Fausiaina o Maota o le Malo

¹ A o tatou vaavaai atu i le oganuu i le lalolagi aoao, o se faamafanafanaloto le vaaia o le faatelega sili ua tofo i ai le faalapotopotoga a Ieova o loo i le lalolagi! I le tausaga ua tuanai atu, sa faaopoopo mai ai se aofaiga e 3,288 o faapotopotoga i le lalolagi aoao. O le tele o nei faapotopotoga o loo iai i Aferika, Asia, Amerika Tutotonu, Amerika i Saute, ma Europa i Sasaʻe. Ona o lenei tuputupu aʻe, ua lē o se mea la e ofo ai le iai o se manaoga mo le faaopoopo mai o nisi Maota o le Malo.

² E toatele uso ma tuafāfine o loo faaalia se maelega mataina ma le lagolagosua mo le faalapotopotoga a Ieova, e ala i le tauofo mai o o latou taimi ma meatotino mo le fausiaina o Maota o le Malo. I le lalolagi aoao, e tele Komiti o Faugafale (Regional Building Committees), ua latou vaavaaia manaoga o faapotopotoga i o latou vaipanoa o loo tofia i ai. Ua faamoemoe atu i komiti mo ia vaipanoa le vaavaaia o nei galuega, ma e talisapaia tele a latou galuega mamafa. I le oganuu o loo vaaia e le lālā a Samoa i Sisifo, ua vaavaaia ai lenei galuega e le ofisa o le lālā i Apia. O le faatulagaga atoa lava mo fausaga o Maota o le Malo ua faataulauina e ala i le agaga faa-Kerisiano o le limafoai ma le faataulagaina totino—e tuufaafeagai lea i le agaga o loo taatele ona faaalia i le lalolagi.—2 Timo. 3:2, 4.

³ Mo le fesoasoani ina ia fausia i ni fausaga talafeagai Maota o le Malo, ua avatuina ai e le Sosaiete i komiti i le tele o vaega o le lalolagi, ni ata o fausaga mo Maota o le Malo mo ia vaipanoa. Ua fesoasoani lenei ina ia faaaogā tatau ai le taimi ma meatotino o loo foai atu e tagata galulue tauofo. Ua fesoasoani foi i le faasoasoaina ma le atamai o Tupe a le Sosaiete mo Maota o le Malo. O ata la nei e fua i ai se filifiliga e faia e toeaina. Ina ua mauaina lenei faiga fou, na taʻua e se tasi Komiti o Faugafale: “Sa matuā faafiafiaina lava i matou ina ua matou maua nei ata. . . . O uso ua iai le tomai i le tusiaina o ata o galuega tetele ua latou faia se fua faatatau o le taimi o le a faasaoina mai, e tusa e 50 i le 60 pasene, talu ai le faaaogaina o nei ata fou. O le iai o nei ata o le a fesoasoani foi ia i tatou e fausia ai ni maota e sili atu ona foliga tutusa, ma tausisia ai fausaga e talafeagai mo Maota o le Malo.” A o soosootauau faapotopotoga i le lagolagoina o nei fausaga talafeagai o Maota o le Malo, e tatou te faatalitalia ai o le a fai sina māmā o le galuega mamafa a le toatele o le aufaigaluega tauofo.

⁴ E Lagolagoina e Tagata Tauofo se Galuega Lelei: Ua faafetaia e le Sosaiete le toatele o tagata tauofo o loo fesoasoani i le fausiaina o Maota o le Malo. E matuā lagona le agaga faafetai i le vaai atu i le faitau sefulu afe o tagata i le lalolagi aoao o loo tauofo mai i latou lava i vala uma o le fausiaina o Maota o le Malo. Ua mafai ona taulau manuia lenei polokalame ona o lena agaga naunautai, limafoai ma le lagolagosua a tagata faigaluega tauofo, o ē ua faataulaga o latou taimi sa ono faaaogā e galulue ai faatasi ma a latou faapotopotoga ma aiga. (Sala. 110:3; Kolo. 3:23) O lenei tali lelei mai ua matuā ono ma tatau ai ia i latou la tatou faamālō, le talisapaia, ma la tatou lagolagosua atoatoa.—Roma 12:10; Epe. 13:1.

