Faavae Aʻe Lou Olaga i Vala Uma o le Auaunaga ia Ieova
1 Na faatusa e Iesu lana au faalogologo i ni tufuga se toalua. O le tasi na faavae aʻe lona olaga i luga o le papa o le gauai ia Keriso ma mafai ai ona tumau i afā o teteega ma puapuaga. O le isi na faavae aʻe i luga o le oneone o le manatu faapito ma le lē usitai, o lea na ia lē mafai ai ona tatalia omiga na oo ane. (Mata. 7:24-27) O le ola ai i lenei faaiuiuga o le faiga o mea, ua oo ai ia i tatou le tele o afā o faigata. Ua vave ona faaputuputu ma faaloloʻi mai ao pogisa o le puapuaga tele. Po o le a tatou tumau ea seia oo i le iuga ma lo tatou faatuatua e lē maluelue? (Mata. 24:3, 13, 21) O le tele lava e faalagolago i le auala o loo tatou fausia aʻe ai o tatou olaga i le taimi nei. O lea, e manaomia vave ai ona tatou fesili ifo ia i tatou lava, ‘Pe o mauaa le faavae aʻe o loʻu olaga faa-Kerisiano i le auauna atu ma le usiusitai i le Atua?’
2 O le ā le uiga ia faavae aʻe o tatou olaga i le auaunaga ia Ieova? O lona uiga ia faaautu o tatou olaga ia Ieova. E aofia ai le tepa taulai atu i le Malo e avea ma o tatou faanaunauga autū. E iai faatasi ma le usitai atu i le Atua i gaoioiga uma o loo faia i o tatou olaga i aso taitasi. E manaomia ai le tuu atu atoa o o tatou loto i a tatou suesuega totino, suesuega faaleaiga, ma suesuega a le faapotopotoga, o le Tusi Paia, faapea ma la tatou faiva i le fanua, ia avea o ni mea e faamuamua. (Fai. 12:13; Mata. 6:33) O se olaga usiusitai faapena e iu ai i se faatuatua malosi pei se papa, lea o le a lē nutipalaina i so o se afā o faigata e ono agi mai.
3 O se fiafiaga le vaai atu i le faitau miliona o tagata o loo faavae ma le mautinoa o latou olaga ma o latou faamoemoega mo le lumanai i le auaunaga i le Atua, e pei ona sa faia e Iesu. (Ioa. 4:34) Ua latou pipiimau atu i se faasologa faifai pea o galuega faatiokarate ma o le iuga ua olioli ai i faamanuiaga e tele. Na faamatala mai e se tasi tinā le auala na la taulau manuia ai ma lana tane i le tausia aʻe o le la fanau tama e toalua ina ia auauna ia Ieova: “Na faatumuina o matou olaga i le upu moni—matou te ō i tauaofiaga uma, sauniuni ma auai i sauniga, ma avea le auaunaga i le fanua o se vala faifai pea i o matou olaga.” Na faaopoopo mai lana tane: “O le upu moni sa lē na o se vaega o lo matou olaga, ae sa avea ma o matou olaga. Sa fai faatatau mai i ai isi mea uma.” Pe o faapena foi ona e faatulaga le auaunaga ia Ieova e fai ma mea e faamuamua i lou aiga?
4 Fuafua se Faasologa Faalevaiaso e Mafai Ona Faatino: E fesoasoani mai le faalapotopotoga a Ieova ia i tatou ina ia tatou mulimuli i se faasologa lelei o mea faaleagaga e ala i le faatulaga mai o sauniga e lima i le vaiaso. O Kerisiano e faavae aʻe o latou olaga i le tapuaiga ia Ieova, ua latou faatulaga a latou galuega faaletino ma matafaioi faaleaiga i se auala, e mafai ai ona latou auai atu i nei sauniga tāua uma. Latou te lē faatagaina mea e itiiti se tāua e faalavelave i lo latou auai e lē aunoa.—Fili. 1:10; Epe. 10:25.
5 E ioeina e Kerisiano taʻumatuaina faapea, e pei lava ona tāua le tausami e lē aunoa i ni taimi patino o aso taitasi, e faapena foi ona tāua tele se faasologa maʻoti mo suesuega totino ma suesuega faaleaiga, e aofia ai ma sauniuniga mo sauniga. (Mata. 4:4) Pe mafai ona e faataatia ese pe ā o le 15 i le 20 minute i aso taitasi mo suesuega totino? O le mea tāua ia aua neʻi faatagaina isi mea e solosolo mālie ane ma faoa ai le taimi ua faataatia ese mo suesuega. Ia fai ma masani e aogā. E ono manaomia ai lou alapo i taeao uma na i lo le mea o loo e iai i le taimi nei. I aiga Peteli i le lalolagi aoao, o loo faapena ai ona alapopō i le taeao ona tagata e 17,000 ina ia talanoaina le mau o le aso. O le mea moni, o le alapo e manaomia ai le vave moe i le po i se taimi talafeagai, ina ia mafai ona malosi ma maloloina e amata le isi aso o loo sosoo mai.
