Ia Totō i Loto o Isi le Faamoemoe o le Ola e Faavavau
1 E ui lava i sailiiliga a le tagata mo ni auala ina ia faatuatuai ai le faasolosolo ina tagata matua ma faaumiumi ai lona soifua, ae ua lē mafai lava ona taofia le olaga matua ma le oti. Maeu lo tatou loto faafetai ona ua faamatala mai e le Tusi Paia le pogai ua ola matutua ai tagata ma feoti, faapea foi ma le auala o le a aveesea ai le olaga matua ma soloiesea ai le oti. O nei upu moni o loo aumaia ma le mautinoa i le tusi, o Le Poto e Taʻitaʻia ai i le Ola e Faavavau. Ua tali manino mai e le tusi ia fesili e sili ona lavelave e uiga i le ola ma le oti, i le faasino atu lea i lē o faitauina le tusi le taimi o le a toe faafoisia mai ai le Parataiso.
2 Ia Mati, o le a tatou ofoina ai le tusi o Le Poto faatasi ma le sini o le amataina ai o ni suesuega faale-Tusi Paia. (Mata. 28:19, 20) Ona sosoo ai lea ma lo tatou toe asia o i latou uma o ē na faaalia le fiafia i le feau o le Malo. I lenei auala, o le a mafai ai ona tatou totō i loto o isi le faamoemoe o le ola e faavavau. (Tito 1:2) I le faatinoina o lenei mea, atonu o le a e iloa ai le aogā o fautuaga nei.
3 Pe a faia le uluai asiasiga, e mafai ona e fesili atu faapenei:
◼ “Pe sa e tau mānatu pe aisea ua moomoo ai tagata mo se olaga faaumiumi? [Faatali mo se tali.] O tagata lotu Puta, tagata Kerisiano, Hinitu, Musalimi, ma isi, e iai uma lava le faamoemoe mo se ola pe a mavae le oti.” Suʻe le tusi o Le Poto i le mataupu e 6, “Aisea ua Tatou Ola Matutua ai ma Feoti?” ma faitau le palakalafa e 3. Talanoa i mau o loo taʻua ai. Tagai i fesili e lua o loo i le faaiuga o le palakalafa ma fesili i lē ona le fale pe na te fia iloa tali i na fesili. Afai e manao ai, ona faaauau lea ona talanoa i nai isi palakalafa na e sosoo ai. Ma ua amataina ai iina se suesuega! A lē o lena, tuu i ai le tusi e faitau lava ia i ai, ma fai se fuafuaga e toe foi atu e talanoa i tali o fesili, ma e lelei ona faia faapea pe a mavae se aso se tasi po o se lua.
4 Pe a toe asia se tagata na tuu ai se tusi o “Le Poto,” e mafai ona e faapea atu:
◼ “O lea ua ou toe foi mai e ta te talanoa i fesili e lua e uiga i le oti lea na ta tuua e lei taliina.” Faamanatu i lē ona le fale ia fesili. Ona talanoa lea i faamatalaga na e aumai i le mataupu e 6 i lalo o le ulutala “Se Faufauga Leaga.” E faalagolago i tulaga pe faaauau le suesuega pe faaaogā le fesili mulimuli i le faaiuga o le palakalafa e 7 e faataatia ai se faavae mo le isi toe asiga. Fai ni fuafuaga maʻoti ina ia toe foi atu. Tuu atu i lē ona le fale se pepa valaaulia e faailoa ai le taimi o sauniga, ma faamatala puupuu i ai le auala e faia ai sauniga a le faapotopotoga. Ia valaaulia ma le mafana o ia ina ia auai.
5 Po o le galuega i le fale i le fale po o le molimau atu lē fuafuaina, e mafai ona e amata se talanoaga i lou faapea atu:
◼ “Pe sa e tau mānatu po o le ā se mea o taatia mai i le lumanai mo i tatou, faapea ma le lalolagi? [Faatali mo se tali.] Ua aotele e le Tusi Paia le lumanai i le upu e tasi—Parataiso! Ua faamatala mai ai e faapea, i le amataga, na faia ai e le Atua se vaega o le lalolagi e avea ma parataiso matagofie na ia tuu ai le ulugalii faaletagata lea na ia faia. Sa tatau ona la faatumuina le lalolagi atoa, ma faasolosolo mālie ona faaliliuina e avea o se parataiso. Seʻi mātau foi le faamatalaga lenei i le tulaga atonu sa iai lea parataiso.” Suʻe le tusi o Le Poto i le itulau e 8, ma faitau le palakalafa e 9, i lalo o le ulutala “Le Olaga i le Parataiso.” Ona talanoa lea i manatu i le palakalafa e 10, ma faitau le mau o loo taʻua ai, Isaia 55:10, 11. Fai i ai e mafai ona faaauau le talanoaga e uiga i le ituaiga o olaga o le a iai i le Parataiso ua toe faafoisia ma ia faaaofia faatasi ai le palakalafa e 11-16. Pe faalaeiau foi le tagata e faitau i ai o ia lava, ma fai se fuafuaga e toe asiasi atu ma talanoa i ai.
6 Afai e lei amataina se suesuega i le taimi muamua, e mafai ona e taumafai e faia faapea pe a faia le toe asiga i lou faapea atu:
◼ “E pei ona ta talanoaina i la ta talanoaga talu ai, o le fuafuaga lea a le Atua ina ia faaliliuina le lalolagi atoa e avea ma parataiso. O lea, ua lāgā ai le fesili, O le a faapeī le Parataiso?” Suʻe le tusi o Le Poto i le mataupu 1, ma suesue le palakalafa e 11-16, i lalo o le ulutala “Le Olaga i le Parataiso ua Toe Faafoisia Mai.” A uma lena ona faaali lea i ai o le ata i le itulau e 4-5, ma fesili i le tagata pe fia ola i ni siomaga matagofie faapena. Ona faitau lea o le fuaiupu muamua o le palakalafa e 17 i le itulau e 10. E faalagolago lava i tulaga pe faaauau le suesuega pe faapea atu, i le isi au asiasiga o le a e faamatala atu ai le mea e manaomia ona fai ina ia mafai ai e se tasi ona ola i le Parataiso lea o le a toe faafoisia mai. Tuu ai se pepa valaaulia e faailoa ai le faasologa mo le taimi o sauniga, ma valaaulia ma le mafana le tagata ina ia auai i le sauniga i le Maota o le Malo.
7 O le tusi o Le Poto, o se mea faigaluega lea e sili ona lelei e faaaogā e faailoa atu ai i isi “le ola e faavavau” ua folafolaina mai e le Atua. O lou faia o suesuega faale-Tusi Paia i aiga ma tagata, e mafai ona totō ai i o latou loto lenei faamoemoe matagofie ua faagaeeina e le Atua ‘o lē e lē mafai ona tala pepelo.’