“O le ā e Tatau Ona Ou Faia?”
1 I le avea o se talavou ua agaʻi atu ina avea ma tagata matua, e te ono fesili, ‘O le ā e tatau ona ou faia i loʻu olaga?’ E mananao talavou Kerisiano e faalautele la latou auaunaga ia Ieova e ala i le faiva. Ae faapefea ona e faia faapea ae i le taimi e tasi o loo e tauaveina foi tiute tauave o se tagata matua, lea e aofia ai le tausia o ou lava manaoga faaletino? Atonu e lē faigofie ona sailia le tali.
2 O nisi talavou e popole pe a vaai atu i le tulaga ua iai le itu tau tamaoaiga o le lalolagi, ma foliga o mea o loo faaloloi mai i le lumanai. Latou te tomānatu faapea: ‘Po ua tatau ea ona ou sailia nisi aʻoaʻoga faaopoopo faalelalolagi? Po ua tatau loa ona ou ulu atu i le auaunaga faataimi atoa i le taimi nei?’ Ina ia faia le filifiliga saʻo, e tatau i se tagata ona taliina ma le faamaoni le fesili lenei, ‘O le ā le mea o loo sili ona ou naunau i ai i le olaga?’ E tatau ona ia tilofaia ona faanaunauga.
3 O le ā ua e taumafai e ati ae e avea o se mea e te uaʻi faapitoa i ai a o e talavou? Po o e naunau faapitoa ea i le sailia o faamanuiaga tau tamaoaiga, po o e naunau moni e faaalu lou olaga i le faaauilumaina o manaoga o le Malo? O se tikerī mai le iunivesite e lē faamautinoa mai ai le taulau i le mauaina o se galuega. O se isi itu, e toatele ua latou mauaina tomai e talia e falefaigaluega e ala i polokalame e aʻoaʻoina ai tomai faapitoa, o isi i aʻoga e aʻoaʻoina ai matātā eseese, po o mataupu i kolisi mo kuata pupuu lea e manaomia ai na o sina taimi e faaaluina ai.
4 Ia Talitonu i Folafolaga a Ieova: O se vala e tāua tele e ao ona manatu i ai o le faamautinoaga mai ia Ieova le Atua e faapea o le a ia saunia mea mo i latou o ē faamuamua manaoga o le Malo i o latou olaga. (Mata. 6:33) E lē o se folafolaga e leai se uiga lenei. O le toatele o uso o loo auai atu i le Aʻoga mo Toleniga i le Faiva na mauaina tikerī mai kolisi a o lei aʻoaʻoina le upu moni. Ae o le ā o loo latou faia mo galuega faaletino? E toaitiiti lava i latou o loo latou tauaveina pea matātā na latou aʻoʻoga mai ai. E toatele sa galulue i matātā e faia auaunaga mo isi, ina ia tausia lelei ai o latou manaoga tau tupe a o faia le auaunaga paeonia. E ala i le faalauteleina o la latou galuega i le faiva, ua latou mauaina ai faamanuiaga e sili atu i se manuia tau tupe.
5 Ina ia filifili po o le ā e tatau ona e faia pe a iu au aʻoga, ia fuafua lelei vala uma ma iloilo ma le faaeteete ou faanaunauga. Ina ia maua se vaaiga paleni e faatatau i au filifiliga, ia tilofaia faamatalaga e faatatau i lena mataupu o loo i le Awake! o Mati 8, 1998, itulau 19-21. Talanoa atu i ou mātua, i toeaina, i le ovasia o la outou matagaluega, faapea ma paeonia ua taulau manuia o i lo outou vaipanoa. O le a fesoasoani lena ia te oe e faia ai se filifiliga atamai i le mea e tatau ona faia i lou olaga.—Fai. 12:1, 13.