Fesoasoani ia i Latou ia Toe Auauna
1 I le iloaina e iai se lamatiaga faaleagaga e ono oo i ona uso Kerisiano, na tusi atu ai le aposetolo o Paulo: “Ua oo i le itu po e ala ai e na momoe; auā ua latalata nei ia te i tatou le ola, sa mamao ina o tatou uluai faatuatua.” (Roma 13:11) Sa manatu mamafa Paulo i ona uso o ē na tulemomoe faaleagaga; sa naunau o ia ina ia toe faaolaolaina i latou i ni gaoioiga e toe faafouina ai.
2 Ua mafai ona faapea moni atu ai ua tuneva le po o lenei lalolagi tuai, ma ua tafa mai ata o le lalolagi fou. (Roma 13:12) E iai se mafuaaga lelei e tatau ai ona tatou popole i o tatou uso o ē ua lē toe auaufaatasi ma i tatou o ni tagata talaʻi o le tala lelei. I le tausaga faaleauaunaga ua mavae i Samoa, e toʻa 18 le autalaʻi na faalaeiauina ina ia toe talaʻi. E mafai la faapefea ona tatou fesoasoani i isi ua lē toe talaʻi ina ia toe auauna ia Ieova?
3 Le Mea e Mafai Ona Faia e Toeaina: O le toatele o i latou ua lē toe talaʻi, latou te lei tuulafoaiina le upu moni; ua na ona latou lē toe talaʻi atonu pe ona o ni mea na faalotovaivaia ai, ni faafitauli totino, le matapeapea i meafaitino, po o isi lava popolega o le olaga. (Luka 21:34-36) Afai e mafai, e sili atu ona lelei le fesoasoani ia i latou a o lei oo ina avea ma nisi ua lē toe talaʻi. E tatau i le failautusi o le faapotopotoga ona faailoa atu i le faisuesuega o le Suesuega Tautusi a le Faapotopotoga pe a oo ina lē tuuina mai e lē aunoa e se tagata talaʻi le lipoti o lana galuega i le auaunaga. E mafai loa ona fai ni fuafuaga mo se asiasiga faaleoleo mamoe. E tatau ona latou taumafai e tulimataʻi le mafuaaga autū o le faafitauli ma le auala e mafai ona tuuina atu ai se fesoasoani.—Tagai i Le Olomatamata o Setema 15, 1993, itulau e 20-23.
4 Le Auala e Mafai Ona Fesoasoani ai Isi: O le toatele o i tatou, o loo iloa se tagata ua lē toe talaʻi. Atonu o se tagata sa sili ona pipii mai ia i tatou i aso ua mavae. O le ā se mea e mafai ona tatou faia e fesoasoani ai? Aisea e lē afe ai i ai mo sina asiasiga puupuu? Fai i ai ua e misia lava ia. Ia e uiga fiafia ma ia e uiga mautinoa. Ia faaalia lou manatu mamafa e aunoa ma le faailoa atu i ai e faapea o ia ua maʻi faaleagaga. Faamatala i ai ni mea na tutupu e atiina aʻe ai po o nisi mea lelei ua faatinoina e le faapotopotoga. Ia faailoa i ai ma le aasa e uiga i le Tauaofiaga Itumalo o loo fotuai mai o “Avefeau o le Filemu Mai le Atua,” ma faalaeiau o ia ina ia auai. O le toe auaufaatasi ma le faapotopotoga atonu e sili atu ona fesoasoani ia te ia nai lo se isi lava mea. Ofo i ai e mafai ona e alu atu lua te ō faatasi i sauniga. Ia faailoa i toeaina le tali na fai mai ia te oe.
5 Pe a toe sau i sauniga le tagata lea ua lē toe talaʻi, atonu o le a oo ia te ia se lagona faalēlelei pe a feiloai ma isi tagata sa ia iloaina i aso ua mavae. Aua neʻi e fesili atu, “O fea lava na e iai?” Nai lo lena, ia faatoafilemu ma talileleia o ia. Ia faaaofia o ia i talanoaga. Ia faafeiloai atu o ia ia i latou na te lei iloaina. Ia nonofo faatasi ma ia i le taimi o le sauniga, ia faamautinoa ua iai sana tusi pese ma le lomiga lea e suesue. Faamalosiau i ai e toe sau, ma ofo i ai lau fesoasoani pe afai e manaomia.
6 O le iai o le alofa māfana mo i latou ua sē ese, e olioli ai Ieova ma Iesu pe a toe malolosi faaleagaga i latou na. (Mala. 3:7; Mata. 18:12-14) E oo foi ia i tatou lena olioli pe afai tatou te taulau i le fesoasoani atu i isi e toe auauna ia Ieova.