Aua Neʻi Faagaloina i Latou ua Lē o Toe Talaʻi
1. Aiseā e ao ai ona tatou taumafai e faalaeiau atu iā i latou ua lē o toe talaʻi?
1 Pe e te masani i se isi ua lē o toe talaʻi? Atonu ua ia lē toe faatasitasi ma le faapotopotoga ma ua tafetafea ese atu. Atonu na e tau i lea tagata a o e talaʻi i le fale i le fale. E ao ona tatou manatua o loo avea pea lenei tagata ma o tatou uso faaleagaga. E tatou te mananaʻo e faamautinoa atu lo tatou alofa iā te ia, ma fesoasoani i ai e toe foʻi mai i le faapotopotoga ma i ‘Lē na te leoleoina ma tausia o tatou agaga’—1 Pete. 2:25.
2. E faapefea ona tatou faalaeiau atu i se isi ua lē o toe talaʻi?
2 Faailoa Atu Lou Naunau: O se talanoaga puupuu i le telefoni pe asiasi atu i lē ua lē o toe talaʻi, e faamautinoa atu ai iā te ia e tatou te lē o faagaloina o ia. O le ā sa tatou tala e fai atu? Atonu e avea i tatou ma faalaeiau i le tau lava ina faailoa i le tagata o loo tatou manatunatu pea iā te ia. Ia logo lelei ma ia ati aʻe le talanoaga. (Fili. 4:8) Tatou te ono taʻu i ai se manatu o se lauga na tatou fiafia ai i se sauniga talu ai nei. E tatou te ono valaaulia foʻi o ia i se sauniga po o se fonotaga o lata mai, ma ofo atu o le a e taofia se nofoa mo ia pe saunia foʻi se auala e faimalaga mai ai.
3. Na faapefea ona toe auai i sauniga ma talaʻiga se tasi tuafafine?
3 Na toe maua se fesootaʻiga i le oganuu ma se tuafafine ua silia ma le 20 tausaga ua lē o toe talaʻi. E ui lava e leʻi manaʻo e talia se suʻesuʻega faale-Tusi Paia, na toe asia o ia e le tuafafine na tau i ai, ma tuu i ai ni mekasini fou. Ina ua uma se tauaofiaga itumalo, na faamatala atu e le tagata talaʻi i le tuafafine ua lē o toe talaʻi ni manatu tāua o le fono, ma na iʻu ai ina toe auai i sauniga ma talaʻiga.
4. O ā o tatou uiga e faaali atu i se isi ua toe faatasi mai i le faapotopotoga ma auai i sauniga?
4 Pe a Toe Foʻi Mai se Isi: O ā o tatou uiga e faaali atu i se uso na lē toe talaʻi ae ua amata ona toe auai mai i sauniga? O ā uiga o Iesu na faaali atu i ona soo ina ua latou tuulafoaʻia o ia mo sina taimi? Na ia faasino atu ma le māfana ma taʻua i latou o ona “uso” ma faailoa atu lona faatuatuaina o i latou. Na ia tuuina atu iā i latou se galuega tāua e fai. (Mata. 28:10, 18, 19) E leʻi umi, ae latou pisi loa e talaʻi le tala lelei ma le “lē mapu.”—Galu. 5:42.
5. Taʻu mai ni tulaga e ao ona tatou talanoa atu ai i toeaina e faatatau i se tasi ua lē o toe talaʻi.
5 A o leʻi ofo atu e te lua suʻesuʻe ma se isi sa lē toe talaʻi, ia pe a o leʻi valaauliaina foʻi o ia i le galuega talaʻi, e tatau ona tatou fesiligia taʻiala mai i toeaina. Pe a tatou tau i se isi ua lē o toe talaʻi i le oganuu, e tatau ona tatou logoina toeaina ina ia mafai ona latou fesoasoani atu.
6. O le ā le fiafiaga o le a tatou maua pe a fesoasoani iā i latou ua lē o toe talaʻi?
6 E pei ona faaali manino mai e le Tusi Paia, ua na o i latou e taufetuli e tau i le tini e maua le faaolataga. (Mata. 24:13) O lea la, ia mātau i latou ua tafetafea ese atu. Pe a tatou onosai e faaali le alofa o Ieova e ala i le naunau i isi ua lē o toe talaʻi, tatou te ono fiafia ai i le vaai atu ua toe faaauau la latou auaunaga paia faatasi ma i tatou.—Luka 15:4-10.