Pusa Fesili
◼ O le ā le manatu e ao ona iai i le auauna e avea o se paeonia lagolago?
E ao ona manatu i le auauna faapaeonia lagolago e lē gata o se faaeaga, ae o se tiute tauave e tāua. I masina taitasi, e faitau sefuluafe tagata talaʻi ua tofia e auauna o ni paeonia lagolago, ma o nisi ua latou faaauau ona faia faapea. Tatou te faamālō atu ai i nei tagata talaʻi maelega, o ē ua faaavanoa e o latou tulaga i latou ina ia faaaluina ai itula manaomia e 60 i le auaunaga i le fanua i masina taitasi ina ia auauna ai o ni paeonia lagolago. O toeaina faapea foi ma isi e ao ona faalaeiau i tagata talaʻi o loo talosaga mo le auaunaga faapaeonia lagolago ina ia faia ma le uigā lo latou tofiga ma ia aloese mai so o se faanaunauga i uiga faatalalē.
I le pei o paeonia sauatoa, e tatau ia i latou ua tauofo atu e avea ma paeonia lagolago mo se masina e tasi pe sili atu ona muai fefuafuatai mea uma. (Luka 14:28) E aofia ai le muai faamautinoa pe faamata ua mafai ona latou faamoemoe e faaaluina le taimi manaomia i le faiva i le fanua e aunoa ma le faatamala ai i isi tiute tauave faa-Kerisiano. E tatau i le filifiliga a se tasi ina ia avea ma paeonia lagolago ona faia, i le maeʻa lea ona faia o sana iloiloga i ona tulaga uma faatasi ma le tatalo. E lē tatau ona faamautūina i ni faalogona ua mapuna aʻe ona o loo talosaga foi isi. E tatau ona avea o se filifiliga sa lelei ona mafaufauina, faatasi ai ma se faasologa ua uma ona tusitusia mo mea e manaomia ona faataunuuina. E tāua ona matuā faitau lelei le pepa talosaga ma filifili ai le tagata lava ia i lona loto e faapea e mafai ona ia ioe atu ma le faamaoni i mea o loo manaomia mai.
Ioe, ua aofia ai nisi taumafaiga faaopoopo. E iai nisi masina o le tausaga e oo ina ‘matuā faatumuina atoatoa’ i le talaʻiina o le tala lelei. (Galu. 18:5) E aofia ai le vaitau o le Faamanatuga ia Mati ma Aperila ma masina foi pe a asiasia e le ovasia matagaluega le faapotopotoga. E toatele tagata talaʻi e fiafia e faatulaga i latou lava ina ia mulimuli atu ai i se faasologa maumaututū, ina ia faia ai se sao faaopoopo i le galuega talaʻi i nei vaitaimi o galuega faapitoa, i le talisapaia faapea, e masani lava ona iʻu ai i le ʻoa o faamanuiaga. (2 Kori. 9:6) E toatele tagata talaʻi ua faia ni taumafaiga faapitoa e paeonia ai i masina o tuuaga ma i so o se masina lava o le tausaga lena e lima ni faaiʻuga o vaiaso e iai. Ae i le sainia o le pepa talosaga, latou te talisapaia ai le manaoga ina ia mulimuli atu i le mataupu silisili, ‘Ia avea lau Ioe ma Ioe’ e ala i le faia o le mea sili latou te mafaia ina ia lipotia atu ai le 60 itula po o le sili atu i masina taitasi o loo latou auauna ai o ni paeonia lagolago.—Mata. 5:37.
O tagata talaʻi atonu e lē o mafai ona avea ma paeonia lagolago e mafai ona fesoasoani atu e ala i le faaavanoa o so latou taimi e galulue faatasi ai ma paeonia lagolago, ma faia ni tonu maumaututū ma i latou. E aogā le galulue i le auaunaga ma paeonia mo se taimi umi pe a mafai. E talisapaia tele e paeonia le lagolagosua atu a isi tagata talaʻi i taeaopo, i le afiafi, po o le afiafipo. E fiafia tele paeonia lagolago pe a valaaulia i latou e galulue ma isi i ni toe asiga ma le amataina o ni suesuega faale-Tusi Paia i aiga. O i latou la ua mafai ona avea ma lagolagosua i paeonia lagolago ua mautinoa lo latou seleseleina o se fiafiaga e sili atu, e maua mai lea i le foai atu.—Galu. 20:35.
Ua matuā talisapaia le tinoū o le toatele o paeonia lagolago. O i latou o ē e mafai ona auai faatasi atu i ai, e mafai ona faatalitalia le ʻoa o faamanuiaga. (Faata. 10:4) O fea le isi taimi e mafai ona toe faia ai sou sao i le olioli i le faateleina o le galuega i le avea ma se paeonia lagolago?