Fesoasoani i Aiga Ina ia Mauaina se Lumanai Tumau
1 Na taʻu atu e se tagata e galue i mataupu tau tupe i se vasega na faauu i se kolisi e faapea: “E aogā le matapeapea,” ma faaopoopo atu e faapea: “E mafai ona e matapeapea ma tumau pea ona maua ni faalogona lelei e uiga ia te oe lava.” O se tulaga masani lena o le auala o loo tuuina atu ai e le lalolagi le faamuamua o manaoga o le tagata lava ia e faapea, o le auala lea e faamautinoa ai le lumanai o se tasi. I se faaeseesega matuā manino lava, na aʻoaʻo ai e Iesu e faapea, e tatau i se Kerisiano ona “ia faafiti o ia ia te ia. . . . Auā se a le aoga i le tagata pe afai na te maua le lalolagi uma, a e māumau lona ola?” (Mata. 16:24-26) Ina ia malupuipuia se lumanai tumau, e tatau i se tagata ona faaautū lona olaga atoa i le faia o le finagalo o le Atua—o le sini aupito sili lea ona tāua mo aiga i aso nei. (Sala. 143:10; 1 Timo. 4:8) O loo faailoa mai lena feau i le mataupu faaiu o le tusi o Le Ala e Maua ai le Fiafia i le Aiga. Ua fesoasoani lenei lomiga fou i tagata e iloa ai po o le ā le mea e tāua moni i le olaga, ma mafai faapefea ona latou gaoioi ma le poto agaʻi i o latou aiga. A o faaauau ona tatou talaʻi atu le tala lelei i so o se mea, o le ā e mafai ona tatou fai atu ai e faalaeiauina ai i latou o ē tatou te feiloai atu i ai ina ia faitau le tusi, Fiafia i le Aiga? O nisi nei o fautuaga:
2 I le fale ma i le alatele, atonu e te taumafai e faaaogā le sāvali “Olioli i le Olaga Faaleaiga” e amata ai se talanoaga. E mafai ona e fesili atu:
◼ “I popolega uma lava ua aumaia ia i tatou e le olaga i aso nei, pe e te lagona e mafai ona maua se olaga faaleaiga e fiafia moni? [Faatali mo se tali.] Ua faamautinoa mai ia i tatou e lenei sāvali e faapea, e mafai. Pe e te fia faitau i ai?” Afai e talia le sāvali, ona mafai lea ona e faaauau i lou faapea atu: “Ona o loo faaalia lou fiafia i lenei mataupu, e mafai foi ona e olioli i lenei tusi o loo saunia ai se fautuaga auiliili i le ala e maua ai le fiafia i le liʻo o le aiga.” Faaali le faasologa o mataupu i le tusi, Fiafia i le Aiga. Faasino i ai ni mataupu faaoso naunau. Suʻe i le itulau e 10, ma faitau le fuaiupu mulimuli o le palakalafa e 17 e oo i le faaiuga o le palakalafa e 18. Ofo le tusi, ma taʻua le fuafuaga mo mea alofa tauofo. Fai i ai e tele atu isi mea ia e te manao e tufa atu, ma fesili i ai po o afea e mafai ona e toe foi atu ai e asia o ia.
3 E mafai ona e tuliloa lau uluai talanoaga e uiga i le olaga fiafia faaleaiga i lou fai atu:
◼ “Ou te fia faasino atu ia te oe se mea mai le tusi lea na tuu ia te oe, ou te manatu o le a e talisapaia. O le mataupu mulimuli o loo taulai atu i le ala moni e maua ai le fiafia i le aiga. [Faitau le palakalafa e 2 i le itulau e 183.] Mātau, o le galulue faatasi i le faia o le finagalo o le Atua, o le ki lena. Matou te fautuaina ai la ina ia suesue faatasi e aiga le Tusi Paia ia iloa ai po o le ā le finagalo o le Atua ma le auala e faatatauina ai i le auaiga. E matou te ofoina atu se suesuega faale-Tusi Paia i le aiga e aunoa ma se totogi e na o ni nai masina lava e faia ai ae uma. Afai e tusa ai ma lou finagalo, ou te fia faasino atu ia te oe le auala e faia ai.” Ia toe foi atu ma le polosiua, O le ā e Manaomia e le Atua Mai ia i Tatou? po o le tusi o Le Poto, po o lē fea lava tusi e sili atu ona talafeagai.
