“Ia Faaalia lo Outou Loto Faafetai”

¹ O le toatele o i tatou sa aʻoaʻoina a o laiti e fai atu “faamolemole” ma “faafetai” pe a faaali mai e se tasi ia i tatou le faaaloalo ma le agalelei. Ua apoapoai mai Paulo ia i tatou ina ia saga ‘faaalia lo tatou loto faafetai,’ ma e tatau ona tatou loto faafetai, ae maise lava ia Ieova. (Kolo. 3:15, 16) Ae e mafai faapefea ona tatou faaalia le loto faafetai i Lē Sili na Foafoaina i tatou? Ma o ā ni a tatou mafuaaga faapitoa e ao ai ona tatou loto faafetai ia te ia?

² Na tusi mai le aposetolo o Paulo: “A e faafetai i le Atua, o le na te foaiina mai le manumalo ia te i tatou e ala mai i lo tatou Alii o Iesu Keriso.” (1 Kori. 15:57) I vaitaimi o le Faamanatuga i tausaga taitasi, e faamanatu mai ai ia te i tatou e uiga i le alofa matuā tele o le Atua ma Keriso ua faaalia i le saunia o le togiola ua tatou maua ai le faamoemoe o le ola e faavavau. (Ioa. 3:16) Talu ai o i tatou uma lava ua maliliu ni ē pele, maeu la lo tatou loto faafetai i le folafolaga a Keriso e uiga i le toetu! Ua matuā faatumulia o tatou loto i le faafetai pe a tatou mafaufau atu i le faamoemoe o le faasaoina atu i le iuga o lenei faiga o mea e aunoa ma le oo mai o le oti. (Ioa. 11:25, 26) E faigata lava ona maua ni upu e faaalia ai lo tatou faafetai mo faamanuiaga ofoofogia uma o le a tatou tofo i ai i lena taimi i le aao o Ieova i le Parataiso faalelalolagi o loo fotuai mai. (Faaa. 21:4) O ā nisi o mafuaaga e sili atu ona lelei e mafai e se tasi ona ‘faaalia atu ai lona loto faafetai’ i le Atua?

³ Le Auala e Faaalia ai le Loto Faafetai i le Atua: O se mea e talafeagai pea ona faailoa atu a tatou faafetai ia Ieova mo lona lelei e ala i le tatalo. (Sala. 136:1-3) Ua faalaeiauina foi i tatou ina ia faaalia lo tatou loto faafetai ia te ia i isi auala mautinoa. Mo se faaaoaoga, e mautinoa o le a tatou auai i le Aso Sa, Mati 23, mo le Faamanatuga o le maliu o Keriso. Ina ia fesoasoani e faafetaiaia manaoga faaletino o la tatou faapotopotoga ma le galuega i le lalolagi aoao, ua tatou fiafia ai e ‘āva ia Ieova i a tatou oa.’ (Faata. 3:9) O la tatou lagolagosua atoatoa i toeaina ma felagolagomai ma i latou, ua faaalia ai lo tatou loto faafetai ia Ieova mo le fesoasoani ua ia saunia e ala mai ia i latou. (1 Tesa. 5:12, 13) I aso uma lava, tatou te tauivi ai ina ia tausisia amioga saʻo e faamamaluina ai le suafa o le Atua. (1 Pete. 2:12) O loo fiafia Ieova i nei faaaliga uma o lo tatou loto faafetai.—1 Tesa. 5:18.

⁴ Le Faailoaga Aupito Sili o la Tatou Faafetai: O le faia o se sao ma le loto atoa i le galuega talaʻi o le Malo, faamamaluina le suafa o Ieova, faaalia le loto faafetai e ala i le tatalo, ma puipuia ma le loto faamaoni le upu moni, o nisi na o faaaliga aupito sili ua mafai ona tatou faailoa atu ai lo tatou loto faafetai i Lē na Foafoaina i tatou mo mea uma lava ua ia faia ona o i tatou. E matuā fiafia Ieova e silasila mai ia i tatou o faia galuega o le auaunaga paia e lagolagoina ai lona finagalo “ina ia faaolaina o tagata uma lava.” (1 Timo. 2:3, 4) O le mafuaaga lena ua mafai ai e le toatele o le autalaʻi o ē o loo fuafua e paeonia ona tali atu i le valaau lea o loo aumaia i La Tatou Faiva o le Malo o Fepuari ina ia paeonia lagolago i se masina se tasi pe sili atu foi o masina o Mati, Aperila, ma Me. O le faia o se taumafaiga faaopoopo i le faiva, o se auala lelei lea e ‘faaalia ai lo tatou loto faafetai’ i le Atua. Po o le a mafai ea ona e auai i muaau o paeonia ia Aperila? po o Me?

⁵ Ua tuuina mai ia i tatou se faamoemoe mautinoa o le ola e faavavau. Pe a tatou vaai ua faataunuuina lea folafolaga, o le a ia i tatou le anoanoai o nisi mafuaaga atili e faaauau ai ona saga faafetai atu ia Ieova ma le loto olioli i aso uma.—Sala. 79:13.