafai ona faia pe afai e tausolomua i tatou taitoatasi e tufa atu le upu moni i le tau lava o se tagata e toatasi i aso taitasi. O lo tatou talisapaia o Ieova e ao ona uunaia ai i tatou e tautala ma le aasa e uiga ia te ia.—Sala. 92:1, 2.
4 Fesoasoani i Isi ia Faia le Auaunaga Paia: O loo faaauau pea ona faamanuia i tatou e Ieova i faatelega. (Ha. 2:7) I le faagasologa o le tausaga faaleauaunaga ua tuanai atu i atunuu o loo i lalo o le vaaiga a le lālā a Samoa i Sisifo i le tausaga ua mavae, na ausia ai se faatatauga e 738 suesuega faale-Tusi Paia i aiga na faia i masina taitasi. O lo tatou sini mo le faia o suesuega ma nei tagata, o le fia fesoasoani lea ia i latou ia avea ma soo o Iesu. (Mata. 28:19, 20) O le toatele o i latou ua lelei lava lo latou agaigai i luma e ala i le auai e lē aunoa i sauniga. Ua amata ona latou talanoa atu i ē latou te masani ai e uiga “i mea ofoofogia a le Atua” na latou aʻoaʻoina. (Galu. 2:11, NW) Pe e mafai nei ona valaaulia i latou ia faia se sao i le faiva i le lautele?
5 Ia Aperila, e tatau ona tatou faia ai se taumafaiga faapitoa e valaaulia i latou o ē fou ua agavaa, e aufaatasi ma i tatou i le auaunaga i le fanua. Po ua faaalia ea e lau tagata aʻoga se faanaunauga e faia lenei mea? Afai o lea, po ua ia ausia mea manaomia faale-Tusi Paia? (Tagai i le tusi Our Ministry itulau e 97-99.) Pe afai ua manao le tagata aʻoga e auai i le auaunaga i le fanua, ia talanoa ona tulaga ma le ovasia taʻimua, o lē na te fuafuaina mo ni toeaina se toalua e iloiloina le mataupu. Afai ua agavaa le tagata aʻoga e talia e avea ma se tagata talaʻi e lei papatisoina, ia valaaulia loa o ia lua te ō faatasi i le faiva i le fanua. E ao faapitoa lava i le ovasia o le auaunaga ma le fai suesuega o suesuega tautusi ona mataalia e fesoasoani atu ia i latou o ē atonu ua agavaa e amata ona talaʻi ia Aperila.
6 E ao i mātua ona manatunatu po ua agavaa a latou fanau e avea ma tagata talaʻi e lei papatisoina. (Sala. 148:12, 13) Afai ua naunau lau tama e faia sona sao i le auaunaga o le Malo ma o loo amio lelei, e mafai ona e faafeiloaia se tasi o toeaina o le komiti o le auaunaga e talanoaina lea tulaga. Pe a uma ona outou feiloai faatasi ma le tamaitiiti, ona filifili lea o toeaina e toalua po ua agavaa o ia e faitaulia o se tagata talaʻi. E iai se mafuaaga faapitoa e olioli ai pe a aufaatasi fanau ma i tatou e vivii atu i le Atua!
7 E na o Ieova lava e tatau i ai la tatou auaunaga paia. (Luka 4:8) Tau ina ia tatou taitoatasi ma faaaogā lelei lo tatou faaeaga ofoofogia e “matuā” vivii atu ai ia te ia.—Sala. 109:30; 113:3.