E Tatau Ona Avea i Tatou o ni Faiaʻoga, ae Lē na o ni Tagata Talaʻi
1 Ua matauina faapea “ua ufitia moni e Molimau a Ieova le lalolagi i la latou molimau atu.” Ua faapefea ona mafai lenei mea? E lē o se malosi faaletagata, ae ala i le agaga o le Atua o loo galue i ana auauna a o latou faaaogaina sauniuniga eseese e faataunuu ai lo latou tofiga o le talaʻi ma aʻoaʻo atu.—Saka. 4:6; Galu. 1:8.
2 O lomiga ua lomia o se auala uigā lea e faataunuuina ai la tatou galuega talaʻi. A o faagasolo tausaga, e faitau piliona tusi, tamaitusi, polosiua, mekasini, ma sāvali ua lomia ma tufaina atu e Molimau a Ieova e fesoasoani e faalauiloa ai le tala lelei o le Malo. O lipoti i le 1997 Yearbook ua faaalia ai e faapea o lomiga ua saunia ua oo atu i se tulaga maualuga e lei ausia muamua. I le taimi nei e silia i le 91 miliona kopi o le New World Translation ua lomia. I le tausaga e tasi o le faitau aofai o mekasini o Le Olomatamata ma le Ala Mai! ua lomia i le Iunaite Setete ua faateleina i le 7.1 pasene. I Siamani, o mekasini ua saunia ua faateleina i le 35 pasene. E silia i le tasi vae tolu o mekasini ua saunia iina e mo oganuu o Rusia.
3 Aisea e matuā manaomia ai lomiga? I le lalolagi aoao, e maoae se tali atu i le faalaeiauga ua aumai mo i tatou ia molimau atu i so o se mea e maua i ai tagata. Ma i le faatoateleina o i tatou o loo faalautele atu la tatou galuega molimau—i nofoaga faitele, i magaala, ma oganuu e iai pisinisi—ua faateleina ai le aofaiga o lomiga ua tuuina atu i tagata o ē e faaalia sina fiafia. O le toatele o i latou nei e itiiti se avanoa pe afai na iai, na faalogo muamua ai i le feau o le Malo. Ina ia faafetaiaia lenei manaoga, ua iai pea i faapotopotoga lomiga eseese mo le faaaogaina i vala uma o le faiva.
4 O le ā lo Tatou Sini i le Tufaina Atu o Lomiga? O lo tatou sini e lē na o le tuuina o lomiga. O le tofiga o le fai ma soo e aofia ai vala e lua—talaʻi ma le aʻoaʻo atu. Muamua, ua ia i tatou le faaeaga o le talaʻiina atu o le tala lelei o le Malo, ina ia iloa ai e tagata faapea ua na o le pau lea o le faamoemoe mo le fanau a tagata. (Mata. 10:7; 24:14) O a tatou lomiga faale-Tusi Paia ua faamaonia mo se taimi umi lona aogā ma le uigā i le faaoso naunau ma le faailoaina atu o le poto e faatatau i le Malo i isi.
5 Lona lua, pe afai tatou te faia soo, e tatau ona tatou aʻoaʻo atu mea uma na faatonu mai e Iesu. (Mata. 11:1; 28:19, 20) O lea foi la, ua faia e lomiga se matafaioi tāua i le faagotoina ifo o le upu moni i totonu o loto o tagata aʻoga, e fesoasoani ai ia i latou e avea ma soo.
6 O i latou o ē taliaina lomiga e ono avea ‘o ni ē e faalogologo i le upu,’ ae atonu o le a lē avea o ni ē e anaana i ai pe afai e leai se tasi e fesoasoani ia i latou. (Iako. 1:22-25) E toaitiiti o le a lē avea lava ma ni soo seʻi vaganā ua taitaiina e se tasi i latou. (Galu. 8:30, 31) E latou te manaomia se faiaʻoga e fesoasoani ia i latou e faamaonia ia i latou lava le upu moni lea ua maua i le Tusi Paia. (Galu. 17:2, 3) O lo tatou sini o le fesoasoani ia i latou e agaigai i luma i le tulaga o le tuuina atu ma le papatisoga ma toleni i latou e avea ma ni ē lava le agavaa e aʻoaʻoina ai isi.—2 Timo. 2:2.
7 O le Manaoga Sili o le Faateleina o Faiaʻoga: Pe a tatou talaʻi atu, o loo tatou folafolaina atu le tala lelei i le lautele. Ae peitai, o le aʻoaʻo atu e aofia ai le aʻoaʻoina faasolosolo o se tasi. O le talaʻi atu e iloa ai e tagata le feau o le Malo, a o le aʻoaʻo e fesoasoani ai i tagata taitoatasi e taliaina le tala lelei ma gaoioi e tusa ai. (Luka 8:15) O se faiaʻoga e tele atu isi mea na te faia nai lo le folafola atu; na te faamatalaina, e faamalamalama e ala i mafuaaga e lagolagoina ai, avatu faamaoniga e faatalitonu ai, ma e naunautai.
8 O le toatele lava o i tatou e tatau ona mafai ona avea ma faiaʻoga, ae lē na o ni tagata talaʻi. (Epe. 5:12a) O le tufatufaina atu o lomiga o se vaega tāua lea o la tatou galuega, ae o le faataunuuina o le vala lona lua o la tatou faiva e matuā faalagolago lava i le mea tatou te faia o ni faiaʻoga. E ui e mafai ona tatou fiafia pe a mafai ona tatou tuuina atu lomiga, ae ina ia faataunuuina atoatoa ai la tatou faiva, e lē tatau ona tatou manatu i le tuuina o mekasini o so tatou sini mulimuli. (2 Timo. 4:5) O le tuuina atu o lomiga o se auala uigā i le tatalaina atu o le faitotoa i avanoa e aʻoaʻo ai le upu moni i isi.
