Fili Mataupu e Fetaui ma Manaoga Faapitoa o Tagata
1 I le pei o tagata fanafana ū o ē e faʻata atu ma le faaeteete a latou ū, e toatele tagata talaʻi ma paeonia i le faapotopotoga o loo olioli i le matuā taulau manuia i le faaaogaina o mataupu na filifilia mai Le Olomatamata ma le Ala Mai! e fetaui ma manaoga patino o tagata i la latou oganuu. Ua latou fuafuaina po o ai o le a sili atu ona fiafia e faitauina nisi o mataupu patino mai mekasini. E faapefea ona latou faia o lenei mea?
2 Muamua latou te faitauina atoa lomiga taitasi. Ona latou fesili ifo lea ia i latou lava, O le ā le ituaiga o tagata o le a fetaui i ai ia mataupu taitasi? Ona fai loa lea o se taumafaiga e asiasi atu i tagata taitoatasi o ē o le a faapena ona fiafia e faitau i lena mataupu. Pe a iloa e iai se lomiga patino e matuā fiafia i ai tagata i la latou oganuu, ona latou otaina lea o ni kopi faaopoopo.
3 E Matuā Talisapaia Lava a Tatou Mekasini: O se tasi o tamaloa e fai sana tusiga i a tatou mekasini, o lē e faigaluega i se mekasini faava-o-malo e sili ona alumia i Nigeria, na ia faapea mai e uiga i le Ala Mai!: “E faamālō atu i le mekasini ua aupito sili ona alumia i le lalolagi.” Na matauina e se tagata e fiafia e faitau pea i a tatou mekasini e faapea: “Maeu ni oloa tāua o le atamai uigaese! E tai leai lava se mataupu ou te fiafia i ai e lē maua i nei mekasini.”
4 O loo talanoaina i mekasini le anoanoai o mataupu, e aofia ai le Tusi Paia, mea tutupu i le lalolagi, popolega o aiga, faafitauli o le olaga lautele, talafaasolopito, faasaienisi, olaga o manu ma laau, ma le anoanoai o isi mea. E mautinoa lava le sili atu ona fiafia o le tagata e faitau i se mea pe a ia iloa e fesootai atu ma ona manaoga, ona tulaga, po o lana galuega. Talu ai e tatou te talanoa atu i le toatele o tagata eseese, e tofu ma le mea e fiafia faapitoa i ai ma faafitauli, o le filifilia la o ni mataupu e talafeagai faapitoa ma manaoga o tagata tatou te feiloai i ai, e matuā aogā lava.
5 Mātau le mea na tupu ina ua ofo atu e ni Molimau se toalua le lomiga faa-Peretania o le Ala Mai! o Setema 8, 1996, i se tagata e faia tala o se nusipepa. Na ia tusi mai e faapea: “Ae ou te lei fai atu ou te lē fiafia, na faapea mai se tasi o i laʻua: ‘E iai se mataupu e faatatau i tagata Initia Amerika. Ma te iloa sa tele lava ni au tusitusiga na faia e faatatau i lena mataupu.’” Na ia ave le mekasini ma i le taimi o le taumafataga o le taeao, na ia faitauina ai le mataupu e uiga i tagata Initia, ma mulimuli ane sa ia faapea mai o se mataupu “sa sili ona lelei” ma e “matuā moni lava.”
6 O ā Mataupu e Fiafia i ai Tagata i Lau Oganuu? O ā ni mataupu na e vaai i ai i mekasini i masina na seʻi mavae atu atonu e fetaui mo faatauoloa ma tagata faigaluega i ni matātā faapitoa i lau oganuu po o ou tuaoi, tagata tou te faigaluega faatasi, ma aʻoʻoga faatasi? O le ā e sili ona fetaui lelei ma loia, faiaʻoga, tagata faufautua i mataupu tau i aiga ma aʻoga, tagata faufautua mo talavou, i latou e auauna mo tagata lautele, ma i latou e galulue faafomai? O le manatunatu i tagata e te talaʻi atu i ai a o e iloiloina lomiga taitasi, o le a e maua ai auala e sili ona lelei e faasalalau atu ai le upu moni.
7 Pe a e maua se tagata e faaalia le naunau faapitoa i se mataupu i Le Olomatamata po o le Ala Mai! ma o sē e talia le mekasini, e mafai ona e faapea atu: “Afai e iai se mataupu i lomiga ia o loo i le lumanai ou te iloa e te fiafia foi i ai, o le a ou fiafia lava e aumai se kopi ma oe.” Atonu e mafai ona e faaopoopo lea tagata i lau āla mekasini, e te asiasi atu pea i ai ma mekasini fou. E faapena foi le mea lea ua uma ona faia e mauaina ai se avanoa lautele ina ia toe asia tagata o ē atonu e fiafia faapitoa i nisi o mataupu o loo i a tatou mekasini.
8 Ia Iai se Sini Faaleagaga: I ni nai tausaga ua mavae, na maua ai e se tamaloa e alu tele le ulu i lana galuega, se mekasini o le Ala Mai! o loo iai se mataupu na faafiafiaina ai o ia. Ae peitai, o lenei tamaloa mapolotu, sa ia faitauina foi le soa o le mekasini, Le Olomatamata, lea na iai se mataupu na uunaia vave ai o ia ina ia faasaʻoina le talitonuga ua leva ona ia talitonu i ai, o le Tolutasi. I le ono masina mulimuli ane, na papatisoina ai o ia! O lea la, aua le faalotolotolua e faaaofia le au faitau i a tatou mekasini i ni talanoaga faale-Tusi Paia. E mafai ona e faailoa atu le polosiua O le ā e Manaomia e le Atua Mai ia i Tatou? ma fai i ai e laitiiti lava ni nai minute e faaaluina i le talanoaina o se lesona e tasi i taimi taitasi e te toe foi atu ai ma ni kopi fou o mekasini.
9 Ia manatunatu lelei po o ai i au toe asiga ma tagata faipisinisi na e feiloai atu i ai o le a sili atu ona talisapaia le mauaina o lomiga fou o Le Olomatamata ma le Ala Mai! Ona fai loa lea o se taumafaiga faamaoni ina ia oo atu ia i latou. Ia tufa atu nei mekasini tāua i le toatele o ni tagata e mafai ona e feiloai atu i ai. Ma aua lava neʻi galo o lou tauivi e fesoasoani atu i nisi tagata e toatele ina ia faitau i a tatou mekasini, ua e ‘lafo atu ai au mea ʻai i luga o le vai.’ I se taimi, o le a mafai ai ona e taulau manuia i le mauaina o soo fou i le lumanai.—Fai. 11:1, 6.