Faasino Tagata Suesue i le Faalapotopotoga o Loo Tauaveina lo Tatou Igoa
1 “O se feau ua talaʻia i le silia ma le 200 gagana. O se feau ua lagonaina i le silia ma le 210 atunuu. O se feau ua faaooina atu i tagata taitoatasi e tusa lava po o fea e maua atu i ai. O vaega uma ia o le tauiviga silisili o le talaiga lea sa lei iloa muamua e le lalolagi, o se feau ua autasia ai le faitau miliona o tagata i le lalolagi atoa. Ua faamaopoopoina lelei Molimau a Ieova mo le faataunuuina o lenei galuega ua silia nei ma le selau tausaga!”
2 O faamatalaga amata na o le vitiō Jehovah’s Witnesses—The Organization Behind the Name. Ua ia faaauau ona taliina fesili e pei: O ai moni lava Molimau a Ieova? Ua faapefea ona faamaopoopoina la latou galuega? Ua faapefea ona faatonutonuina? Ua faapefea ona faatupeina? Ua faamautinoa atu ai i le ʻau maimoa le mea moni e faapea “O Molimau a Ieova i le lalolagi aoao ua toleniina o se faalapotopotoga ina ia fesoasoani atu i o latou tuaoi i le atiina ae o le faatuatua i le Tusi Paia,” ma ua faalaeiauina ai i latou ina ia silasila lava i latou i ai i le faalapotopotoga o loo tauaveina lo tatou igoa. O se tasi fafine sa suesue na maligi ona loimata o le olioli ma le talisapaia ina ua uma ona matamata i lenei vitiō, ma sa ia faapea mai: “E mafai faapefea e se tasi ona lē iloa o le faalapotopotoga lenei a le Atua moni, o Ieova?”—Faatusatusa i le 1 Korinito 14:24, 25.
3 O se tasi fafine o lē na fai ma tuu lana suesuega mo se taimi umi, sa lē mafai ona ia taliaina le mea moni faapea o le Tolutasi o se aʻoaʻoga sese. Ona faamatamata lea o ia ma lana tane i la tatou vitiō. Sa matuā faagaeetia lava i laua i le ata ma sa la matamata faalua i ai i le po lava lea. I le isi a la suesuega na sosoo ai, na faailoa atu ai e le avā lona faanaunauga e fia avea ma Molimau. Sa ia faapea mai sa maumaututu lava i lona talitonuga e uiga i le Tolutasi ma na lē taulau ona vaavaai atu i la tatou faalapotopotoga ma tagata o loo aofia ai. E ala mai i le vitiō na ia iloa ai e faapea ua ia mauaina le faalapotopotoga moni a le Atua. Sa ia manao loa e amata i le galuega talaʻi mai lea fale i lea fale. Ina ua uma ona faamatala atu ia te ia laasaga manaomia ina ia avea ai ma tagata talaʻi e lei papatisoina, sa ia faapea mai: “O le a ou faia nei loa ia laasaga o loo manaomia.” Sa ia faamavae loa mai lana lotu, amata auai i le auaunaga i le fanua, ma sa oo ina agavaa o ia e faamaonia le sese o le Tolutasi.
4 Ua matauina e faapea e vave ona faia e tagata suesue o le Tusi Paia se agaigai i luma e sili atu ma vave tutupu aʻe ai i le taʻumatuaina pe a latou iloaina le faalapotopotoga a Ieova ma auaufaatasi atu i ai. O le mea mataina, ina ua uma ona papatiso tagata e 3,000 i le Penetekoso, “ua tumau pea i latou i le aʻoaʻoga a le au aposetolo, ma le mafuta faatasi.” (Galu. 2:42) E tāua foi ona tatou fesoasoani atu i tagata suesue ina ia faia faapea i aso nei. E mafai faapefea ona tatou faia faapea?
5 Ia Fai Lau Tiute Tauave: O tagata taitoatasi o auai i le galuega o le faia o soo e tatau ona ia iloa o lana tiute tauave le tataʻi lea o le tagata suesue o le Tusi Paia i le faalapotopotoga a le Atua. (1 Timo. 4:16) O suesuega taitasi e ao ona manatu i ai o se laasaga lea e agaʻi atu ai i le aso fiafia lea o le a faaalia ai e le tagata fou lona tuuina atu e ala i le papatisoga i le vai. O se tasi o fesili o le a fesiligia i le sauniga o le papatisoga e faapea: “Pe ua e malamalama ea o lou tuuina atu ma lou papatisoga ua faailogaina ai oe o se Molimau a Ieova e aufaatasi ma le faalapotopotoga a le Atua ua taitaia e lona agaga?” O lea, e tāua lona iloaina faapea e lē mafai ona auauna i le Atua e aunoa ma le aufaatasi ma le maelega ma le faapotopotoga Kerisiano moni.—Mata. 24:45-47; Ioa. 6:68; 2 Kori. 5:20.
