Le Auala e Felagolagomai ai Tagata o le Aiga mo le Faia o se Sao Atoatoa—I Sauniga a le Faapotopotoga

¹ E tatau i aiga Kerisiano ona utagia le poloaiga ina ia faapotopoto faatasi i sauniga a le faapotopotoga. (Epe. 10:24, 25) O le felagolagomai lelei, e mafai ai ona taulau tagata uma i le sauniuni e auai, ma faia se sao i sauniga. E eseese lava tulaga o aiga, ae e iai mea e mafai ona faia e se tane Kerisiano, se avā talitonu, po o se matua nofo toatasi e siitia ai le aufaatasi o le aiga i mea faaleagaga, e tusa lava pe toafia tamaiti i le aiga ma le eseese o o latou tausaga.—Faata. 1:8.

² Ia Lava se Taimi e Sauniuni Ai: Ia felagolagomai tagata o le aiga ina ia iloa ai ua sauniuni lelei tagata taitoatasi mo sauniga a le faapotopotoga. O le toatele o aiga latou te suesueina faatasi le mataupu mo le suesuega faalevaiaso o Le Olomatamata. O isi e sauniuni mo le Suesuega Tautusi a le Faapotopotoga pe faitauina foi le faitau Tusi Paia faalevaiaso e le aiga. O le sini lava, ia manatua manatu tāua a o lei ō atu i le sauniga. I lena auala, o le a maua ai e tagata uma aogā e sili atu mai mea o faalogologo i ai ma o le a faaauupegaina ai e faia se sao pe a iai se avanoa.—1 Timo. 4:15.

³ Fuafua e Faia se Sao: E tatau i tagata uma o le aiga ona iai se sini o le faalauiloa atu lea o lona faamoemoe i luma o isi e ala i le faia o ni tali i sauniga. (Epe. 10:23) Pe manaomia e se tasi o le aiga se fesoasoani po o se faalaeiauga e faia lenei mea? O le ā le fesoasoani e manaomia e tagata taitoatasi i le sauniunia o tofiga mo le Aʻoga o le Faiva Faatiokarate? E talisapaia e avā lena mea pe a tausolomua a latou tane ma atonu e ofoina atu se manatu mo se tala faatusa fetaui po o se faatulagaga aogā. E lē tatau ona iai i mātua le lagona faapea e tatau ona latou sauniunia vaega mo a latou fanau laiti. O le faia faapea, e mafai ona faatuai ai le agaigai i luma o le tamaitiiti. Ae mafai ona fesoasoani mātua i a latou fanau laiti ma faalogologo a o latou faataitai mai ma le leotele a latou vaega.—Efe. 6:4.

⁴ Faamaopoopo Ina ia Auai: E mafai ona aʻoaʻoina le fanau mai lava a o laiti ina ia faia o latou lava ofu ma sauni e ō atu i le sauniga i le taimi faatulagaina. E tatau ona felagolagomai tagata o le aiga i le faia o galuega i le fale ina ia lē tuai ai.—Tagai i le fautuaga i tusi, o le Fiafia i le Aiga, itulau e 112, ma le Young People Ask, itulau e 316-317.

⁵ E mafai e mātua faapea ma fanau ona manatunatu ma le faaeteete i upu a Iosua o aso anamua, o lē na faapea mai: “A o aʻu nei ma loʻu aiga, matou te auauna ia Ieova.” Ia ona fai loa lea o se faaiuga ina ia felagolagomai mo le faia o se sao atoatoa i sauniga a le faapotopotoga.—Iosua 24:15.