Faasalalauina o le Tala Lelei e Uiga i se Mea e Sili Ona Lelei

¹ Ua 117 tausaga talu ona tautua pea Le Olomatamata mo le puipuia upu moni o le Tusi Paia. I le taimi nei, e 18,950,000 kopi o lomiga taitasi ua lomia i gagana e 125. Ua loa foi ona lagolagoina e le Ala Mai! le Afioga a le Atua, ma e 15,730,000 kopi ua faasalalauina atu nei i gagana e 80 i le lalolagi aoao.—Faatusatusa i le Kolose 1:23.

² E Faamalieina e Mekasini se Manaoga Faaleagaga: E faitau miliona tagata loto faamaoni ua latou maua aogā mai Le Olomatamata ma le Ala Mai! e ala i le fesoasoani ia i latou e faamalieina o latou manaoga faaleagaga. O loo lomia ai mataupu e atiaʻe ai le faatuatua. Mo se faaaoaoga, i Le Olomatamata o Fepuari 1, 1996, na tatou suesueina ai mataupu e faatatau i le manaoga ia faatuatua ia Ieova ma lana Afioga. O le lomiga o Le Olomatamata o Mati 1, 1996, ua faalaeiauina ai i tatou ina ia tele mea e fai i le auaunaga ia Ieova ma ia faatalitali pea ia te ia. Maeu le faagaeeina o le talanoaina auiliili o le valoaga a Sefanaia! Ona sosoo ai lea ma le talanoaga e faamalosia ai le faatuatua o le faamaoni faa-Kerisiano i Le Olomatamata o Mati 15, 1996. O le lomiga o Me 15, 1996, na faamamafaina ai le tautele o le faitauina ma le suesueina e lē aunoa o le Afioga a le Atua. Ua tautua nei mataupu e faalolotoina lo tatou malamalamaga i le Afioga a le Atua, ma ua faateleina ai lo tatou talisapaia e uiga i lona Malo.

³ E lē gata i lea, o loo iai foi i nei mekasini mataupu talafeagai ma aogā o le amioatua, amioga mamā faa-Kerisiano, ma isi mataupu e sili atu ona tāua. O nei mekasini ua matuā feutagai lelei lava ma mataupu moni o loo aafia ai o tatou olaga. O le iuga, ua tatou olioli ai i se uiga anagata o le olaga i le taimi nei, a o tatou faatalitali atu i le faataunuuga o folafolaga a le Atua i se mea e sili atu ona lelei i le lumanai.—Isa. 48:17; 1 Timo. 6:19.

⁴ O se autaluga puupuu o mea o taʻua i le itulau e 4 o lomiga taitasi o le Ala Mai! ua aumaia ai ia i tatou se mafuaaga autū mo le faailoaina atu o lenei mekasini o se lomiga e faitauina e aupito sili ona lelei mo tagata i so o se vaipanoa, o ē matutua ma ē talavou. O loo faapea mai i lena itulau: “O le Ala Mai! e mo le faamalamalamaina ai o le aiga atoa. O loo faaalia ai le auala e gafa ai ma faafitauli i aso nei. O loo lipotia mai ai tala fou, ua aumaia ai tala e faatatau i tagata i le tele o atunuu, ua iloiloina ai tulaga o lotu ma le faasaienisi. Peitai na te faia foi le tele o isi mea. Ua matuā sailiili i le aano moni ma faasino atu i le uiga moni o i tua o mea o loo tutupu, ae peitai e tausisia pea lona solitu i faiga faapolotiki ma e lē faasilisilia se tasi ituaiga o tagata mai isi ituaiga. Ae e sili ona tāua, ua atiina aʻe e lenei mekasini le faatuatua i le folafolaga a Lē na Foafoaina Mea e uiga i se lalolagi fou filemu ma saogalemu lea ua toe o se aga ona suia ai lea o le faiga o mea amio leaga ma le solitulafono o loo iai nei.”

⁵ Tufa Atu Mekasini i Isi: Ia limafoai i le tufaina atu o Le Olomatamata ma le Ala Mai! (Faatusatusa i le 1 Timoteo 6:18.) Ia iai pea ni kopi ina ia mafai ona e ofoina atu i latou i so o se tagata e te lua feiloai. (Fai. 11:6) E mafai e i tatou uma lava e aofia ai tagata talaʻi talavou ma ē fou, ona faia se sao atoatoa i le tufatufaina atu o mekasini i lenei masina i le faaaogaina o taulimaga pupuu e faavae i mataupu talafeagai o loo faatomuaina i lomiga fou. Ia faamasani lelei i mataupu o loo iai, ma ia faamaoni ma mautinoa i le ofoina atu.

⁶ O loo iai i Le Olomatamata ma le Ala Mai! faamatalaga e manaomia e tagata uma lava. O le tufatufaina atu o mekasini, o se tasi lea o auala e aupito sili ona lelei e mafai ai ona tatou fesoasoani atu i isi ia iloa le tala lelei e faapea e iai se mea e sili atu ona lelei ua toeitiiti ona oo mai lea!