O le Faamanuia a Ieova e Faatamaoaigaina ai i Tatou
1 O le taulau manuia o se tagata e masani lava ona fua i le telē o lona totogi. O le māfuaaga lena e manatu ai le toʻatele o tagata ia i latou e iai tupe e faapea, o ni tagata e sili ona fiafia ma sili ona faamalieina. Ae peitaʻi, o tagata o loo iai le lagona e faapea e mafai e tupe ona faatau mai le fiafia, ua matuā faasesēina lava. (Fai. 5:12) E lē tumau le fiafia o i latou “o e manao i le fia mauoa” i le itu faaletino. (1 Timo. 6:9) I le faaeseesega, e matuā fiafia moni lava auauna a Ieova ma o ni tagata aupito sili na ona tamaoaiga i le lalolagi. (Faata. 10:22; Faaa. 2:9) E faapefea?
2 Faamaoniga o lo Tatou Tamaoaiga: Ua tatou maua le tamaoaiga o le poto faaleagaga ma le malamalama e uiga i le Afioga a le Atua, le Tusi Paia. E ala i lana faalapotopotoga faalelalolagi, ua faaauau ai pea ona aʻoaʻoina i tatou e Ieova e uiga ia te ia lava ma lona Alo, ina ia maua ai e i tatou aogā tumau. O le maua o le malamalamaga saʻo ua mafai ai ona tatou tosina vavalalata atu ia Ieova ma olioli ai i se faiā totino ma ia. (Iako. 4:8) O le iloa o le lelei mai le leaga ma mulimuli i tulafono a le Atua, e puipuia ai i tatou mai nisi o faamaʻi ma mea e lamatia ai. Ua tatou mautinoa o le a saunia e Ieova mea mo i tatou, ma iʻu ai i le mauaina o le lotomalie mai le Atua ma le filemu o le mafaufau.—Mata. 6:33.
3 E tatou te olioli i le filemu ma le autasi i totonu o lo tatou ʻauuso faaleagaga ona ua tatou atiina aʻe fua o le agaga o le Atua. I le autasia i se noataga malosi o le alofa, e lē tatau ai lava ona tatou lagona e faapea ua tuulafoaʻiina i tatou e le Atua po o o tatou uso pe a tatou fesagaʻi ma mala.—Kala. 6:10.
4 E iai le uiga moni ma le fuafuaga o o tatou olaga. E tatou te manatu i ai o se faaeaga le faia o se sao i le talaʻiga o le tala lelei i le lalolagi aoao. O lenei mea e aumaia ai le olioli e faavavau a o tatou fesoasoani atu i isi ina ia maua se faiā lelei ma le Atua ma auauna autasi ma i tatou i le tapuaʻiga mamā. O la tatou ʻoa e lē mafaatusalia o le faiva e faamamaluina ai Ieova ma aumaia ai ia i tatou le faamalieina ona o le faia o se sao i le faapaiaina o lona suafa. E tatou te tausia ai le mafaufau saʻo, i le iloa e faapea ua lē o toe umi se taimi ona tau lea o lau o lo tatou faamoemoe mo le lumanaʻi.
5 Faaali Atu lo Tatou Talisapaia: Tau ina ia tatou matuā talisapaia faamanuiaga a Ieova ia ua avea moni ai i tatou ma tagata e sili atu ona tamaoaiga i le lalolagi. (Faata. 22:4) O le faaalu o le taimi i aso taʻitasi e mafaufau loloto ai i mea ua ia i tatou, e uunaʻia ai i tatou e faafetai atu ia Ieova mo lona alofa aao mafola ma faaauau ai pea ona tatou tuutoina atoatoa atu ia te ia.