6 Ia faaauau pea ona aʻoaʻo le tagata suesue e faatatau i le faapotopotoga o loo iai i lea vaipanoa ma le faalapotopotoga faavaomalo lea o loo lagolagoina Molimau a Ieova. Ia faia faapea i suesuega taitasi faale-Tusi Paia, ia amata mai lava i le uluai suesuega. Mai le amataga lava, ia valaaulia le tagata suesue i sauniga, ma ia faaauau pea ona valaaulia o ia.—Faaa. 22:17.
7 Ia Faaaogā Mea Faigaluega ua Saunia: O a tatou lomiga e sili ona lelei e faaaogā mo le taulimaina o suesuega faale-Tusi Paia, o le polosiua lea O le ā e Manaomia e le Atua Mai ia i Tatou? ma le tusi o Le Poto e Taʻitaʻia ai i le Ola e Faavavau. O na tusi uma ua faamatilatila mai ai le manaomia ona aufaatasi ma le faapotopotoga. I le faaiuga o le lesona lona 5 i le polosiua Manaomia ua taʻua ai e faapea: “E ao ona faaauau ona e aʻoaʻo e uiga ia Ieova ma usiusitai i mea o ia finagalo i ai. O le faatasi atu i sauniga i le Maota o le Malo o Molimau a Ieova o i lou nuu o le a fesoasoani lea ia te oe e faia faapea.” O le tusi o Le Poto ua ia faalaeiau mai pea i le tagata suesue ina ia auai i sauniga. I le mataupu 5, palakalafa 22, ua faalautele atu ai lenei valaaulia e faapea: “Molimau a Ieova . . . latou te faalaeiauina ma le mafana oe ina ia e auai ma i latou i le tapuai atu i le Atua i ‘le agaga ma le upu moni.’ (Ioane 4:24, NW)” I le mataupu 12, palakalafa 16, ua taʻua ai e faapea: “A o e faaauauina lenei suesuega, ma faia ma au masani le auai i sauniga a Molimau a Ieova, o le a faamalosia atili ai lou faatuatua.” I le mataupu 16, palakalafa 20, ua faapea mai: “Ia fai ma au masani le auai i sauniga a Molimau a Ieova.” Ua faaopoopo mai e faapea: “O le a fesoasoani lenei mea ia te oe ina ia e malamalama ai ma faatatauina le poto e uiga i le Atua i lou olaga ma o le a e maua ai le fiafia. O le avea ma vaega o le auuso Kerisiano i le lalolagi aoao o le a fesoasoani lena ia te oe e te mafana atu ai pea ia Ieova.” I le mataupu atoa e 17 ua talanoaina ai le auala e maua ai e se tasi le saogalemu moni i tagata o le Atua. A o tatou suesue ma isi, o la tatou avega tauave le faamamafa o nei vaega o le mataupu.
8 O le polosiua Molimau a Ieova—Autasi i le Faia o le Finagalo o le Atua i le Lalolagi Aoao o se mea faigaluega lelei lea e faamasani ai tagata taitoatasi e faapea e tasi lava le faalapotopotoga vaaia ua faaaogaina e Ieova i aso nei e faataunuu ai lona finagalo. Ua iai iina faamatalaga auiliili e uiga i la tatou faiva, a tatou sauniga, ma le faalapotopotoga o le a faalaeiauina ai le tagata faitau ina ia aufaatasi ma i tatou i le tapuai atu i le Atua. O le taimi lava e amata ai se suesuega faale-Tusi Paia, e fautuaina le tuuina atu o se kopi o lenei polosiua i le tagata aʻoga ina ia faitau ai i lana lava kopi. E lē manaomia ona suesue lena polosiua ma le tagata e pei ona sa faia muamua.
