“Ia Ati ae Lou Aiga”
1 Ma le manino lava, i aganuu uma i le lalolagi aoao, ua faaletonu ai olaga faaleaiga. Ua matuā naunau le lalolagi a Satani i le taufaasese ma amioga lē mamā. (1 Ioa. 5:19) O lenei mea ua matuā faamatilatila mai ai ia i tatou ina ia faanatinati ona ‘ati ae o tatou aiga’ ma ia aʻoaʻo isi i le auala e mafai ai ona latou faia faapea mo o latou aiga.—Faata. 24:3, 27.
2 O Mataupu Silisili o le Tusi Paia o se Puipuiga Malu: O le auala i le fiafiaga moni o le aiga, e maua i le faatatauina o mataupu silisili o le Tusi Paia. O nei upu moni mamana, e aogā mo tagata uma o le aiga i vala uma o le olaga. O le aiga latou te faatatauina na mataupu silisili, o le a fiafia ma o le a olioli i le filemu mai le Atua.—Faatusatusa i le Isaia 32:17, 18.
3 O mataupu silisili e mafai ona fesoasoani ia i tatou i le atiina ae o o tatou aiga, o loo faaauivi mai i ni faamatalaga lē feʻalofai i le tusi fou o Le Ala e Maua ai le Fiafia i le Aiga. O loo faaiu mataupu taitasi i se pusa o faamatalaga o aʻoaʻoga aogā o loo faamamafa mai ai mataupu silisili e manaomia ona manatua e tagata o le aiga. O le tele o nei pusa, e amata lava i le fesili lenei, “E mafai faapefea e nei mataupu silisili faale-Tusi Paia ona fesoasoani . . . ?” O lenei fesili o le a tataʻi atu ai manatu i manatu o le Atua ina ia tatou iloa ai lona finagalo i le mataupu o loo talanoaina.—Isa. 48:17.
4 Ia faamasani i le tusi. Ia aʻoaʻo e suʻe i mataupu silisili e mafai ona fesoasoani pe a mapuna aʻe ni faafitauli eseese. O loo talanoaina i le tusi mataupu eseese e pei o nei: o le ā e tatau ona vaavaai i ai se tasi pe a mafaufau e sailia se paaga e faaipoipo i ai i le lumanai (mataupu 2), o ā ni vala tāua o le a fesoasoani i le faatumauina o se faaipoipoga fiafia (mataupu 3), le auala e tausia ai e mātua a latou fanau talavou ina ia mafai ona faamoemoeina i tiute tauave, i le avea o ni tagata matutua e matataʻu i le Atua (mataupu 6), le auala e puipuia ai le aiga mai taaʻiga e faaleagaina ai (mataupu 8), o mataupu silisili e fesoasoani i aiga e toatasi le matua ina ia taulau manuia (mataupu 9), o fesoasoani faaleagaga mo aiga o loo faalavelavea i le ʻava malosi ma faiga sauā (mataupu 12), o le ā le mea e fai pe a oo faiā tau faaipoipoga i se tulaga e malepe ai (mataupu 13), o le ā e mafai ona fai e āva ai i mātua ua matutua (mataupu 15), ma le auala e mauaina ai se lumanai tumau o le aiga o se tasi (mataupu 16).
5 Ia Faaaogā Lelei le Tusi Fou: Afai e te lei faia faapea, aisea e lē suesue faatasi ai o se aiga le tusi, Fiafia i le Aiga? I so o se taimi foi e fetaiai ai lou aiga ma ni faafitauli fou po o ni tulaga faigata, ia autalu mataupu i le tusi o loo feagai ma nei mea, ma ia manatunatu i ai faatasi ma le tatalo i le auala e faatatauina ai le fautuaga. E lē gata i lea, ia Mati, ia faaalia le loto foai i le faia o se faasologa o taimi mo le faiva i le fanua ina ia mafai ai ona faia ni au taumafaiga e tufa atu le tusi o Le Ala e Maua ai le Fiafia i le Aiga i le toatele o tagata e mafai ona oo atu i ai.
6 O aiga e latou te faatinoina le tuutoina i le Atua o le a faamalosia faaleagaga, autasi ma o le a lava saunia e faafetaiaia osofaiga a Satani. (1 Timo. 4:7, 8; 1 Pete. 5:8, 9) Maeu lo tatou loto faafetai ona ua tatou maua se faatonuga tauatua mai Lē na Amataina le aiga!