Mulimuli Pea ia Iesu
1 I se tasi taimi na fetalai ai Iesu: “Ai se tasi e fia mulimuli mai ia te au, aua neʻi usiusitai o ia ia te ia, a ia ave e ia lona satauro, ma mulimuli mai pea ia te au.” (Mata. 16:24, NW) O le mea moni, tatou te mananao e tali atu ma le mautinoa i upu a Iesu. Seʻi o tatou iloiloina po o le ā o aafia i lana valaaulia.
2 “Aua Neʻi Usiusitai o Ia ia te Ia”: Ina ua tatou tuuina atu o tatou ola ia Ieova, ua tatou lē toe pule ai ia i tatou lava. O le uiga faavae o le upu Eleni ua faaliliuina “aua neʻi usiusitai” o le “fai atu e leai.” O lona uiga, ua tatou loto malilie e lafoaia o tatou faanaunauga, o mea e tuinanau i ai, o lelei totino, ma faafiafiaga manatu faapito—ae ua filifili e faafiafia Ieova e oo lava i le faavavau.—Roma 14:8; 15:3.
3 “A ia Ave e Ia Lona Satauro”: O le olaga o se Kerisiano, o se olaga faigata, o le faia o le auaunaga faataulagaina ia Ieova. O le tasi o auala e mafai ona faailoa atu ai le agaga o le faataulagaina, e mafai ona faaalia i le faamalosi o se tasi i le faiva. O lea la, i lenei tausaga, e toatele le au talaʻi ua olioli i le galuega o le paeonia lagolago. Atonu o loo e iai faatasi ma i latou ma mafai ona faamautinoa e faapea, e tele atu faamanuiaga ua e maua nai lo o taui o faataulagaina ua e faia. O i latou e lē o mafai ona auauna o ni paeonia lagolago, e masani lava ona latou fuafuaina e faaalu le taimi e sili atu i le galuega talaʻi i le avea o ni tagata talaʻi o le faapotopotoga. I lena itu, ua fuafuaina ai e nisi faapotopotoga e vave amata mo ni nai minute a latou faatasiga mo le auaunaga nai lo o le mea sa masani ona latou faia ai. Ua fiafia le toatele o tagata talaʻi e mauaina lenei taimi faaumiumi atu mo le auaunaga i le fanua. Ua maua ai foi e nisi ni iuga e sili atu ona lelei ina ua latou filifili e asiasi atu i le ‘toe tasi lava le fale lea’ po o le galulue ‘faaumiumi atu mo nisi minute.’
4 O le isi auala ua faaalia ai le agaga o le faataulagaina, e ala lea i le faataatitia o ni sini. O le fuafua ma le faaeteete ma toe fetuunai a latou faasologa, ua oo ai ina mafai ona paeonia sauatoa nisi. Ua fetuunai e nisi a latou galuega po o pisinisi ina ia mafai ai ona faaavanoaina i latou mo Peteli po o auaunaga faamisionare. Ua siitia atu nisi i se vaipanoa o loo manaomia tele ai ni tagata talaʻi o le Malo.
5 “Mulimuli Mai Pea ia te Au”: E ui ina tele tofotofoga na oo i soo o Iesu, ae o lona maelega ma lona tumau i le faiva, na faamalosia ai i latou. (Ioa. 4:34) O lona faatasi ai ma i latou ma lana feau, na latou lagona ai le faafouina o o latou agaga. O le pogai lena na faasusulu atu ai e i latou na mulimuli ia te ia le olioli moni. (Mata. 11:29) Seʻi faapena foi ona tatou faalaeiau le tasi i le isi ina ia tumau i le galuega e sili atu ona tāua o le talaʻia o le Malo, ma le faia o soo.
6 Seʻi o tatou tali atu uma lava ma le mautinoa i le valaau a Iesu ina ia mulimuli atu pea ia te ia e ala i le atiina ae o le agaga o le faataulagaina totino. A o tatou faia faapea, o le a tatou maua ai le olioli sili i le taimi nei ma mafai ona vaavaai atu ai i faamanuiaga e sili atu i le lumanai.