6 Afai o oe o le ulu o le aiga, ia e tausolomua e fuafua ma faamaopoopo le faasologa a lou aiga mo galuega faatiokarate. O nisi aiga latou te faitauina le Tusi Paia, le Yearbook, faatasi ai ma se isi lomiga a o latou mālōlō ina ua maeʻa le taumafataga o le afiafi. E toatele mātua o ē ua latou vaaia le tutupu aʻe o a latou fanau e avea o ni Kerisiano malolosi faaleagaga, ua faapea mai, o se tasi o vala na fesoasoani tele ina ia latou taulau ai o le avea lea ma tu masani a le aiga le faataatia ese o se afiafi i vaiaso taitasi, e olioli faatasi ai i fetufaaiga faaleagaga e ati aʻe ai. O se tasi o i latou o se tamā na faapea mai: “Ou te lagona o le tuputupu aʻe faaleagaga o le ma fanau e māfua mai i se sao tele na faia e la matou suesuega faaleaiga lē motusia i po o Aso Lulu, lea na amata mai le 30 tausaga ua mavae.” Na papatisoina lana fanau uma e toatolu a o talavou lava, ma e lei umi ae ulu uma atu le toatolu lena i le faiva faataimi atoa. E lē gata i le suesuega faaleaiga, ae mafai foi ona olioli faatasi a o muai faataʻitaʻi taulimaga i le auaunaga i le fanua po o vaega e fai i sauniga, ma isi galuega lelei.
7 I lau faasologa o le vaiaso, po ua e ‘faatau mai ea le taimi’ mo le talaʻiga o le Malo? (Kolo. 4:5) O le toatele o i tatou o loo iai i ni olaga pisi, e iai tiute tauave faaleaiga ma tiute tauave faalefaapotopotoga e ao ona faatinoina. Afai tatou te lē faia ni fuafuaga maʻoti ina ia faia se sao i vaiaso taitasi i le galuega talaʻi ma le aʻoaʻo atu, o le a faafaigofie la mo isi mea ona faoa ai le taimi mo lenei galuega tāua. Na faapea mai se tamaloa e telē sana lafu povi: “Pe ā o le 1944 na ou iloa ai e na o le pau le ala e mafai ai ona ou auai i le auaunaga, o le faatulaga lea i ai o se aso patino. E oo mai lava i le asō o loo oʻu faaavanoa ese pea se aso o le vaiaso mo le auaunaga.” Na iloa e se tasi toeaina Kerisiano o le iai o se faasologa maʻoti mo le molimau atu ua mafai ai ona ia ausia se fua faatatau e 15 itula i le masina i le galuega talaʻi. Afai e iai sana galuega faapisinisi e fia faia i le Aso Toonai, e na te faataatia ese seia maeʻa lana auaunaga i le fanua i lena taeao. Pe mafai e oe ma lou aiga ona fuafua a itiiti mai o se aso se tasi i vaiaso taitasi mo le auaunaga i le fanua, ina ia avea lea ma vala o lo outou olaga faaleagaga?—Fili. 3:16.
8 Tilofaʻia le Gasologa o Lou Olaga: E iai mea e feteenai ma le fausia aʻe o o tatou olaga i le auaunaga a Ieova. O faalavelave lē maalofia e ono faasalavei mai i la tatou faasologa ua uma ona fuafua lelei mo suesuega, sauniga, ma le auaunaga. O le a faia e lo tatou Fili, o Satani, mea uma na te mafai ina ia ‘faalavelave mai ia i tatou’ ma faaleaogaina ai a tatou fuafuaga. (1 Tesa. 2:18; Epe. 6:12, 13) Aua neʻi faatagaina nei toʻatugā e faavaivaia oe, ma e faamaamulu ai. Ia faia so o se suiga manaomia ina ia e faaauau ai pea i lau faasologa o galuega faatiokarate. O le filigā ma le maumauai e manaomia tele ina ia faataunuu ai le mea e sili ona tāua.
