Faaaogā Sāvali e Amata ai Talanoaga
1 Pe e te lē ioe o le tuuina atu o se molimau uigā e faalagolago tele i lou tausolomua ona amataina o ni talanoaga? O le luʻi, o le fai atu lea o se tala ina ia uaʻi mai ai le manatu o le tagata ma faaaafia ai o ia i le talanoaga. Ae e mafai faapēfea ona faia ma le uigā lenei mea?
2 E toʻatele tagata talaʻi ua latou iloa, o le filifilia lelei o ni nai upu pupuu e ofo atu ai se tasi o a tatou sāvali faale-Tusi Paia, e mafai ona amataina ai ni talanoaga. O ulutala o sāvali e faaoso fiafia, ma o ata felanulanuaʻi e tōsina mai ai le vaai. E lē faateʻia ai se tasi i se sāvali, ma e lē oo ai foʻi i le tagata se manatu e faapea e tele naʻuā faamatalaga o loo iai e faitauina. Peitaʻi, o feʻau pupuu ma tuusaʻo o loo iai i sāvali e faatōsina, ma e mafai ona faaaogā e tataʻi atu ai i se suʻesuʻega faale-Tusi Paia.
3 O lagona tōtino nei o se tasi Molimau: “I lenei lalolagi e tele le pisi, e masani lava ona lē mananaʻo tagata e faaalu se taimi tele e faitau ai, ae o sāvali, ua lava ma totoe le umi e avatu ai se feʻau tāua ae lē o umi naʻuā e ono fulitua mai ai le tagata a o leʻi vaai mai i ai. Sa ou faitauina le tele o sāvali, ma iʻu ai ina ou aʻoaʻoina le upu moni.” Aua lava neʻi manatu faatauvaa i le mana o le Afioga a le Atua e pei ona faamatalaina mai i nei feʻau pupuu ua lomia mai.—Epe. 4:12.
4 Laasaga Faigofie e Fa: E toʻatele ua ʻoliʻoli ona ua taulau manuia i le faaaogāina o se faafeiloaʻiga faigofie. (1) Faaali i le tagata ni sāvali ma fesili i ai po o lē fea sāvali e fiafia i ai o ia. (2) Pe a uma ona filifilia e le tagata se sāvali, ona fai atu lea o se fesili na saunia lelei e faamatilatila ai se manatu autū i le sāvali. (3) I le taliina o le fesili, faitau se palakalafa talafeagai po o se mau mai le sāvali. (4) Afai e tali lelei mai, ia faaauau ona e talanoa i mataupu o loo i le sāvali pe faasino atu i se lesona i le polosiua o le Manaomia po o se matāʻupu i le tusi o Le Poto o loo aumaia ai isi faamatalaga atili. I lenei auala atonu o le a mafai ai ona e tataʻi saʻo atu i se suʻesuʻega faale-Tusi Paia. O fautuaga ia o loo mulimuli mai, o le a fesoasoani ia te oe e sauniunia ai ni au tala e fai atu e faaaogā ai sāvali e fa.
5 O le matua o le sāvali “O Ai Moni o loo Pulea le Lalolagi?” e ono lāgā o se fesili.
◼ Afai e tali mai le tagata lea o loo lua talanoa e faapea, o le “Atua,” pe faapea mai “ou te lē iloa,” ona faitau lea o fuaiupu amata e lua na e i le itulau e 2 ma le palakalafa muamua i le itulau e 3. Faamatilatila le 1 Ioane 5:19 ma le Faaaliga 12:9. Pe mautinoa pe leai le tagata i le iai o Satani le Tiapolo pe iloa foʻi ana taaʻiga i le lalolagi, ae e mafai lava ona e mulimuli i le faasologa o manatu na e i lalo o le ulutala “Se Molimau Mai Tulaga o le Lalolagi” e faaauau ai le talanoaga. Afai e faaalia le naunau, ona faamatala lea i ai po o fea na sau ai le Tiapolo, e faaaogā ai manatu na e i le itulau e 3 ma le 4 o le sāvali.
6 O le sāvali “O le ā le Faamoemoe mo Ē Pele ua Maliliu?” e ono faaoso vave ai se naunau. E mafai ona e faamaʻite se talanoaga i lou fesili atu e faapea:
◼ “Pe e te manatu o le a mafai ona tatou toe vāai i ē pele ia i tatou ua maliliu?” Pe a uma ona tali mai le tagata, ona faasino lea i le palakalafa lona lua i le itulau e 4 o le sāvali ma faitau le Ioane 5:28, 29. Ona faamatala lea i ai e faapea, e fesoasoani lenei mau ina ia malamalama ai i le faamatalaga lea o loo i lalo o le tamaʻi ulutala muamua i le sāvali. Fai i ai e mafai ona lua talanoa faatasi i ai.
7 O le sāvali “Olioli i le Olaga Faaleaiga” ua fetaui lelei lava mo aiga uma. I le faaaogāina, e mafai ona e faapea atu:
◼ “E lē taumatea e te ioe ua oo le aiga i ni tulaga faigatā i aso nei. O le ā sou manatu i se mea e tatau ona faia ina ia faamalosia ai sootaga faaleaiga?” Pe a uma ona tali mai le tagata, ona tataʻi lea o ia i manatu na e i le palakalafa muamua o le itulau e 6. Fili se mau se tasi o mau na e sii mai i le itulau e 4 ma le 5 o le sāvali, ma faamatala le uiga o le mau. Ona ofo lea i ai o se suʻesuʻega faale-Tusi Paia e faia i le aiga e aunoa ma se totogi.
8 O le sāvali “Le Pogai e Mafai ai ona E Faatuatua i le Tusi Paia” e ono faaaogāina i le faatomuaga lenei:
◼ “O le toʻatele o tagata ua faalogo i le tala e uiga ia Kaino ma Apelu, lea o loo maua i le uluaʻi tusi o le Tusi Paia. O loo faasino atu foʻi le faamatalaga i le Kenese i le avā a Kaino. Pe sa e tau mānatu po o fea na sau ai o ia?” Faaaogā le palakalafa mulimuli o le itulau e 2 o le sāvali e tali atu ai. Ia faamatala i ai e faapea, o loo talanoaina foʻi i le sāvali faamatalaga tāua a le Tusi Paia e uiga i mea o loo taatia mai i lo tatou lumanaʻi. Ia amata i le palakalafa lona tolu i le itulau e 5, ona faaauau lea o le talanoaga i le faaaogāina o mau o loo lagolagoina ai.
9 O le tufatufaina atu o sāvali faale-Tusi Paia o se faiga ua leva ona faamaonia le aogā ma o se auala uigā lea e faalauiloa atu ai le tala lelei. Talu ai e faigofie ona feaveaʻi i so o se mea e te alu i ai, e mafai la ona e faaaogā i se auala uigā i lau galuega mai lea fale i lea fale ma pe a molimau atu lē fuafuaina. E faia e sāvali se vaega tāua i le faataunuuina o la tatou faiva. Ia mautinoa ua e aveina ni sāvali eseese, ma ia faaaogā i le tele e mafai ai sāvali e amata ai ni talanoaga.—Kolo. 4:17.