Mea na Tutupu
◼ Ausetalia: O John o se tagata atamai. Sa masani ona toʻaga i le lotu a o laʻitiiti, ae ina ua avea ma tagata matua sa matuā malosi lona talitonuga e leai se Atua. Sa tuu e se paeonia iā te ia le polosiua o le Was Life Created?, ae i le isi taimi na ia toe asia ai o ia, sa ia tuu ai iā te ia le polosiua o le Origin of Life. Sa faaauau lava ona atiaʻe e le paeonia le naunau fiafia o John, e ala i le tuuina iā te ia o lomiga fou, ma faamatilatila so o se mataupu e faatatau i le foafoaga po o valoaga o le Tusi Paia. Ina ua ia iloa ua talafeagai ona fai se suʻesuʻega a John, ona ia avatu lea iā te ia o le tusi The Bible—God’s Word or Man’s? Ina ua uma ona ia faitauina le tusi, na ia faapea mai, o ia o se “tagata e masalosalo pe e iai se Atua.” O lea, na avatu ai loa e le paeonia iā te ia le tusi O ā Aʻoaʻoga Moni a le Tusi Paia?, ma faaali atu iā te ia le palakalafa e 8 i le itulau e 20, ma le palakalafa e 13-16 i le itulau e 23-24. O le matuā maofa o John i mau o loo iai na ia faapea mai ai, “E tatau ona ou toe suʻesuʻeina le Tusi Paia.”
◼ Mekisikō: Na faapea atu se tamāloa i se tasi o tagata talaʻi, e na te lē talitonu na faagaeeina e le Atua le Tusi Paia. Na fai atu le tagata talaʻi e mafai ona ia faamaonia mai le Tusi Paia le sesē o lenā manatu. Ina ua mavae le tele o taimi na faia ai talanoaga, na amata ona pāʻia le loto o le tamāloa i mea na ia aʻoaʻoina mai le Tusi Paia, aemaise lava i tapulaa a le Atua. Na ia faapea atu i le tagata talaʻi: “I le taimi muamua na ta faitauina ai le Tusi Paia, e pei lava o le tele o isi tusi e aumaia ai fautuaga, ma e leʻi iai se aafiaga i loʻu olaga. Ae pe a matou toe faitau i ai i le taimi lenei, aemaise lava fautuaga o loo iai e faatatau i amioga, e pāʻia loʻu loto.”
◼ Iunaite Setete: A o auai se ulugalii i le talaʻiga i nofoaga faitele, na la feiloaʻi ai i se fafine mai Taiwan e talitonu i le Atua, ae e manatu o le Tusi Paia e mo na o tagata papaʻe. Na alu atu lenei fafine i le mea na faaalia ai lomiga a lenei ulugalii, ona o lagona o le lē mautonu e ui sa sologa lelei lona olaga. Na ia faamoemoe e maua mai i le Tusi Paia se fesoasoani mo ia, e iloa ai le fuafuaga moni o lona olaga. Na amata lana suʻesuʻega i le tusi O ā Aʻoaʻoga Moni a le Tusi Paia? faatasi ai ma le polosiua Lasting Peace and Happiness—How to Find Them. Nai lo o le suʻesuʻeina o le mataupu e 2 o le tusi, na latou talanoaina se tasi o vaega o le polosiua ua faaulutalaina o le “A Guidebook for the Blessing of All Mankind.” Ina ua māeʻa ona talanoaina uluaʻi palakalafa e ono o lenā vaega, na faailoa atu e le fafine lona maofa i le auala e ese mai ai le Tusi Paia i so o se isi lava tusi faalelotu. Ina ua uma ona talanoaina valoaga o le Tusi Paia ua faataunuuina, na ia faapea mai: “E leai lava ma se isi tusi e saʻo aʻiaʻi faamatalaga o loo iai e pei o le Tusi Paia!”
◼ Iapani: E ui na faapea mai se tamāloa e lē talitonu i le Atua, ae sa faaauau pea ona asia o ia e se uso, ma talanoa i ai i le mataupu “Pe na Teʻi Lava ua Iai?” o loo i le Ala Mai! A o faagasolo taimi, na amata ona suia le manatu o lenei tamāloa ma faapea mai atonu lava e iai Sē na foafoaina i tatou. O le taimi lenei, ua talitonu lenei tamāloa e iai le Atua, ma o loo faia lana suʻesuʻega i le polosiua Tala Lelei Mai i le Atua!
◼ Kanata: Na taliaina e se fafine se mekasini na ofoina atu e se tuafafine, a o tuua lona fale ma savali atu i lana taavale. Ina ua toe asia o ia e le tuafafine, na matuā tetee lenei fafine ma faapea mai e lē talitonu i le Atua. E leʻi lotovaivai le tuafafine, ma na mafaufau e toe foʻi atu ma le polosiua A Satisfying Life—How to Attain It. Ina ua maua atu le fafine i lona fale, na faapea atu le tuafafine iā te ia, e ui lava e na te lē talitonu i le Atua, ae sa mafaufau mai pea iā te ia ona o ia o se matua e nofo toʻatasi. Na ia faaali atu i le fafine le palakalafa e 6 i le itulau e 4 o le polosiua, lea e talanoaina ai po o fea e maua ai fautuaga aogā. Ona ia faalaeiauina lea o le fafine e faitau fautuaga o loo i le lesona e 2, e faatatau i le auala e tausia aʻe ai fanau. Na talia ma le fiafia e lenei fafine le polosiua.