La Tatou Faiva—Se Faaaliga o le Alofa Moni
1 E ala i la tatou faiva, ua tatou faaalia ai lo tatou usiusitai i poloaiga aupito sili e lua. (Mata. 22:37-39) O lo tatou alofa mo Ieova ua uunaia ai i tatou ina ia talanoa atu ma le mautinoa e uiga ia te ia. O lo tatou alofa mo o tatou tuaoi e uunaia ai i tatou e faalaeiauina i latou ina ia saili i le poto e uiga i le finagalo o le Atua ma ana fuafuaga, ina ia mafai ai ona latou alolofa ia Ieova e pei o i tatou, ma oo ai i latou i se tulaga mo le mauaina o le taui o le ola e faavavau. O lea la, e ala i la tatou faiva, ua tatou āva ai i le suafa o Ieova ma tufa atu le faamoemoe tautele o le Malo i o tatou tuaoi. Ioe, o la tatou faiva o se faaaliga lea o le alofa moni i le Atua ma tagata.
2 O lo tatou alofa ua uunaia ai i tatou e talanoa atu i ituaiga uma o tagata i tulaga eseese uma o le olaga. (1 Kori. 9:21-23) O se faataitaiga: I luga o se vaalele, na nofo ai se toeaina Kerisiano i tafatafa o se patele Katoliko Roma. Na faatalanoa e le toeaina le patele e ala i le fai atu o ni nai fesili tomai faatupu manatu ma tataʻi atu loa le talanoaga agaʻi i le Malo. E oo ane i le taimi o le a alu ese ai le patele mai le vaalele, ua ia talia nisi o a tatou tusi se lua. Maeu se iuga lelei o le faailoaina e le toeaina o le alofa moni i lona tuaoi!
3 O le Alofa Moni ua Uunaia ai i Tatou e Talaʻi: O i latou o loo faia se sao i le galuega o le paeonia lagolago ma le faataimi atoa, e mautinoa lava o loo faaalia le alofa moni i le Atua ma tuaoi. O loo faataulagaina e lē aunoa e paeonia o latou taimi ma le malosi e avatu ai le fesoasoani faaleagaga i isi. O le ā ua uunaia ai i latou e faia lenei mea? Na faapea mai se tasi paeonia: “Ua ou iloa o le alofa, o se fua lea o le agaga o le Atua. O lea, ana aunoa ma lea alofa, semanū ou te lē iai i le upu moni, ma ou te lē taulau manuia ai i le avea o se paeonia. O le alofa, ua mafai ai ona ou manatu mamafa i tagata, amanaia o latou manaoga, ma ua ou talisapaia ai le tali mai o tagata i le faaalia atu o le alofa.” Na faaalia e Iesu se alofa faapena i tagata. I se tasi taimi ina ua ō atu o ia ma ona soo ua vāivai i se mea e ‘mapu aʻe teisi ai,’ na muamua atu le motu o tagata ia te i latou. O le ā na faia e Iesu? ‘Ona o le mutimuti vale o lona alofa ia te i latou,’ sa ia faagalo ai ona manaoga totino ina ia mafai ‘ona aʻoaʻo atu ia te i latou i mea e tele.’—Mare. 6:30-34.
4 E oo lava foi pe a teena e tagata le tala lelei lea o loo tatou talaʻiina atu, e tatou te lagona ai se olioli i o tatou loto i le iloa e faapea, ona o le uunaiga a le alofa, ua tatou faia ai le mea e sili ona lelei e fesoasoani atu ai ia te i latou ina ia maua le faaolataga. Pe a faamasinoina i tatou uma e Keriso i se taimi mulimuli, o le a matuā faafiafiaina i tatou ona sa tatou faaalia le alofa moni i le ‘faataunuuina atoatoa o la tatou faiva.’—2 Timo. 4:5.