“Ia Talaʻi le Upu . . . ma le Faanatinati”
1 Afai e avatu ia te oe se mea ae o loo tusia ai le upu “FAANATINATI,” o le ā lou manatu i ai? O le upu “faanatinati” o lona uiga “e manaʻomia ona uaʻi vave atu loa i ai.” O le māfuaʻaga lelei lea na faatonuina ai e le aposetolo o Paulo Kerisiano ina ia “talaʻi le upu . . . ma le faanatinati.” (2 Timo. 4:2, NW) Pe e te tali atu e ala i lou uaʻi vave atu loa i lenei galuega?
2 Atonu sa taʻu atu ia Paulo e faapea, o nisi o ona uso, sa ‘faavaivai ua le filigā’ i le avea ma Kerisiano. (Roma 12:11) Sa faatapulaa ai i lenei mea iʻuga o a latou galuega faapea ma le ʻoliʻoli sa ono mafai ona latou maua mai le fesoasoani atu i isi.
3 Le Silafaga a Iesu i le Faiva: Maʻeu le ʻoliʻoli na maua e Iesu i le faia o lana faiva! Sa fetalai o ia: “O laʻu mea e ʻai, ia ou faia le finagalo o le na auina mai aʻu, ma faaiu lana galuega.” O le faaaʻoaʻoga a Iesu na faagaoioia ai ona soo, o ē na ia faalāʻeiʻauina e ala i le taʻuina atu ia i latou e faapea ‘ua sinasina mai nei le fanua i le seleselegāsaito.’ (Ioa. 4:34, 35) Sa iloatino lava le lagona o le faanatinati lea na ia faaalia i le faagasologa o lana faiva ina ua ia taʻu atu i ona soo ina ia “aioi atu ai i le Alii e ana le saito e seleseleina, ina ia aauina mai e ia ni e galulue i lana saito e seleseleina.” (Mata. 9:38) Sa talisapaia e Iesu e faapea o lona tofiga o le talaʻi, ma sa maumauaʻi o ia ina ia aua neʻi iai se mea e taofia ai o ia mai le faia o lenei mea.
4 Ae Faapēfea i Tatou? I aso nei, ua sili atu ona faanatinati na i lo o se isi lava taimi muamua ina ia agaʻi i luma i le galuega talaʻi. I le tele o vaega o le lalolagi, ua sinasina ai le fanua mo le seleselega. E oo lava i atunuu e foliga mai ua uma ona tuuina atu i ai se molimau ma le māeʻaeʻa, e faitauafe ua papatisoina ai i tausaga taʻitasi. I le vave tele o le faaloloʻi mai o le iʻuga o lenei faiga o mea, “ia faamalosi i le galuega a le Alii.” (1 Kori. 15:58) E sili atu na i lo o se isi lava taimi, e matuā tāua tele lo tatou faamalolosi ma le māʻelegā e faia se sao i le tufaina atu o le feʻau o le Malo i isi.
5 Seʻi o tatou uaʻi atoatoa atu i le faaooina atu i isi o le tala lelei, mai lea fale i lea fale, ma i so o se mea e mafai ona maua i ai tagata i le oganuu. O le faia atoatoa o se sao i le mea e mafai i le auai i le galuega talaʻi, ua faaalia manino ai e faapea, ua tatou faamuamua le Malo i o tatou olaga. (Mata. 6:33) O lo tatou faamaoni i le talaʻia ma le faanatinati o le upu o le a tatou maua ai le ʻoliʻoli sili.