Pusa Fesili

◼ E ao faapefea ona tusia le numera o le telefoni a Molimau a Ieova i le tusi taʻiala mo telefoni a se atunuu?

Ua mātauina, e matuā eseese lava le tele o auala o loo tusia ai numera o telefoni a Molimau a Ieova i lisi o tusi taʻiala mo telefoni a le atunuu atoa. O nisi numera e matuā fenuminumiai lava, ma o isi e lē lava ni faamatalaga o iai. Afai e iai se telefoni a le faapotopotoga i le Maota o le Malo, e tāua tele le iai o ni faamatalaga e faailoa ai i le tusi taʻiala mo telefoni, ina ia mafai ai e tagata loto fiafia ma o tatou uso ona faafesootai atu la outou faapotopotoga.

Ua fautuaina le iai o faamatalaga ia o loo mulimuli mai: Molimau a Ieova, (Aai), ona sosoo ai lea ma le tuatusi o le nofoaga o loo iai le Maota o le Malo ma le numera o le telefoni.

I aai e sili atu i le tasi le faapotopotoga e iai, matou te fautuaina ina ia faia faapenei: Molimau a Ieova, (Aai), ona sosoo ai lea ma le tusia o igoa i se lisi e faasolo i mataitusi o le alafapeti, tuatusi o le Maota o le Malo, ma le numera o telefoni a faapotopotoga taitasi.

E mafai lava ona filifili le faapotopotoga ia pe toe manaomia se numera o se isi telefoni. Afai e iai se isi faapotopotoga mai se isi aai e lē o aofia ai i le lisi i le tusi telefoni a le tou aai, ae o loo latou faaaogaina le Maota o le Malo lava lea e tasi, e tatau la ona tusia ai ma le igoa o le aai lena i le tuatusi o le Maota o le Malo ma le numera o le telefoni.