O Afioga Faavaloaga a le Atua o le a Faataunuuina Uma Lava!
1 E naunau pea lava Molimau a Ieova i valoaga o le Tusi Paia. O lea, sa tatou fiafia ai e iloa, o le matua o le tauaofiaga itumalo i lenei tausaga e faapea, “Afioga Faavaloaga a le Atua.” Sa tatou naunau lava e fia iloa po o ā mea ua saunia e Ieova mo i tatou e avea o “mea e ʻai i ona itu aso.” (Mata. 24:45) E na te leʻi tuua i tatou i se tulaga lē fiafia.
2 Mea Tāua o le Tauaofiaga: O le lauga autū o le Aso Faraile, “Ia Uaʻi Atu i Afioga Faavaloaga a le Atua,” na aofia ai se talanoaga na faamalamalamaina ai le tala i le faaliliuina o Iesu. (Mata. 17:1-9) Sa faamamafa mai ai faapea, i le taimi nei, ua tatou iai i le amataga o taimi aupito sili ona lelei auā ua tatou iai i le faatausiʻusiʻuga o le taimi o le iʻuga, ma ua toe o se āga ona oo mai lea o le faiga fou o mea! O se auala tāua e manaʻomia ina ia tatou uaʻi atu ai i le Afioga a le Atua o le faitau lea i ai e lē aunoa. O le lauga faasolo “Ia Fiafia i le Faitauina o le Afioga a le Atua” na aumaia ai ni fautuaga aogā mo le faia o la tatou faitauga Tusi Paia i se auala e sili atu ona maua ai aogā ma olioli ai.
3 I le aoauli o le Aso Toonai na tatou autaluina ai māfuaaga e tatau ai ona tatou talitonu, ua tatou ola i aso e gata ai. Pe mafai ona e manatuaina na mea uma? I le taeao o le Aso Sa, na toe faaolaola mai ai le valoaga a Sapakuka a o tatou aʻoaʻoina e faapea, o o tatou aso ua tai pei lava o aso o Sapakuka ma ua lē o toe umi se taimi ae oo mai mea iloga, pe a faaumatia e Ieova o ē amioleaga ma faasaoina ē amiotonu. Pe sa e māua le manatu autū o le tala faale-Tusi Paia e uiga ia Iakopo ma Esau? E tatau ona tatou tulimataʻia ma le naunau faamanuiaga mai ia Ieova, i le tetee atu i le agaga o le faalēano mai ma le leai o se naunau.
4 Se Tusi Fou e Matuā Faatupu Naunau: Maʻeu lo tatou fiafia ina ua mauaina le tusi fou, Pay Attention to Daniel’s Prophecy! E lē taumate ua uma ona e faitauina lenei lomiga faaoso naunau. Na taʻua e le failauga lea na tatalaina le tusi e faapea: “Vaganā ai ni nai auiliiliga laiti, ae o valoaga uma lava o i le tusi a Tanielu ua faataunuuina uma.” Pe lē faamamafaina ai ea i lena mea le tulaga faanatinati ua iai o tatou taimi?
5 O le polokalame o le tauaofiaga ua sili atu ona faamalosia ai lo tatou talitonuga maumauaʻi faapea, o folafolaga uma a le Atua ia e leʻi faataunuuina, o le a faataunuuina moni lava. Ua uunaʻia ai i tatou ina ia folafola atu pea i isi le afioga faavaloaga a le Atua!