⁵ Ia Lē Soona Taugata Tele le Tau mo Faugafale: Ua faatonuina Komiti o Faugafale ina ia faatulaga se matagaluega e gafa ma le faatauina mai o mea, ma ia vaavaaia e se toeaina agavaa. O uso o loo galulue i lenei matagaluega latou te mataalia e sailia po o ā tau eseese o mea o loo iai ina ia mafai ona latou saili ai mo tau talafeagai pe a faatusatusa tau a faleoloa ma i ni tauofoga talafeagai. I lenei auala, e mafai ai ona filifilia po o ā kamupanī e tatau ona faaaogā ma o ā mea faufale e tatau ona faatau mai. I nisi taimi, a o faagasolo le fausiaina o se Maota o le Malo, e ono valaaulia ai nisi uso agavaa mai lea faapotopotoga ina ia latou fesoasoani atu i le matagaluega lenei o loo gafa ma faatauga.

⁶ Ina ia faamautinoa o loo talafeagai le faaaogaina o tupe e aunoa ma le faamaimauina, e tatau ai i le Komiti o Faugafale ona latou faamaonia uma tupe ia ua faaaogā mai le faaputugatupe mo le galuega, e ala i lo latou toe sainia o ni siaki ua uma ona saini po o le tusia o o latou suafa i pepa ia o loo faamatala ai mea sa faaaogā i ai siaki (vouchers). So o se fausiaina lava o se Maota o le Malo, pe o se maota fou po o se maota e toe faafou, e aafia ai le faaaogaina o tagata tauofo mai isi faapotopotoga, e ese mai tagata o le faapotopotoga po o faapotopotoga ia o le a faaaogaina lea maota, e tatau loa i le komiti o lea vaipanoa ona latou vaavaaia le faagasologa o le galuega.

⁷ E iai taimi e mafai ona fesagai ai ma le tele o ni faafitauli tau i le tulafono a o fausiaina se Maota fou o le Malo. O mea e pei o pemita, laisene ma le inisiua e mafai ona matuā lavelave lava. Ae ua mafai e le Komiti o Faugafale ona fesoasoani i nei faafitauli ona o le tele o le tomai ua ia i latou.

⁸ Fesoasoani Mai Isi Lālā: E iai taimi e fesoasoani mai ai komiti o faugafale mai isi atunuu i fafo i le Komiti o Faugafale a lena lava vaipanoa. O le tulaga lena sa iai le fausiaina o Maota o le Malo i Sinamoga ma Nukuʻalofa. Sa avea o se matuā faailoaga o le alofa ina ua loto malilie uso agavaa mai isi atunuu e faatupe e i latou a latou lava faigamalaga ina ia fesoasoani i le fausiaina o Maota o le Malo.

⁹ Talu ai le faateleina pea o le manaoga mo ni Maota o le Malo i le tele o atunuu, ua iai se manaoga ina ia faaaogā ma le atamai tupe o loo iai nei. I atunuu mauoa, ua faalaeiauina ai e le Sosaiete faapotopotoga o loo lelei o latou tamaoaiga ina ia aua neʻi soona faataugataina tele le fausiaina o Maota fou o le Malo ma i le toe faafouina o maota o loo iai nei. Ua valaauliaina foi i latou e fesoasoani atu i tulaga tau tupe i le fausiaina o Maota talafeagai o le Malo i isi vaega o le lalolagi. O loo matuā lagolagoina ma le talisapaia lenei faatalauula atu. O lea, ua mafai ai ona faataga atu faaunegatupe i faapotopotoga i atunuu o loo iai se manaoga faanatinati mo nisi Maota o le Malo ae o loo utiuti ālamanuia ma o loo matuā faigata tulaga tau i le tamaoaiga.

