Ua Lamatia Ola!

¹ Ua faamanino mai e le Tusi Paia le finagalo o Ieova “ina ia faaolaina o tagata uma lava.” Ae peitaʻi, e moni o faamoemoega o le faitau piliona o tagata i le lalolagi mo le ola, e faalagolago i o latou uiga faaalia ia Ieova le Atua ma lona Malo i aao o Iesu Keriso. E na o le ‘iloa lelei o le upu moni’ e mafai ona faavae ai le faaalia o uiga saʻo. (1 Timo. 2:3, 4) A o faalauiloa atu e faapea ua lē o toe umi se taimi ona faamamāina lea o le lalolagi mai amioga leaga uma ina ia faaavanoa ai le ala mo le lalolagi fou amiotonu a le Atua, ua poloaʻiina foʻi i tatou ina ia faaauau pea ona faaleo atu lenei galuega tāua faasaoola.—Mata. 24:14; 28:19, 20; Roma 10:13-15.

² Aiseā ua Matuā Faanatinati Ai? Na avatu e Iesu se lapataʻiga e uiga i se “puapuaga tele, e leai sona tusa talu le amataga o le lalolagi.” (Mata. 24:21) O lena puapuaga tele o le a ausia lona tumutumuga ia Amaketo. (Faaa. 16:16) E anoanoaʻi tagata o loo fesagaʻi ma le faaumatiaga pe afai e lē taulau ona latou tali atu i le tala lelei e aofia ai ma o tatou tauaiga lē talitonu, tuaoi, tagata e faigaluega faatasi, aumea i le aʻoga, ma ē masani. Ae e tatau ona tatou manatu mamafa i “tagata uma lava” i le faataʻitaʻi ai i le Atua, o lē na faaalia lona alofa mo le lalolagi atoa o le fanau a tagata e ala i le auina mai o lona Alo, o Iesu Keriso, e fai ma togiola mo tagata uma. (Ioa. 3:16) E tatau ona tatou taumafai ma le maelega e valaaulia tagata uma ina ia sosola i le nofoaga a le Atua mo le faasaoina. O le faia māeʻaeʻa o le galuega talaʻi, e mafai ona tatou ʻalofia ai le nofosala i le toto.—Eseki. 33:1-7; 1 Kori. 9:16.

³ O le ā lo Tatou Sini? O le tāua o le galuega talaʻi o loo faamamafaina i le Afioga a le Atua. E pei ona faaalia e le aposetolo o Paulo e faapea, ua “pulunaunauina i matou i le alofa o Keriso” ina ia ola e ōgatusa ma ala o le Atua. (2 Kori. 5:14) E lē gata i lea, e masani ona faamamafa mai e Le Olomatamata la tatou matafaioi e talaʻi. Ua saunia e lē aunoa e La Tatou Faiva o le Malo ia taʻiala i le auala e faia ai le galuega talaʻi. Ua faamaopoopo e toeaina le galuega ma faalaeiau i tatou ina ia faia ai se sao. E valaaulia i tatou e uso talaʻi ina ia galulue ma i latou i le faiva. E tele mea ua tatou faalogo ai e uiga i le sauniunia o a tatou taulimaga, ofoina o mekasini ma isi lomiga, faia o toe asiga, faia o suʻesuʻega faale-Tusi Paia, ma le faaaogāina o avanoa uma e avatu ai se molimau. O nei mea uma e fesoasoani ia i tatou i le faataunuuina o le sini ia faasaoina ola.—1 Kori. 9:22, 23; Efe. 1:13.