Fesoasoani i Isi ia Auai i Sauniga
1 “So o se uō lava e nofo latalata ane i le vaipanoa o loo faia ai sauniga . . . e faanaunau e auai i sauniga, e valaaulia ma le māfana ina ia faia faapea.” Talu lava ona aliaʻi mai lenei faasilasilaga i le lomiga o le Zion’s Watch Tower o Novema 1880, ua naunau ai lava Molimau a Ieova e valaaulia tagata ina ia faapotopoto faatasi ina ia aʻoaʻoina i le Tusi Paia. (Faaa. 22:17) O se vaega tāua lenei o le tapuaʻiga moni.
2 E Tāua le Auai: E tatou te maua faamanuiaga pe afai e tatou te auaufaatasi ma le faapotopotoga. Ua oo ai ina tatou masani lelei ma lo tatou Atua ofoofogia, o Ieova. I le faapotopotoga, e tatou te feiloaʻi faatasi ai ina ia ‘aʻoaʻoina e Ieova’ i tatou. (Isa. 54:13) Ua otooto mai e lana faalapotopotoga se polokalame faifai pea o faatonuga mai i le Tusi Paia ina ia tosina vavalalata atu ai i tatou ia te ia, ma aumaia ai fesoasoani aogā i le faatatauina o “le finagalo uma o le Atua.” (Galu. 20:27; Luka 12:42) O sauniga, ua saunia ai toleniga totino i le tomai e aʻoaʻo atu ai le Afioga a le Atua. O faamanatuga mai i le Tusi Paia ua fesoasoani lea ia i tatou ina ia maua ai ni faiā taulau ma isi faapea ma Ieova lava ia. O le auaufaatasi ma i latou e alolofa i le Atua e faamalosia ai lo tatou faatuatua.—Roma 1:11, 12.
3 Ia Valaaulia Tuusaʻo Lava: Ia amata lava i le uluaʻi suʻesuʻega ona valaaulia tagata suʻesuʻe uma o le Tusi Paia i sauniga. Avatu i ai se pepa valaau e faailoa atu ai taimi o sauniga. Ia faagaee le naunau i le faamatalaina atu i ai o se manatu na faalaeiauina ai oe mai i le sauniga ua faatoʻā mavae ma talanoa se manatu o le a talanoaina i le isi sauniga lea e sosoo ai. Faamatala i ai foliga o le Maota o le Malo, ma ia faamautinoa o le a faigofie ona ia maua.
4 Afai e leʻi auai mai lava le tagata suʻesuʻe, ia faaauau pea ona valaaulia o ia. Faaalu ni nai minute i vaiaso taʻitasi e faailoa atu ai ia te ia le auala o loo faagaoioia ai la tatou faalapotopotoga. Faaaogā le polosiua Faia o le Finagalo o le Atua ma le vitiō Jehovah’s Witnesses—The Organization Behind the Name ina ia faamasani ai o ia ia i tatou ma a tatou sauniga. Ia ō faatasi ma isi tagata talaʻi ina ia faamasani atu foʻi le tagata suʻesuʻe ia i latou. Pe a faia le tatalo, ia faafetai atu ia Ieova mo le faalapotopotoga ma ia taʻua foʻi le manaʻomia e le tagata suʻesuʻe ona aufaatasi ma le faalapotopotoga.
5 Aua le faalotolotolua e fesoasoani atu i ē fou lotofiafia ina ia faapotopoto faatasi ma i tatou. A o tuputupu aʻe lo latou talisapaia mo Ieova, o le a uunaʻia i latou e faatatauina mea na latou aʻoaʻoina ma avea o se vaega o le faalapotopotoga autasi a le Atua.—1 Kori. 14:25.