Po o le a Avea Aokuso o se Masina e Tulaga Ese?
1 O le tausaga e 1963, o se tausaga sa tulaga ese mo tagata o Ieova. E te iloa aisea? Auā o le tausaga lena na ausia ai e le aofaiga o le autalaʻi i le lalolagi aoao se matātia e tasi le miliona. Afai sa e iai i le upu moni i lena taimi, atonu la o e manatua le maeu o le olioli na oo ia i tatou ina ua maua ni tagata se toatele e talaʻia le feau o le Malo! I le taimi nei, o le toatele lena ua iai le autalaʻi i le na o le Iunaite Setete lava ia, ma ua tatou maua foi le tusa ma le 700 o le autalaʻi i atunuu o loo i le vaavaaiga a le lālā i Samoa. Ae peitai, i masina taitasi, o loo iai pea nisi o i tatou e lē o tuuina atu ni lipoti o ni sao na faia i le faiva.
2 Ia Talia le Luʻi: Ia Aokuso, o loo tatou faia ai se taumafaiga ina ia ausia se tumutumuga mo taimi uma lava, mo le 700 o tagata talaʻi mo le lālā i Samoa. Afai e taulau manuia a tatou taumafaiga, o le a avea moni lava la Aokuso o se masina e tulaga ese! E mafai ona tatou faia lenei mea pe afai e tofu sao i ai i tatou uma.
3 O i latou o fuafua mo ni faiga malologa e mafai ona faaalu se taimi i le faiva a o lei alu. Alu ma ave ni au sāvali, polosiua, po o ni mekasini ina ia mafai ai ona e molimau atu i tagata e tou te feiloai i lau faiga malologa. I le mea foi o le a e faataunuu i ai, e mafai ona e olioli i le faia o se sao i le faiva faatasi ma le autalaʻi o lena vaipanoa.
4 Afai ua iai se faaletonu i lou tino ma ua faafaigata ai ona e gaoioi, e mafai lava ona e faia se sao i le faiva. Atonu e mafai ona e molimau atu i fomai, tamaitai tausi maʻi, po o i latou e asiasi atu. Ia pe atonu foi e mafai ona e molimau atu e ala i le tusia o se tusi pe ala i le telefoni atu.
5 E lē taumatea o le a talisapaia e nisi se fesoasoani ina ia faia se sao i le auaunaga i le fanua ia Aokuso. E tatau i toeaina, auauna o le faiva, ma fai suesuega ona faia se faatulagaga ina ia tuuina atu lenei fesoasoani. I mea uma lava, aua neʻi galo ona vave tuuina atu lau lipoti o le auaunaga i le fanua i le faaiuga o le masina ina ia faitaulia ai oe o se tagata talaʻi ia Aokuso.
6 Ia Faapelepele i le Faaeaga: O le faiva o se “mea lelei ua tuuina atu ia te oe.” (2 Timo. 1:14) E tatou te talisapaia le faaeaga ua tuuina mai ia i tatou e talaʻi le tala lelei. (1 Tesa. 2:4) Pe a tatou manatunatu i mea uma ua faia e Ieova mo i tatou, e tatau ona uunaia ai i tatou e faia se sao faifai pea i lenei galuega e sili ona tāua a o faagasolo le tausaga atoa. Aua neʻi faatagaina se mea e taofia ai i tatou mai le talaʻi e lē aunoa. Seʻi o tatou faia ia Aokuso o lenei tausaga ma masina tulaga ese i le auaunaga ia Ieova ma ia maumauai e molimau atu e uiga ia te ia i masina uma ia o loo mulimuli mai!—Sala. 34:1.