E Mafai Ona Latou Iloa e Ese i Tatou

¹ I le tausaga ua mavae, e sili atu i le 300,000 tagata fou ua aufaatasi ma i tatou e ala i le papatisoina. O ā mea ua iloa e nei tagata e uiga i Molimau a Ieova ua māfua ai ona latou mananao e avea ma vaega o le faalapotopotoga a le Atua? Aisea ua tumatilatila ai i tatou e ese mai isi lotu uma? O nisi nei o tali manino:

—Tatou te pipii atu i le Tusi Paia na i lo o tatou lava manatu: Tatou te tapuai ia Ieova le Atua “i le agaga ma le [“upu moni,” NW],” e pei lava ona fetalai mai Iesu Keriso ina ia faia. O le uiga o lenei mea, o le teena lea o mea sese faalotu ae ogatasi ma le Afioga tusia a le Atua.—Ioa. 4:23, 24; 2 Timo. 3:15-17.

—Tatou te ō atu i tagata na i lo le faatalitali ia i latou e ō mai ia i tatou: Ua tatou talia le poloaiga a Keriso ina ia talaʻi ma aʻoaʻo atu, ma ua tatou faataitai i lana faaaoaoga o le sailia o ē loto faamaoni. Tatou te ō atu e saili i latou i o latou aiga, i ala tetele, po o so o se mea lava e mafai ona maua i ai i latou.—Mata. 9:35; 10:11; 28:19, 20; Galu. 10:42.

—Tatou te saunia taiala faale-Tusi Paia mo tagata uma e aunoa ma se totogi: Tatou te matuā faaaogaina a tatou alamanuia ma lo tatou malosi, tuuina atu le sili atu i le piliona itula i tausaga taitasi i le auaunaga a le Atua. I le lē faailogatagata, tatou te suesueina ai le Tusi Paia ma ituaiga uma o tagata.—Mata. 10:8; Galu. 10:34, 35; Faaa. 22:17.

—Ua aʻoaʻoina lelei i tatou ina ia avatu le fesoasoani faaleagaga i tagata: E ala i a tatou lava suesuega totino o le Tusi Paia ma aʻoaʻoga e tuuina mai i sauniga a le faapotopotoga, fonotaga, ma tauaofiaga, ua tatou maua ai se aʻoaʻoga faatiokarate matuā tāua faifai pea, lea ua mafai ona tatou faamalamalamaina ai isi i mea faaleagaga.—Isa. 54:13; 2 Timo. 2:15; 1 Pete. 3:15.

—Tatou te matuā faatāuaina le upu moni, ma faatatauina i o tatou olaga i aso taitasi: Ona o lo tatou alofa i le Atua, ua tatou faia ai suiga, ma faaogatusa ai o tatou olaga ma lona finagalo. O o tatou uiga fou e pei o Keriso, ua tosina mai ai isi i le upu moni.—Kolo. 3:9, 10; Iako. 1:22, 25; 1 Ioa. 5:3.

—Tatou te taumafai ia ola ma galulue faatasi ma isi i le filemu: O le atiina ae o uiga faaleatua ua fesoasoani ia i tatou e leoleoina a tatou gaoioiga ma a tatou upu e tautala ai. E tatou te ‘⁠sailia le filemu [ma tagata uma] ma tausisi i ai’.—1 Pete. 3:10, 11; Efe. 4:1-3.

² O faaaoaoga o le olaga faa-Kerisiano o loo vaaia e tagata i le faalapotopotoga a Ieova, ua uunaia ai le toatele e talia le upu moni. Tau ina ia avea a tatou faaaoaoga totino ma auala e faapena ona tosina mai ai i latou e iloa ma matauina i tatou.