9 O nisi o vitiō ua saunia e le Sosaiete o ni mea faigaluega ia e sili ona lelei e tataʻi atu ai tagata suesue i le faalapotopotoga lea o loo tauaveina lo tatou igoa. E lelei pe afai e mafai ona latou matamata i (1) The New World Society in Action, ua toe faamatalaina ai le ata na puʻe i le 1954 lea e faaalia ai le gasologa lelei ma le maopoopo o mea, ma le agaga alofa lea e faagaoioia ai le faalapotopotoga a Ieova; (2) United by Divine Teaching, ua toe iloilo ai le autasiga filemu lea na faaalia i a tatou tauaofiaga faavaomalo i Europa i Sasaʻe, i Amerika i Saute, Aferika, ma Asia; (3) To the Ends of the Earth, ua faailogaina ai le 50 tausaga o le Aʻoga Faale-Tusi Paia a le Olomatamata o Kiliata ma faaalia ai taaʻiga a misionare i le galuega talaʻi i le lalolagi aoao; (4) Jehovah’s Witnesses Stand Firm Against Nazi Assault, ua taʻu mai ai le tala mataina i le loto tetele o Molimau i le feagai ai ma sauaga matuitui a Hitila; ae maise foi le, (5) Jehovah’s Witnesses—The Organization Behind the Name.
10 Ia Faatutū ni Sini e Faatatau i le Agaigai i Luma i Sauniga: E tatau ona faamatala atu i tagata suesue e faapea e manaomia aʻoaʻoga patino ia ua saunia e ala mai i suesuega faale-Tusi Paia i le aiga ma talanoaga i le potu aʻoga ia ua saunia e sauniga a le faapotopotoga. (Ioa. 6:45) E manaomia e se tagata fou ona tutusa lona agaigai i luma i lona malamalamaga i le Tusi Paia ma le faalapotopotoga. Ina ia faataunuuina lena tulaga, e leai se mea e mafai ona suitulaga i le auai i sauniga. (Epe. 10:23-25) Ia vave ona valaaulia le tagata i sauniga a le faapotopotoga. O nisi tagata fou e naunau na amata lava ona auai i sauniga a o lei faia faalausosoo lana suesuega faale-Tusi Paia. O le mea moni, tatou te mananao e faataatia e i tatou lava se faataitaiga talafeagai e ala i lo tatou auai e lē aunoa.—Luka 6:40; Fili. 3:17.
11 Ia lava ni faamatalaga e fetalanoaai ai e uiga i sauniga ma le auala ua taulimaina ai, o le a mafai ai e le tagata suesue ona toʻa lelei a o auai i lana uluai sauniga. Talu ai o nisi tagata e faafaigata ia i latou le ō atu i ni nofoaga fou i le uluai taimi, atonu e lelei ai la ona ō faatasi ma le tagata aʻoga i le Maota o le Malo pe a auai atu i lana uluai sauniga. O le a sili ona toʻa o ia pe afai e te iai faatasi ma ia a o ia feiloai atu i isi tagata o le faapotopotoga. O le mea sili e ao ona fai, ia e talia lelei lau malo asiasi, ia iai ia te ia le faalogona o loo talia lelei ma le mafana.—Mata. 7:12; Fili. 2:1-4.
12 Ia faalaeiau i le tagata suesue ina ia auai i se aso faapitoa o fonotaga, fonotaga matagaluega, po o se tauaofiaga itumalo i se uluai avanoa e maua. Atonu foi e mafai ona e faaaofia o ia i au fuafuaga o auala o femalagaaiga.
13 Ia Totō se Loto Talisapaia: I le tusi Organized to Accomplish Our Ministry, itulau 92, ua faamatala ai e faapea: “Afai e atagia atu i au talanoaga ma tagata fiafia lou lava talisapaia loloto mo le faalapotopotoga a Ieova, o le a faigofie foi la mo i latou ona faatupuina se loto talisapaia ma o le a uunaia ai i latou e faia se agaigai i luma e sili atu ina ia latou iloa ai Ieova.” Ia tautala ma le mautinoa i taimi uma ae aua neʻi faia ni tala faalēlelei e uiga i lau faapotopotoga. (Sala. 84:10; 133:1, 3e) I tatalo o loo e faia i le taimi o le suesuega faale-Tusi Paia, ia taʻua ai le faapotopotoga ma le manaoga ina ia faatasi atu i ai e lē aunoa le tagata suesue.—Efe. 1:15-17.
14E tatou te mananao moni lava i ē fou ina ia latou atiina ae se loto talisapaia mo le aufaatasiga matagofie ma le puipuiga malu ua maua i tagata o le Atua. (1 Timo. 3:15; 1 Pete. 2:17; 5:9) I le avea ma Molimau a Ieova, seʻi o tatou faia ia le mea e tatou te mafaia e tataʻi atu ai tagata suesue o le Afioga a le Atua i le faalapotopotoga o loo tauaveina lo tatou igoa.
[Faamatalaga faaopoopo i le itulau 3]
E vave ona agaigai i luma faaleagaga tagata suesue pe a latou vaaitino i le faalapotopotoga
[Faamatalaga faaopoopo i le itulau 4]
Aua neʻi faatuai ona e valaauliaina tagata suesue ina ia auai i sauniga