9 Faia o Toe Asiga e Amata ai Suesuega Faale-Tusi Paia: O i tatou uma lava atonu ua tufatufaina atu le tele o tusi, polosiua, ma mekasini, ua maua ai se lisi o toe asiga. E tatau ona faia se faasologa o taimi patino e toe foi ai e ati ae le naunau. O la tatou fuafuaga autū o le toe foi atu e lē na o le tau ina toe tuu ai nisi lomiga ae ia faamalosia tagata e faitau ma maua ai aogā mai mea ua uma ona latou iloa. O le ā le tele o se agaigai i luma faaleagaga na semanū e mafai ona tatou faia pe ana faapea e lē asiasi mai pea lava pea se tasi e fesoasoani ia i tatou ina ia maua le poto saʻo?—Ioa. 17:3.
10 Ia tuliloa i latou uma e naunau, faatasi ai ma se vaaiga e amata se suesuega faale-Tusi Paia i le polosiua O le ā e Manaomia e le Atua Mai ia i Tatou? po o le tusi o Le Poto e Taʻitaʻia ai i le Ola e Faavavau. O nei lomiga e lua ua faailoa ai le feau o le Malo i se uiga e faigofie ona malamalama i ai. O le polosiua o le Manaomia ua iai se polokalame lava saunia mo suesuega, ua faaaofia ai aʻoaʻoga faavae o le Tusi Paia. O le tusi o Le Poto ua fesoasoani i se tasi e aʻoaʻo le upu moni i ni faamatalaga e sili atu ona auiliili, e faigofie, manino, ma pupuu.
11 O le faafaigofieina o le polokalame tau aʻoaʻoga, e pei ona faamatala mai i le faaopoopoga o La Tatou Faiva o le Malo o Iuni 1996, ua faafaigofie ai mo le faiaʻoga ona aʻoaʻo atu ma aʻoaʻoina e le tagata aʻoga. Ia teuina se kopi o lena faaopoopoga i se mea e faigofie ai ona maua ma toe autalu ai metotia ma auala ua faamaonia le aogā i le aʻoaʻo atu. O nisi o fautuaga na aumai e le faaopoopoga e aofia ai le auala e faaalia ai le naunau moni totino i le tagata aʻoga, le umi o le mataupu e aofia i le talanoaga e tasi, le auala e taulimaina ai fesili e lē o aafia i le mataupu, le auala e mafai ai uma e le faiaʻoga ma le tagata aʻoga ona sauniuni mamao mo le suesuega, ma le auala e tataʻi ai le tagata aʻoga i le faalapotopotoga a Ieova. E ala i le mulimuli atu i fautuaga, o le toatele lava o i tatou, e aofia ai ē fou, o le a mafai ona faia se suesuega agaigai i luma.
12 Lipoti o le Taulau Manuia Mai le Fanua: O le polosiua Manaomia ma le tusi o Le Poto ua faamaonia o ni fesoasoani tāua i le faatelevaveina o le agaigai i luma o le faia o soo. Ina ua mauaina le polosiua o le Manaomia, o lea na faaaogā ai loa e se uso i Polivia lenei tusi e amata ai se suesuega ma se tamaloa. I le fa masina mulimuli ane ai, i le tauaofiaga itumalo, na iai lenei tagata aʻoga ia i latou o sui olioli na papatisoina!
13 O le toatele ua uunaia e tuutoina atu o latou ola ia Ieova ina ua uma ona latou suesueina atoatoa le tusi o Le Poto. I se tasi faapotopotoga i Angola, o le aofai o suesuega faale-Tusi Paia e faia e tagata talaʻi ua faateleina nei mai le 190 i le 260 ma o aofia o sauniga ua faaluaina le fuainumera mai le 180 i le 360 i le na o le fa masina ina ua amata ona faaaogaina le tusi o Le Poto i lena vaipanoa. E lei leva lava ae manaomia loa ona faia se isi faapotopotoga.
14 Ina ua uma ona amata lana uluai suesuega i le tusi o Le Poto, na faapea mai le tasi uso o le faia o le suesuega e “faigofie pe afai e faia na o fesili e le faiaʻoga, ia faitau ni nai mau e ono faatatauina, ma faamautinoa ua malamalama le tagata aʻoga.” E ui lava e masani ona ia lagona faapea na o tagata talaʻi agavaa e mafai ona faia ni suesuega faale-Tusi Paia agaigai i luma ma e lē tāitai ona ia mafaia, ae na ia iloa ane e na te mafaia, i le faapea mai: “Pe afai ou te mafaia, e mafai foi e so o se isi.”
15 E ala i le faia o suesuega faale-Tusi Paia o se vaega o la tatou faiva tatou te faataunuuina ai le sini autū o le faia o soo. O i latou ua atiina ae le tomai i le faia o se sao i lenei vala o le faiva ua latou iloa ai le faamalieina moni ma le matuā faaoaina. Talosia ia faapea foi i tatou o ē o loo “talaʻi le malo o le Atua, ma aʻoaʻo atu i mea a le Alii o Iesu Keriso ma le faamalosi lava.”—Galu. 28:31.