Faaalia le Manatu Mamafa Moni mo Tagata Loto Fiafia Uma na Maua
1 O le folafolaina atu o le Malo i le lalolagi aoao, ua lē pine ona faamutaina lea, o lea, o i latou uma o “e ua le iloa le Atua” o le a puapuagatia i le faaumatiaga. (2 Tesa. 1:7-9) O lea, o le manatu mamafa moni mo ola o isi ua uunaia ai tagata o Ieova ina ia oo atu i le toatele o tagata e latou te mafaia ma le feau o le Malo.—Sefa. 2:3.
2 I masina uma, ua faaalu ai le faitau miliona o itula e sailia ai i latou o ē o loo fia faalogo i le ‘tala i se mea e sili atu ona lelei.’ (Isa. 52:7) I le tali atu i le ofo o lomiga o loo faia nei, e toatele ua talia kopi o Le Olomatamata ma le Ala Mai! po o le polosiua, O le ā e Manaomia e le Atua Mai ia i Tatou? O le manatu mamafa moni la mo nei tagata, e tatau ona uunaia ai i tatou e faaauau ona asiasi atu ia i latou uma na faaalia le fiafia.—Faata. 3:27.
3 Tausia ia Faamaumauga Saʻo: E tele mea o le a faataunuuina pe a e tausia ni faamaumauga atoatoa ma saʻo lelei o tagata fiafia ma lomiga na tuu ai. O faamatalaga e pei o le mauaina o le suafa o lē ona le fale ma le tuatusi, le aso ma le taimi na e asiasi atu ai, se lomiga na tuu ai, ma le mataupu na talanoaina, o le a fesoasoani ia te oe ina ia maua ai ni iuga e sili ona lelei pe a e toe foi atu. Afai foi e mafai ona e tusia ni faamatalaga na faia e lē ona le fale i la lua uluai talanoaga, o le a mafai ona e toe tapa atu i ai a o e amataina le talanoaga i le toe asiga.
4 Ia Vave Ona Foi Atu e Faia Toe Asiga: E toafia ni tagata na latou talia lomiga mai ia te oe i le masina ua mavae na e taumafai e toe asia? Po ua mavae atu ni vaiaso e aunoa ma se isi toe fesootaiga? O le manatu mamafa moni mo lo latou lelei e faavavau e tatau ona uunaia ai oe e toe foi vave atu i le vave e te mafaia, pe atonu i ni nai aso, a o mafai ona manatua pea mea na talanoaina. O le toe foi vave atu e faagaee atili lo latou fiafia, atonu o le a mafai ai ona e taofia taumafaiga a Satani a o lei “alu ane . . . ma aveeseina le upu na luluina i o latou loto.”—Mare. 4:15.
5 E Tatau Ona Faia Sauniuniga: O lou taulau manuia i le faia o toe asiga, e fesootai lelei lava ma le lelei o lau sauniuniga. Ia sauniuni lau taulimaga a o e lei alu atu. I le itulau i tua o La Tatou Faiva o le Malo o Aperila 1997, o loo saunia ai nisi o taulimaga e mafai ona faaaogā ma le taulau manuia pe a e ofoina mekasini po o le polosiua o le Manaomia. O le isi mea e sosoo ai, o le manatua lea o ni manatu e talanoa atu ai pe a e toe foi atu. O le ā e mafai ona e fai atu ai pe a e toe asia se tagata na faaalia le fiafia? E mafai faapefea ona amataina se suesuega faale-Tusi Paia?