4 Pe a talanoa atu i uo i le vasega i le aʻoga po o talavou i le oganuu, atonu o le a e maua mai se tali i le fesili lenei:
◼ “O le ā le tāua mo mātua ma a latou fanau i le tatalaina pea o laina o fesootaiga i le va o le tasi ma le isi? [Faatali mo se tali.] Mātau le mea o fai mai ai lenei tamai tusi e uiga i le olaga faaleaiga e faatatau i le mataupu, ‘O Fesootaiga e Faamaoni ma Saʻoloto.’ [Faitau uma le palakalafa e 4 ma le fuaiupu muamua o le palakalafa e 5 i le itulau e 65 o le tusi o le Fiafia i le Aiga.] Ua saunia i palakalafa o loo mulimuli mai ni fautuaga aogā i le auala e faaleleia ai fesootaiga i totonu o se aiga. O le igoa o lenei tusi e faapea, Le Ala e Maua ai le Fiafia i le Aiga. Afai e te fia faitau i ai ma folafola mai o le a e faia faapea, e mafai ona tuu le kopi lenei ma oe.” Faamatala i ai o le a e toe foi atu e asia o ia i se taimi mulimuli ane e fia iloa sona manatu e uiga i mea o ia faitau i ai.
5 E mafai ona faaauau lau talanoaga mai lau uluai talanoaga ma se talavou e uiga i fesootaiga i le va o mātua ma fanau i lou faapea atu:
◼ “Ua ou talisapaia lava le naunau na e faaalia i le tāua o le iai o fesootaiga lelei i totonu o lou aiga. O le ā sou manatu i se mataupu e sili ona tāua e tatau i mātua ma fanau ona talanoaina?” Faatali mo se tali. Ona suʻe lea i le itulau e 68 o le tusi, Fiafia i le Aiga, ma faitau le tali lea o loo maua i le ʻafa muamua o le palakalafa e 11. “O le faia o se suesuega faale-Tusi Paia faalevaiaso, o se auala sili lea ona lelei e maua ai le poto e uiga i le Atua.” Faaali le polosiua O le ā e Manaomia e le Atua Mai ia i Tatou? Faamatala atu e faapea, o lesona e 16 o loo iai, ua saunia ai se auivi faavae o le feau o loo i le Tusi Paia. Faitau le upu tomua i le itulau e 2, ona talanoa faatasi loa lea o le lesona muamua.
6 Afai e te feiloai atu i se matua i le galuega mai lea fale i lea fale, pe atonu i se paka po o se malae taalo, e mafai ona e faaoso le naunau i lou faapea atu:
◼ “Ou te mautinoa o le a e ioe o le tausia aʻe o fanau i aso nei o se mea e matuā faigata. O le ā sou manatu i se mea e mafai ona puipuia ai lou aiga mai taaʻiga lē mamā? [Faatali mo se tali.] O nisi nei o fautuaga e sili ona aogā ua ou talisapaia foi e aʻu.” Faamatala le tala faatusa i le palakalafa 1 ma faitau le palakalafa e 2 i le itulau e 90 o le tusi, Fiafia i le Aiga. Faamatala le auala o loo aumaia ai i le tusi faatonuga paleni e matuā aogā moni lava i le puipuia o aiga mai taaʻiga e faaleagaina ai. Fai i ai e mafai ona tuu le tusi, ma ia e nofo sauni e tali ni fesili o le a lāgā.
7 I lau asiasiga lona lua i se matua na talia le tusi o le “Fiafia i le Aiga,” e mafai ona e faaauau le talanoaga i lou faapea atu:
◼ “I le taimi muamua na ta feiloai ai, sa mafai ai ona ou iloa e ese lou manatu mamafa i lau fanau ma e te manao e faia mea uma e te mafaia ina ia puipuia ai i latou mai taaiga sese. Atonu e te lei faitauina le manatu lenei, ae o loo iai se faamatalaga matuā tāua i le tusi lea na ou tuua ia te oe e tatau ona e iloa. [Faitau le palakalafa e 19 i le itulau e 59.] O le atiina ae o se faiā ma le Atua, e manaomia ai lo tatou iloa lelei o ia e ala i itulau o lana Afioga tusia, le Tusi Paia. E te manao ou te faataitaia atu ia te oe le auala matou te suesueina ai le Tusi Paia o se aiga?”
8 O tagata faufautua o le lalolagi, e lē o mafai ona latou faailoa atu i aiga le auala e maua ai le fiafia, ae o le mea moni o le a tuua ai i latou i se tulaga lē fiafia. Seʻi o tatou matuā tufatufaina atu le tusi, Fiafia i le Aiga ina ia mafai ai ona fesoasoani atu le Afioga a le Atua i tagata i so o se mea ina ia maua ai se lumanai tumau.—1 Timo. 6:19.