Avea Aokuso ma Masina Mataʻina o Galuega!

1. O le ā le tauiviga faapitoa o le a faia i le lalolagi aoao a o tatou tulata atu i le atoaga o le 100 tausaga o le Malo?

¹ Ua tulata atu nei i le atoaga o le 100 tausaga talu ona pule le Malo o le Atua. Maʻeu le talafeagai ona tatou faamamaluina o Ieova e ala i se tauiviga faapitoa. I le masina o Aokuso o le a tatou aufaatasi ai i se tauiviga faapitoa i le lalolagi aoao, e faaaogā ai le sāvali ua faamatuaina, O Fea e Tatou te Maua ai Tali o Fesili Tāua e Faatatau i le Olaga? O lenei sāvali o loo faalaeiauina ai le ʻaufaitau e saʻili atu i le Tusi Paia, ma le auala e fesoasoani mai ai le tuatusi i le initaneti o le jw.org.

2. E faapefea ona tatou saosaolaumea i le “alaga leotele i viiga o Ieova” lea o le a alagaina iā Aokuso?

² Alaga Leotele o Viiga: Ina ia fesoasoani i le ʻautalaʻi e faalautele atu la latou auaunaga, ua iai se sauniuniga faapitoa mo i latou e fia avea ma paeonia lagolago i le masina o Aokuso. I lenā masina e mafai e tagata talaʻi papatiso ona paeonia lagolago mo le 30 itula. E telē le avanoa e mafai ai e talavou aʻoga ma tagata faigaluega, ona avea ma paeonia lagolago i lenā masina auā e lima ona Aso Faraile, Aso Toonai ma Aso Sa. Pe afai e iai sau suʻesuʻega ua agaʻigaʻi i luma po o sou alo ua ausia agavaa e avea ai ma tagata talaʻi, ia faafesootaʻi loa le sooupu o le ʻautoeaina. Maʻeu le faalaeiauina o i latou pe a tatou galulue soosootauʻau i lenā masina faapitoa. E ui o le toʻatele o paeonia sauatoa e fai mālōlōga iā Aokuso pe a ausia o latou itula manaʻomia, peitaʻi e lelei ona toe iloilo ma fetuunaʻi a latou faasologa ina ia iai se sao atoatoa i lenei tauiviga faapitoa. O le taimi lenei mo aiga e soālaupule ai, po o le a faapefea ona latou saosaolaumea i le “alaga leotele i viiga o Ieova” lea o le a alagaina i le masina o Aokuso.—Esera 3:11; Faata. 15:22.

3. O le ā se mea e mafai ona ausia i lenei tauiviga faapitoa?

³ E ui i isi tauiviga i le taimi ua mavae, ae e tatou te faamoemoe o le a mataʻina atu lenei tauiviga. Pe e mafai ona tatou ausia se tumutumuga fou o itula, tagata talaʻi, ma paeonia lagolago iā Aokuso? A o faaiʻuina le tausaga faaleauaunaga i le 2014, e faamoemoe o le a faamanuia e Ieova taumafaiga a ona tagata i le lalolagi aoao, ma avea ai le masina o Aokuso ma masina mataʻina o galuega.—Mata. 24:14.