¹⁰ O le manaoga mo nisi Maota o le Malo i nisi o atunuu o loo faamamafa mai i le 1997 Yearbook. Mo se faaaoaoga, o loo taʻua Ukraine, ua fausia ai le 47 o Maota o le Malo, ma o loo faagasolo foi le fausiaina o isi maota e 56. Ua matuā faamaonia mai lava le manaoga i na atunuu. Ua faapea mai le lipoti: “E tele nisi Maota o le Malo o loo manaomia i Rusia. Ua vave tele le faatelega o Molimau iina, ae tusa ma le 85 pasene o faapotopotoga i lalo o le vaavaaiga a le lālā i Rusia e lē o iai ni o latou nofoaga mautu e fai ai a latou sauniga. I Zimbabwe, o loo iai faapotopotoga e 800, ua talafeagai ai mo le toatele o i latou nei ona faia a latou sauniga i fafo i le taalaelae. Ua avea lenei ma pogai e faamaamulu ai nisi tagata fiafia fou i le auai atu i ai. O tulaga foi faapena o loo tutupu i isi atunuu i Europa i Sasaʻe, Aferika, ma Amerika Latina, ma o loo iai pea so tatou manaoga mo nisi Maota o le Malo i Amerika Samoa, Toga, ma Samoa i Sisifo.

¹¹ E ui ua tele galuega ua uma ona faatinoina, ae ua faaalia i lipoti e faapea e iai se atunuu e 568 a latou faapotopotoga ae na o le tasi lo latou Maota o le Malo. O se tasi atunuu e taʻi 129 faapotopotoga e faaaogaina se Maota o le Malo e tasi. O le isi atunuu e tasi le Maota o le Malo mo ni faapotopotoga e 41. E tele foi nisi atunuu, e silia ma le 1,000 faapotopotoga o loo iai, ae lei iai ma se Maota o le Malo ua fausia ai.

¹² O le faatalauula atu ina ia fesoasoani i le fausiaina o Maota o le Malo i na atunuu ua ogatasi lea ma le 2 Korinito 8:14 o loo faapea mai: “E fai faatatau, ina ia fesoasoani lo outou tamaoaiga i lo latou matitiva i nei ona po.” O na fesoasoani mai uso i isi atunuu, ua mafai ai e le Sosaiete ona fesoasoani atu e fausia le 413 o Maota fou o le Malo, ma toe faafouina isi maota e 727 i totonu o le na o le fa masina, i atunuu eseese e 75.

¹³ Maeu lo tatou matuā sapaitalia o le agaga matagofie o le limafoai o loo faaalia e o tatou uso mai atunuu i fafo! E ui atonu o i tatou lea o loo faaaogaina na fesoasoani, ae i le taimi foi e tasi, ia faia so tatou sao i le foai atu i se tele e mafai ai, e tusa ma o tatou tulaga taitoatasi. O la tatou lagolagosua i lo tatou Maota o le Malo, e ala i le totogia o ni faaunegatupe, ma le foaiina o tupe auā le tausia pea o na maota, tatou te faaalia ai le agaga naunautai lava lea e tasi o loo faaalia foi e tagata o le Atua i le lalolagi aoao.

¹⁴ E ui ua mou atu le alofa o le toatele o tagata i nei aso e gata ai, ae o loo faaauau pea e tagata o le Atua ona faaalia faamaoniga o lo latou alofa o le tasi i le isi, o se alofa ua laasia ai tuaoi o lanu ma atunuu. (Mata. 24:12) I le faataitai atu i lo tatou Tamā faalelagi, tau ina ia tatou faaauau ona faaalia lena alofa e ala i lo tatou lagolagosua ma le lotomalie i le fausiaina o Maota o le Malo. O lo tatou faia faapea o le a aumaia ai le tele o faamanuiaga ma le finagalo malie o Ieova.—Mala. 3:10; Epe. 6:10.