6 Pe a tuliloa se talanoaga i le po o le ā e manaomia ona faia ina ia faamamāina ai le lalolagi ma avea o se nofoaga e sili atu ona lelei e ola ai, e mafai ona e faapea atu:
◼ “I laʻu asiasiga talu ai, na ta ioe ai e manaomia ona faia vave ni suiga tetele a o lei faia le lalolagi e avea ma parataiso filemu. E te manatu o iai i tagata le mea o loo manaomia e faataunuuina ai lenei galuega tele? [Faatali mo se tali.] Faamolemole ia mātau le pogai e tatau ai ona faalaa mai le Atua i mataupufai a tagata.” Faitau le Salamo 37:38. Ona suʻe lea i le lesona e 5 i le polosiua Manaomia, ma faaaogā ni vaega ua filifilia mai le palakalafa e 4-5 e faailoa atu ai le auala o le a faataunuuina ai e le Atua lenei valoaga. Tuliloa e ala i le ofoina i ai o se suesuega faale-Tusi Paia e faaaogā ai le polosiua.
7 Afai sa e talanoa e uiga i le Malo o le Atua ma tuua ai le polosiua “Manaomia” i le uluai asiasiga, pe a e toe foi atu, e mafai ona e fai atu faapenei:
◼ “I la ta talanoaga talu ai, na ta iloaina ai o le Malo o le Atua, o se pulega moni o le a pule i le lalolagi aoao. Ua faaalia i le Tusi Paia e faapea o Iesu Keriso o le a avea ma tupu o lea Malo. E mafai ona e vaai faalemafaufau i ni aogā e maua pe afai e iai se ituaiga o pulega ma se taʻitaʻi faapenei?” Faatali mo se tali. Suʻe le polosiua o le Manaomia i le lesona 6. I le faaaogaina o ni manatu tāua na fili mai i le palakalafa 6-7 ma le ata i le itulau 13, ia faailoa i ai le mea o le a faia e le Malo o le Atua mo le fanau a tagata i le lumanai. Faitau le Tanielu e 2:44, ma afai e talafeagai faailoa i ai le tusi o Le Poto ma ofo i ai se suesuega faale-Tusi Paia.
8 Afai sa e feiloai i se tagata o lē na faailoa mai e faapea, o lotu a le lalolagi ua faapogaia ai faafitauli mo tagata, e mafai ona e fesili atu faapenei pe a e toe foi atu:
◼ “Pe sa e tau mānatu e mafai faapefea ona tatou iloa po o lē fea lotu e talia e le Atua? [Faatali mo se tali.] Ua aumaia e lenei polosiua, O le ā e Manaomia e le Atua Mai ia i Tatou? ni faailoga iloga e iloa ai le lotu moni.” Suʻe i le lesona e 13, ma faamatilatila ia manatu autū e lima na o loo tusi faasisipa i le palakalafa 3-7. E mafai ona e faaauau i lou faapea atu: “E faaopoopo i le sailia po o lē fea le lotu moni, e tatau foi ona tatou sailia po o ā mea e manaomia e le Atua mai ia i taʻua taitoatasi.” Faitau le Ioane 4:23, 24. Fai i ai e mafai ona talanoa atili i lenei mataupu. Ona suʻe lea i le lesona 1 i le polosiua, ma faataitai le auala tatou te faia ai suesuega.
9 Pe a e toe foi atu e faaauau se talanoaga e uiga i le fiafiaga o le aiga, e mafai ona e fai atu faapea:
◼ “I la ta uluai feiloaiga, sa ta talanoa ai e uiga i le ala e maua ai le fiafia i le aiga, o le faatinoina lea o le fautuaga o loo maua i le Afioga a le Atua, le Tusi Paia. Pe a oo i le tulaga o le faafetaiaia o manaoga o se aiga i aso nei, pe e te talitonu ua lē toe aogā po o aogā pea le Tusi Paia?” Faatali mo se tali. Faaali le tusi o Le Poto. Suʻe i le mataupu e 2, ma faitau le faamatalaga lena e sii mai i le palakalafa e 13. I le faaaogaina o manatu i le palakalafa e 3, ofo se suesuega faale-Tusi Paia i le aiga.
10 O le tausia o faamaumauga saʻo, faia sauniuniga tatau ma vave ona toe foi atu e faaoso atili lo latou naunau, e mafai ai ona tatou faaalia le ituaiga o alofa i tuaoi lea o le a faatosina mai ai i latou i le ala i le faaolataga.—Mata. 22:39; Kala. 6:10.