E Tatau Ona Tatou Asiasi Atu Pea Lava Pea
1 Pe sa e tali lelei atu i le uluai taimi na faatoʻā talanoa atu ai se tasi ia te oe e uiga i le tala lelei? Afai e leai, e tatau la ona e loto faafetai ona o le asiasi atu pea lava pea o Molimau a Ieova seia iu lava ina e talia le ofoina atu o se suesuega faale-Tusi Paia. E lelei pe a mafaufau i lena mea a o e galueaiina pea lau oganuu tofia.
2 O loo fesuisuiai pea olaga o tagata. O loo fesagai i latou ma faafitauli po o tulaga fou, faalogo i mea tutupu e faateʻia ai i le nuu po o le lalolagi foi, pagatia i le faaletonu o le tamaoaiga, po o le oo foi i maʻi po o se maliu i le aiga. O na mea e ono māfua ai ona latou mananao e fia iloaina le pogai mo nei mafatiaga uma. E tatau ona tatou iloa mea moni o loo mafatia ai mafaufau o tagata, ma oo ai ina tali lelei mai i se feau faamafanafana loto.
3 O se Galuega Laveai Lenei: Seʻi manatunatu i se aufaigaluega laveai i se nofoaga na tupu ai se mala. E ui lava atonu o loo saili pea nisi i se vaipanoa e toaitiiti ni tagata faasaoina na maua ai, ae latou te lē faavaivai ma ō ese ona ua maua e isi o latou tagata galulue nisi tagata o loo sao i se isi vaipanoa. E lei iai se faaaliga i la tatou aulaveai e faapea ua uma le galuega. I tausaga taitasi, e maua ai pea le faitau selauafe o ē e mananao ina ia sao mai “le puapuaga tele.”—Faaa. 7:9, 14.
4 “E faaolaina i latou uma o e valaau i le suafa o [“Ieova,” NW].” (Roma 10:13-15) O nei upu, e ao ona tāmau ai ia i tatou taitoatasi le manaoga ina ia maumauai pea e talaʻi atu. Talu ona amata galueaiina la tatou oganuu, ua tutupu aʻe tamaiti ma ua oo nei i le matutua ua mafai ai e i latou lava ona mafaufau loloto e uiga i lo latou lumanai ma le fuafuaga o le olaga. E leai se auala tatou te iloaina ai po o ai o le a iu ina faalogo. (Fai. 11:6) E toatele tagata na tetee muamua ua talia le upu moni. O lo tatou tiute, e lē o le faamasinoina o tagata, ae ia tuu atu pea se avanoa ia i latou e faalogo ai ma laveaiina mai lenei lalolagi tuai. E pei ona faia e uluai soo o Iesu, e tatau ona tatou ‘ō atu pea lava’ i tagata ma taumafai e faagaee lo latou fiafia i le feau o le Malo.—Mata. 10:6, 7.
5 O le mea moni faapea o loo iai pea le avanoa mo i tatou e talaʻi ai, o se faaaliga lea o le alofa mutimutivale o Ieova. (2 Pete. 3:9) A o tatou tuu atu le avanoa i isi e faalogo ai pea lava pea i le feau, ua tatou faatāuaina ai le alofa o le Atua, ma o le auala lenei tatou te vivii atu ai ia te ia.