O le ā o le a E Fai Atu ai i se Tagata Musalimi?
1 Pe sa e maua se avanoa e molimau atu ai i se tagata Musalimi? Afai na maua, atonu la na e iloa ai, o tagata Musalimi e talitonu maumauaʻi i le Atua. Ae peitaʻi, e itiiti so latou iloa e uiga i le Parataiso o loo fotuaʻi mai i le lalolagi e pei ona valoia e perofeta a Ieova, ma tatou te mananaʻo e talanoa ma i latou e uiga i lena faamoemoe. (1 Timo. 2:3, 4) O le faamatalaga lea o loo mulimuli mai e ao ona fesoasoani ia te oe e avatu ai se molimau lelei.
2 O tagata Musalimi e talitonu ia Allah, po o le Atua, ma latou te talitonu o Muḥammad (Moameta), o le perofeta a le Atua. O le latou tusi paia, o le Korana, ma le latou lotu e taʻua o le Isalama, o lona uiga, o le “gauaʻi.” Ua taʻua i le Korana e faapea, o le pepelo ma le tapuaʻi atu i tupua e sesē, e toʻatasi le Atua, ma e lē o ia o se vaega o se Tolutasi. O loo aʻoaʻoina ai foʻi le lē mafai ona oti o le solu, le afi i seoli, ma se parataiso faalelagi. E ioe tagata Musalimi o le Tusi Paia o le Afioga a le Atua ae talitonu faapea, ua suia le Tusi Paia, ae o le Korana, o loo tumau pea ona iai i lona uluaʻi gagana, ma o loo tumau pea i se tulaga lē filogia.
3 Ia Faaleuō, Magafagafa, ma Faautauta: Pe a faia se talanoaga ma se tagata Musalimi, ia faaleuō ma ia magafagafa. (Faata. 25:15) Ia manatua o talitonuga o tagata Musalimi ua matuā maumaututū ma o le tele o talitonuga ua uma ona aʻo faatauloto. O lea la, o le fefulifulisaʻi i aʻoaʻoga faalotu ma lo latou faamaonia ia i latou lava po o le ā le finagalo o le Atua, e lē o se vaega lea o lo latou tuputupu aʻe faaleagaga. (Roma 12:2) Ina ia fesoasoani i tagata Musalimi, e matuā tāua ai le onosaʻi ma ia malamalama.—1 Kori. 9:19-23.
4 ʻAlofia le faaaogā o faaupuga e ono manatu ai se tagata Musalimi faapea o oe o se tasi o Kerisinetoma. Ia faamanino i ai e matuā ese lava oe, e leai sou fesootaʻiga ma le lotu Katoliko po o le lotu Porotesano. Ia faasino i le Tusi Paia faapea o le Tusi a le Atua. Talu ai e iai le manatu tetee o tagata Musalimi i le faaupuga le “Alo o le Atua,” e masani lava la ona sili atu ona lelei le aua neʻi faaaogāina pe talanoaina lena mataupu seʻi vaganā ua iloa se agaʻigaʻi i luma o le tagata. Ae peitaʻi, e mafai ona e talanoa e uiga ia Iesu, i le faasino atu ia te ia e faapea o se perofeta po o se avefeʻau. ʻAlofia le faia o se finauga. Afai e te vaai atu ua tau amata ona ita, ia vave loa ona e tulaʻi ese ma le faaaloalo.
5 E sili ona lelei pe a talanoa tau o se tagata e toʻatasi ae aua le talanoa ma se vaega o tagata. O le tulaga masani, e sili ona talafeagai pe a molimau atu tuafāfine i fafine, ae molimau atu uso i tane. E manino lava, e iai taimi e mafai ai ona fetuunaʻi, ae tatau ona faaaogā le faautautaga lelei. E lē gata i lea, e toʻatele tagata Musalimi e ilitata tele i mea latou te manatu o ni ofu e lē onomea ma teuga a fafine. E manaʻomia ai ona nofouta tuafāfine i lena itu.—1 Kori. 10:31-33.
6 Mea e Talanoa i Ai: Ia tautala saʻo e uiga i le silisili o le Atua ma lona alofa. Aua neʻi faatautū e taʻua o oe o se tagata e talitonu moni lava e toʻatasi le Atua (e lē o se Tasitolu), ma o le tapuaʻi i faatusa e sesē. Talanoa e uiga i le amioleaga ua iai i le lalolagi i aso nei—o taua, le vevesi o tagata o atunuu, le feitagaʻi i le va o lanu, ma le faafiaamiotonu o loo vaaia i le anoanoaʻi o tagata lotu.
7 O le polosiua The Guidance of God—Our Way to Paradise, o le a e malamalama atili ai i mataupu e mafai ona faaaogā e amata ai ni talanoaga ma tagata Musalimi. Ua fuafuaina lea polosiua ina ia talafeagai ma tagata Musalimi o loo nonofo i se siʻomaga e mafai ona latou maua ai le lagona saʻoloto e suʻesuʻeina le Tusi Paia.
8 I se taulimaga, e mafai ona e faapea atu:
◼ “O loo oʻu faia se asiasiga faapitoa e talanoa atu i tagata Musalimi. Sa ou faitau e uiga i la outou lotu ma ou te talitonu e saʻo pe a ou faapea atu, e talitonu tagata Musalimi i le Atua moni e toʻatasi ma le ʻau perofeta uma. [Faatali mo se tali.] Ou te fia talanoa ia te oe e uiga i se valoaga mai anamua lea o loo valoia ai le toe faaliliuina o le lalolagi e avea ma parataiso. Pe mafai ona ou faitauina atu ia te oe le valoaga lea na tusia e le perofeta? [Faitau le Isaia 11:6-9.] O lenei valoaga ua ou manatua ai se faaupuga o loo sii mai i le Korana lea o loo maua i lenei polosiua.” Suʻe i le itulau e 9 i le polosiua, Guidance of God, ma faitau le mau o loo sii mai ai i mataʻitusi matamata tetele, lea o loo faasino atu i ē amiotonu o le a fai ma o latou tofi le lalolagi. Pe a faaalia le naunau, ona faaauau lea o le talanoaga e ala i le talanoaina o le palakalafa e 7 e oo i le 9 i le isi itulau. Tuu le polosiua, ma fuafua mo se toe asiga.—Mo se isi taulimaga, tagaʻi i La Tatou Faiva o le Malo o Fepuari 1998, itulau 6, palakalafa 27.
9 Pe a valaaulia se tasi e talanoa i le polosiua Guidance of God, e sili ona lelei pe a fai i ai o se talanoaga, ae lē o se suʻesuʻega faale-Tusi Paia. Pe a maeʻa ona suʻesuʻeina le polosiua, ua tatau loa ona nofo sauni le tagata suʻesuʻe e suʻesuʻeina le polosiua o le Manaomia po o le tusi o Le Poto. O isi lomiga ua fuafuaina faapitoa mo tagata Musalimi, o le sāvali, How to Find the Road to Paradise ma le tamaʻitusi The Time for True Submission to God.
10 I le iloa o talitonuga faa-Isalama ma mea e ilitata ai, e mafai ona tatou faautauta i le filifilia o lomiga tatou te ofoina atu i tagata Musalimi ma le auala tatou te molimau atu ai ia i latou. Tau ina ia faamanuia pea e Ieova a tatou taumafaiga e fesoasoani atu i ituaiga uma o tagata ina ia latou valaau atu i lona suafa ma faaolaina ai.—Galu. 2:21.