Faataunuuina o La Tatou Tautoga i Lea Aso ma Lea Aso
1 Na uunaia le faisalamo o Tavita e folafola atu ia Ieova e faapea: “Ona ou fai pesega ai lea i lou suafa e faavavau, ina ia ou avatua i lea aso ma lea aso o mea na ou tauto ai.” (Sala. 61:8) Sa iloa e Tavita e faapea, o le faia o se tautoga, o se mataupu o le ofoina atu ma le loto malie o se mea e le tagata lava ia. Ae peitai, sa ia ioe atoatoa foi e faapea, afai na te faia se tautoga, o se matafaioi mo ia le faataunuuina o lea tautoga. (Fai. 5:4-6) E ui i lea, sa vivii o ia ia Ieova ona o le avanoa e faataunuu ai ana tautoga i lea aso ma lea aso.
2 Ina ua faia lo tatou tuuina atu ia Ieova, sa tatou tauto atu ma le loto malie e faia lona finagalo. Ua lē toe pule ai i tatou ia i tatou lava, ma faia ai le auaunaga ia Ieova o se galuega e faamuamua i o tatou olaga. (Luka 9:23) I lea, e tatau ai foi ia i tatou ona faataunuuina a tatou tautoga i lea aso ma lea aso. (Mata. 5:37) O la tatou tautinoga na faia i le lautele i le taimi o lo tatou papatisoga i le vai, e tatau ona atagia atu i ala uma o lo tatou olaga atoa, talu ai ua tatou iloa “o le gutu e taʻutino ai, e oo mai ai le ola.” (Roma 10:10) E aofia ai i lenei mea le talaʻiina o le tala lelei. (Epe. 13:15) E matuā eseese lava tulaga o tagata taitoatasi, ae mafai e i tatou uma lava i lea aso ma lea aso ona taulai faapitoa atu manatu i le tāua o le faailoaina atu o le tala lelei i isi.
3 Fai ni Avanoa e Talaʻi Atu ai i Lea Aso ma Lea Aso: O le talanoa ma se isi tagata i le tala lelei, o se mea e olioli ai. Ina ia faia lenei mea i lea aso ma lea aso, e tatau ona tatou faia ni avanoa e talaʻi atu ai i so o se taimi e talafeagai ma o tatou tulaga. E tele lava mea fiafia na olioli ai i latou o ē na tausolomua ona faia se molimau lē fuafuaina i tagata i le galuega, po o le aʻoga, i tuaoi po o isi foi latou te feiloai i aso taitasi. E oo foi i le tusia o ni tusi po o le faaaogaina o le telefoni, e mafai ona avea o se auala e molimau atu ai i isi. O nei auala uma faapea ma le faataatia ese e lē aunoa o se taimi e molimau atu ai mai lea fale i lea fale ma faia toe asiga e mafai ona iu i se olioli faapitoa mai le faia o se suesuega faale-Tusi Paia i le aiga. Ioe, i aso taitasi, atonu e mafai ona tatou faia ai ni avanoa e talaʻi ai.
4 Sa amata e se tuafafine ona faitauina le tusi Iloiloina le Tusi Paia i Aso Taitasi i le taimi e mālōlō ai i lana galuega. Sa ia valaaulia se tagata la te faigaluega faatasi, e la te faitauina faatasi le mau o le aso, ma o lena mea, sa lei pine ae iu ai i le faia o se suesuega faale-Tusi Paia ma le fafine. Sa la suesue mo le ʻafa itula i aso taitasi mo le lima aso o le vaiaso. Sa mātauina e se isi tagata latou te faigaluega faatasi le la suesuega i aso taitasi. Na iu lava ina ia faailoa atu o ia e faapea, o se uso ua lē toe talaʻi. I le uunaia ona o le maelega o le tuafafine, sa ia faafesootaia ai loa se toeaina ina ia mafai ai ona toe talaʻi. Na mafai e lenei tuafafine ona taaʻina nisi tagata se toalua i le tulaga mautinoa ona o le tausisi i le faataunuuina o lana tautoga i lea aso ma lea aso.
5 Pe a uunaia i tatou e se loto ua tumu i le talisapaia mo mea lelei uma ua faia e Ieova mo i tatou, o le faataunuuina la o la tatou tautoga o le tuuina atu i le faia o le mea aupito sili ona lelei tatou te mafaia i aso taitasi, o le a aumaia ai ia i tatou le olioli ma le loto malie. I le pei o le faisalamo, e mafai ona tatou folafola atu e faapea: “Le Alii e, loʻu Atua, ou te vivii atu ia te oe i loʻu loto atoa; ou te faaneenee atu lava i lou suafa e faavavau.”—Sala. 86:12.