Ua Suia Tulaga o Taimi

¹ Ua faailoa mai e le Tusi Paia ia i tatou e faapea ‘ua suia le tu o le lalolagi nei.’ (1 Kori. 7:31) Maeu le moni o lena mea i aso nei! E oo lava i taimi o loo tatou ola ai, ua tatou vaaia ai ni suiga matautia, i manatu ma amioga a tagata i so o se tulaga o le olaga faaletagata. Afai tatou te mananao ia taulau manuia i le mauaina o na tagata ina ia faalogo mai i le feau o le Malo, e tatau la ona talafeagai a tatou taulimaga ma suiga o taimi. Tatou te mananao e taulimaina le tala lelei i se auala e naunau mai ai tagata ma pāʻia ai o latou loto.

² I tausaga ua mavae, sa ese ai le galuega o le molimau atu i le tele o atunuu, ona o le toatele lava o tagata, sa ola i ni olaga e sili ona toafilemu, ma sa latou lagona ai le saogalemu. Sa avea le lotu o se mea e paia i o latou olaga. Sa sili ona tāua le Tusi Paia i o latou manatu. I na aso, o le molimau atu sa masani ona aafia ai ni finauga i mataupu tau talitonuga. I aso nei, ua fesouaiina olaga o tagata. Ua tauemua lotu ma ua lē faatuatua ai isi i le Tusi Paia.

³ Na mātauina e se tasi ovasia faimalaga e faapea: “I le taimi nei, e foliga mai, ua matuā tele naua faafitauli ma mea faigata i olaga o tagata, ua tatau ai ona tatou aʻoaʻoina i latou i auala e ola ai.” O popolega o tagata i aso nei, e masani ona faaautū ia i latou lava, i o latou aiga, ma i o latou lava faafitauli. O mea na e tele lava ina latou talatalanoa i ai pe a latou faapotopoto faatasi. E manaomia ona tatou manatua mea na i la tatou galuega o le molimau atu.

⁴ O le Malo o le Atua ua na o Lea le Faamoemoe Mautinoa mo le Lumanai: E toatele tagata ua lē mautonu i pulega a malo faaletagata. Ua latou lagona e leai se faamoemoe faapea e mafai ona latou vaai i se lalolagi e sili atu ona lelei i o latou olaga. Ua lē taulau ona avatu e lotu sese ia te i latou se faavae mo lea faamoemoe. O le pogai lena ua matuā mananao ai tagata e fia faalogologo i le tala lelei o le Malo o le Atua. Ia faailoa atu po o le a faapefea ona foia atoatoa e le Malo i se taimi mulimuli ane faafitauli uma o loo fesagai ma tagata.

⁵ O le Tusi Paia ua na o Lea le Puna e Maufaatuatuaina o Taʻiala: I aso nei, e anoanoai tagata ua taʻitaʻiseseina e taʻitaʻi o ē faatuatua i le atamai faaletagata ma filosofia faalelalolagi. Ua tatau ona iloa e tagata e faapea, “e le o i le tagata e savali ona faatonuina le mea e ui ai o ia.” (Iere. 10:23) O le lesona aupito tāua e mafai ona latou aʻoaʻoina e faapea, e tatau ona latou ‘⁠faatuatua ia Ieova ma o latou loto atoa, ae aua le faalagolago i lo latou lava atamai.’ (Faata. 3:5) A o suia taimi, ae lē mafai ona suia ai le Tusi Paia. O lea, i la tatou faiva, e tatau lava ona tatou faatomua pea le Afioga a le Atua, e aʻoaʻo ai isi ia talisapaia le taʻitaʻiga ua faagaeeina e le Atua o loo iai. (2 Timo. 3:16, 17) Ina ia faataunuuina lena fuafuaga, e tatau ona tatou faatāuaina pea le Tusi Paia i manatu o tagata e ala i le faasino i ai pe a fai a tatou taulimaga, faaaogā e tali ai a latou fesili, ma lagolagoina ai le manaoga ina ia suesue i ai ma faatinoina le atamai aogā o loo iai.

⁶ E oo lava foi i suiga o tulaga o taimi i aso nei, ae e tumau pea lava o tatou sini i le faiva. E tatau ona tatou talaʻi atu le tala lelei o le Malo, atiina aʻe le faatuatua i le Afioga a le Atua, ma fesoasoani i isi ia iloa le tāua o lo latou suesueina o le Tusi Paia ma i tatou. O mea o tatou fai atu ai e tatau ona talafeagai ma manaoga i le taimi nei o i latou o tatou molimau atu i ai. O le faia o lenei mea, e mafai ai ona avea i tatou o ni ē tufa atu le tala lelei i isi ma atili ai ona maua le toatele o tagata.—1 Kori. 9:19, 23.