Ia Tufatufaina Atu i se Tulaga Matuā Lautele le Tala o le Malo Nu. 35

¹ O Oketopa ma Novema o le a avea o ni masina e pisi tele mo i tatou uma. I uluai aso e 11 o Oketopa, o le a tatou ofoina ai kopi o Le Olomatamata ma le Ala Mai! Ona amata lea i le Aso Sa, Oketopa 12, e oo i le Aso Sa o Novema 16, o le a tatou aufaatasi ai i le lalolagi aoao i le tufatufaina atu o le Tala o le Malo Nu. 35. O lea o se faaeaga mo i tatou le faaooina atu o se feau tāua i tagata uma i la tatou oganuu. O le tali lea i le fesili, “Pe Iai ea se Taimi o le a Fealofani ai Tagata Uma?” I le taimi o lenei tauiviga faapitoa, o le a tatou tufatufaina atu ai le Tala o le Malo Nu. 35 i aso o le vaiaso. I faaiuga o vaiaso, e faaopoopo atu i le tufatufaina atu o le Tala o le Malo, o le a tatou faatomuaina ai foi ma lomiga fou o mekasini.

² O Ai e Mafai Ona Faia ai se Sao? E pei lava ona masani ai, o toeaina o le a taimua i le galuega. E fiafia tagata uma lava e tufatufaina atu le Tala o le Malo, ma e lē taumatea o le a matuā toatele le au talaʻi o le a avea ma paeonia lagolago i se masina se tasi po o masina uma foi e lua o le tauiviga. O le a mananao foi isi tagata talaʻi e faatele atu se taimi e faaalu i le faiva nai lo o le mea e masani ai.

³ E iai sau tagata suesue o le Tusi Paia o lē o loo solosolo lelei lana suesuega i le tusi o Le Poto ma ua lē pine ae agavaa e auai i le auaunaga i le fanua? Atonu e mafai ona avea o ia ma tagata talaʻi e lei papatisoina i le taimi lea ina ia auai i le tauiviga o le tufatufaina atu o le Tala o le Malo. E pau lava le mea e manaomia, o se taulimaga faigofie e faailoa atu ai le sāvali. Mo se faaaoaoga, e mafai ona faapea atu se tasi: “O lenei feau e matuā tāua tele, o lea ua tufatufaina atu ai i lenei masina i le lalolagi aoao i gagana e 169. Ma ou te manao e avatu lau kopi lea.” E oo lava i le fanau laiti e mafai ona latou faia se sao lelei i lenei galuega faafiafia loto.

⁴ E tatau i le au fai suesuega o Suesuega Tautusi ona faalaeiau tagata uma o lana vaega ina ia faia se sao atoatoa i le tufatufaina atu o le Tala o le Malo Nu. 35. Atonu o iai foi ni tagata talaʻi ua lē toe talaʻi o le a auai i le auaunaga pe afai e latou te mauaina faalaeiauga manaomia. A o loma le tauiviga, e tatau i toeaina ona asiasi atu ia i latou nei taitoatasi ina ia iloa ai po o le ā se mea e mafai ona faia e fesoasoani ai ia i latou ina ia ō faatasi ma tagata talaʻi tomai i lenei vala o le faiva.

⁵ O Afea e Mafai Ona Tatou Feiloai ai mo le Auaunaga? O nei gaoioiga uma o le a manaomia ai ona faia ni fuafuaga fetaui ma talafeagai a vaega mo le molimau atu. Pe afai e mafai, e tatau ona faamaopoopoina faatasiga mo le auaunaga mo aso taitasi o le vaiaso, i faaiuga o vaiaso, ma afiafi. E tatau ona faia ia faatasiga i taimi o le a mafai ai e tagata talaʻi ma paeonia ona faaaogā atoatoa le taimi mo le molimau atu. E tatau foi ona faia ni fuafuaga ina ia feiloai i afiafi faatatau mo tamaiti aʻoga, tagata faigaluega i taimi fesuiai, ma isi. E tatau i le ovasia o le auaunaga ona faamautinoa o loo tele oganuu mai lea fale i lea fale ma pisinisi, ina ia mafai ai e tagata uma ona faia atoatoa se sao i le galuega. Pe afai e toatele le au talaʻi i se vaipanoa, e tatau ona faaalia le faautauta i le pe toafia e galulue i se vaega o le oganuu ua tofia atu.

⁶ Ae Faapefea Fale e Lē Maua Atu i ai ni Tagata? E tatou te mananao e talanoa totino atu i le toatele o tagata o aiga e mafai ona maua ina ia faamatala atu i ai le mafuaaga e tatau ai ona latou faitauina le Tala o le Malo Nu. 35. O lea, afai e leai se tasi i le fale i le taimi e te asiasi atu ai, tusi i lalo le tuatusi ma toe foi atu e asi i se isi taimi o le aso. Pe afai ua oo i le vaiaso faaiu o le tauiviga ae lei manuia lava au taumafaiga e faafeiloaia na tagata, e mafai ona e tuua ai se kopi o le Tala o le Malo i le faitotoa o le fale i se mea e lē mafai e se tagata ese e ui ane ai ona iloa atu. I vaipanoa e nonofo ai tagata, ia mataalia e ofo atu le Tala o le Malo i tagata atonu o savavali i le auala. Pe a galueaina nofoaga e mamao ese ma le taulaga ma mea e sili atu ona telē le oganuu e galueaina nai lo o le mea e mafai ona galueaina i le taimi o le tauiviga, e mafai ona tuu ai se kopi o le Tala o le Malo i se fale e lē maua atu i ai se tasi i le uluai asiasiga.

⁷ O le ā lo Tatou Sini? Ia taumafai faapotopotoga ina ia faaaogā uma la latou sapalai o Tala o le Malo ina ia soo ai a latou oganuu uma a o lei faaiuina le tauiviga ia Novema 16. Afai e telē naʻuā le oganuu a la outou faapotopotoga ma pe afai e saogalemu ona e galue toatasi nai lo o le galulue ma se paga, atonu e lelei ona faia faapea. O le avanoa lenei o le a mafai ai ona e oo atu ma le tala lelei i le toatele o tagata ua tatau e te mafaia ona oo atu i ai. (Mata. 10:11) Atonu e lelei ona uu ni nai sāvali ma se Tusi Paia i totonu i lau taga po o se tamai ato, nai lo o le faaaogā o se ato taʻitaʻi. Ia faamautinoa ua faamaumau lelei ni tagata na faaalia le fiafia.

⁸ Ua E Sauni e Amata? E tatau i toeaina ona fuafua pe fia ni mekasini faaopoopo e manaomia e le faapotopotoga, ona ota faatatau lea e tusa ma mea e manaomia. E lē manaomia ona otaina ni Tala o le Malo Nu. 35, talu ai ua aauina atu tusaga mo faapotopotoga taitasi. O paeonia faapitoa, sauatoa, ma paeonia lagolago o le a taʻi 250 kopi a le tagata e toatasi e tufatufa atu, a o tagata talaʻi o le faapotopotoga o le a tufa atu i ai le taʻi 50 kopi a le tagata. O lea ua uma ona tofia atu la tatou galuega. Po o e naunau e faia se sao i lenei galuega faafiafia loto? E lē taumatea lou fiafia. Seʻi o tatou faaoo atu le feau tāua e faavae i le Tusi Paia lea o loo i le Tala o le Malo Nu. 35 i le tele e mafai ona tufatufaina atu ai!