O Ai e Ono Talia se Suʻesuʻega Faale-Tusi Paia?
1 Na faalauiloa mai e le perofeta o Amosa faapea, o le a iai le oge i le nuu o Isaraelu, “e le se oge i mea e ʻai, po o se gālala i le fia inu vai, a o le oge i le faalogologo i afioga a Ieova.” (Amo. 8:11) Mo le lelei o i latou o ē o matelāina ma gālala faaleagaga, ua tufatufaina atu ai e le faalapotopotoga a Ieova se aofaʻiga tele o lomiga faale-Tusi Paia i le lalolagi aoao.
2 E oo mai i le taimi nei, ua uma ona tatou lolomia le 70 miliona tusi o Le Poto ma le 91 miliona polosiua o le Manaomia. I le aʻoaʻoina atu o le upu moni, ua tatou talisapaia ai le faigofie ma le aogā o nei lomiga. Ae peitaʻi, e iai moni lava se anoanoaʻi o tagata o ē ua latou mauaina a tatou lomiga ae latou te leʻi suʻesuʻeina lava le Tusi Paia ma i tatou. O le ā e mafai ona tatou faia i lenei mea?
3 O Tagata Taʻitoʻatasi e Tuu ai Lomiga e Ono Avea ma Suʻesuʻega i se Taimi! Seʻi manatu i le mea na oo i se tagata talaʻi o lē na ia ofoina se suʻesuʻega i se fafine, i le taimi muamua lava na ia talanoa atu ai ia te ia i le fale. Sa talia e le fafine i le taimi lava lena le ofo. Mulimuli ane na ia faailoa atu i le tagata talaʻi faapea, “O oe lava le tagata muamua ua ofo mai e suʻesuʻe ma aʻu i le Tusi Paia.” I la outou oganuu, e toʻafia ni tagata ua ia i latou a tatou lomiga atonu o le a fai mai faapena? O tagata uma e tuu ai lomiga, e mafai ona maua ai se avanoa mo ni toe asiga ma se suʻesuʻega faale-Tusi Paia i le aiga.
4 Talu ai e masani ona tatou feiloaʻi ma tagata o ē ua latou maua a tatou lomiga, e mafai la faapefea ona tatou faagaee lo latou fiafia e fia iloa po o ā mea o loo iai i a tatou lomiga? Na fesili tuusaʻo atu lava se tasi Molimau i lē ona le fale pe iai ni ana fesili faale-Tusi Paia, ae na ia faapea mai, “E leai.” Na tulitatao atu le tuafafine, “E mautinoa lava e iai ni au fesili.” Na iʻu ina taʻu mai e le fafine ana fesili ma amata ai loa se suʻesuʻega. Aiseā e lē fesili atu ai i lē ona le fale pe na te fia iloa se manatu o le Tusi Paia e faatatau i se fesili po o se mataupu o loo mamafa i lona mafaufau? Ia nofo sauni e lāgā se fesili faatupu manatu pe afai e lē o mafai ona mafaufau o ia i se mataupu. O talanoaga faapena e ono faaāva ai le ala mo se suʻesuʻega faifai pea i upu moni faavae o le Tusi Paia.
5 O le galuega o le faia o suʻesuʻega faale-Tusi Paia o le iʻo lea o la tatou faiva. Talu ai tatou te lē iloa po o ai e ono talia se suʻesuʻega, aua la le faatalatū e ofo se suʻesuʻega i tagata uma e te feiloaʻi i ai. Tuu atu le mataupu ia Ieova i le tatalo, ma ia galue e ōgatasi ma au tatalo. Atonu o le a lē pine ae talia mai e se tasi o lē na e ofoina i ai se suʻesuʻega!—1 Ioa. 5:14, 15.