9 E lē tatau ona tatou faataga taaʻiga faalelalolagi ma taaʻiga ogaoga a o tatou tino augavale e faaofi mai ai galuega e lē faaleagaga, na e mafai ona alu uma i ai le tele o lo tatou taimi ma lo tatou uaʻi atu. E manaomia ona tilofaʻia e le tagata o ia lava, i le faaaogā o fesili faapenei: ‘Po ua faasolosolo mālie ea ona lē paleni le gasologa o loʻu olaga, o lona uiga ua amata ona ou lē matuā uaʻi atu i ai? Po ua amata ea ona faavae aʻe loʻu olaga i mea a lenei lalolagi o loo mavae atu? (1 Ioa. 2:15-17) O le ā le tele o le taimi o loo oʻu faaaluina i le sailia o oʻu lava manaoga, tafaoga, taaloga, po o isi faafiafiaga—e aofia ai le matamata i le televise po o le fesootai solo e faaaogā ai le Internet—pe a faatusatusa atu i le taimi o loo faaalu i gaoioiga faaleagaga?’
10 Afai ua e lagona ua matuā faatumuina lou olaga e le tele o gaoioiga lē aogā, o le ā e tatau ona fai? E pei lava ona sa tatalo Paulo ina ia “faaatoatoaina” ona uso, pe ia “aumaia i se faasaʻosaʻoina tatau,” aisea la e lē faatoga atu ai ia Ieova mo se fesoasoani ina ia toe faaautu atu lou olaga i lana auaunaga? (2 Kori. 13:9, 11, faaopoopoga i le pito i lalo o le mau i le NW) Ona maumauai lea e ola aʻe e tusa ma lau faaiuga ma faia suiga manaomia. (1 Kori. 9:26, 27) O le a fesoasoani Ieova ia te oe e alofia le liliu ese mai le auauna atu ma le usiusitai ia te ia.—Faatusatusa i le Isaia 30:20, 21.
11 Ia Tele Pea Mea e Fai i le Auaunaga Fiafia i le Atua: E faitau miliona i latou o loo matuā sulu ma le ulu i le sailia o fiafiaga ae faatoʻā latou iloa ane ua latalata mai le iuga o o latou olaga, o meafaitino na latou naunau e saili ua lē aumaia ai ia i latou se fiafiaga tumau. Ua avea ma “ai a le matagi.” (Fai. 2:11) I le isi itu, pe afai e taulai atu o tatou olaga ia Ieova, i le ‘tuu o ia i o tatou luma e lē aunoa,’ ona tatou iloa lea o le matuā faamalieina. (Sala. 16:8, 11) Ua ala ona faapea auā o Ieova tonu lava ua māfua ai ona tatou iai. (Faaa. 4:11) Ana lē seanoa o ia, o Lē Sili na Fuafuaina Mea, semanū o se meanoa le olaga. O le auauna ia Ieova e faatumuina ai o tatou olaga i gaoioiga e aogā ma uigā, e lē gata e aogā ia i tatou ae faapena foi i isi i se ala e tumau, ioe, i se ala e faavavau.
12 E tāua le lē faatalale ma leiloa atu ai lo tatou uiga faanatinati e tusa ai o le faaloloʻi vave mai o le iuga o le lalolagi a Satani. O la tatou vaaiga e uiga i le lumanai e aafia ai lo tatou olaga i aso taitasi. O tagata i aso o Noa, o ē na lē talitonu o le a iai se lolo i le lalolagi aoao, na latou “lē iloa,” na faaautu pea o latou olaga i manaoga totino—aai, feinu, ma faaavaga—seia oo ina “aveesea i latou uma” e le lolo. (Mata. 24:37-39) I aso nei, o i latou o loo faaautu o latou olaga i lenei lalolagi o le a vāai atu ua faataapeapeina o latou faamoemoega mo le lumanai, i le faaumatiaga sili ona tele e lei vaaia muamua, “le aso o Ieova.”—2 Pete. 3:10-12.
13 O lea, ia faaauau pea ona faavae aʻe lou olaga i le Atua soifua, o Ieova, ma le faia o lona finagalo. E leai se taumafaiga mo le lelei i lenei olaga e te maua i ai se Lagolago e sili ona maufaatuatuaina e pei o Ieova. E lē mafai ona pepelo o ia—o le a ia faataunuuina ana folafolaga. (Tito 1:2) E lē mafai ona maliu o ia—e leai se mea e tuuina atu ia Ieova e māumau. (Sapa. 1:12; 2 Timo. 1:12) O le olaga usiusitai ma le faatuatua lea o loo tatou atiina ae i le taimi nei, ua na o se amataga o se olaga o le a tumau e faavavau i le auaunaga olioli i lo tatou Atua fiafia!—1 Timo. 1:11; 6:19.
[Faamatalaga faaopoopo i le itulau 3]
“O le upu moni sa lē na o se vaega o lo matou olaga, ae sa avea ma o matou olaga. Sa fai faatatau mai i ai isi mea uma.”